ബെംഗളൂരു: സ്‌ക്കൂളുകളില്‍ ഹാജരെടുക്കാന്‍ ഇനി എഐ, ബയോമെട്രിക്ക് സംവിധാനം മെയ് മുതല്‍

അധ്യാപകര്‍ പേരുവിളിക്കുമ്പോള്‍ എഴുന്നേറ്റ് നിന്ന് ഹാജര്‍ രേഖപ്പെടുത്തുന്ന രീതി, സര്‍ക്കാര്‍ സ്‌ക്കൂളുകളില്‍ നിന്ന് അപ്രത്യക്ഷമാകുന്നു. പകരം കൃത്രിമ ബുദ്ധിയിലധിഷ്ഠിതമായ (എഐ) സംവിധാനം ഇനി ഹാജരെടുക്കും. വിദ്യാര്‍ത്ഥിയുടെ മുഖം തിരിച്ചറിയുന്ന എഐ ക്യാമറകള്‍, അത് സിസ്റ്റത്തില്‍ രേഖപ്പെടുത്തുകയാണ് ചെയ്യുക.

മെയ് മുതല്‍ ബെംഗളൂരു സര്‍ക്കാര്‍ സ്‌ക്കൂളുകളിലും പ്രീ-യൂണിവേഴ്‌സിറ്റികളിലും സംവിധാനം നിലവില്‍ വരും. കുറഞ്ഞവെളിച്ചത്തിലും സംവിധാനം പ്രവര്‍ത്തിക്കും.

ഇപ്പോള്‍ സെക്കന്‍ഡറി വിദ്യാഭ്യാസത്തിലെ ഡ്രോപ്പ്ഔട്ട് നിരക്ക് 22.02 ശതമാനമാണ്. പുതിയ സംവിധാനം വന്നാല്‍ സ്‌കൂളുകള്‍ വിട്ടുപോകുന്ന വിദ്യാര്‍ഥികളെ കൃത്യമായി തിരിച്ചറിയാനും വീണ്ടും പഠനത്തിലേക്ക് തിരികെ കൊണ്ടുവരാനും സാധിക്കുമെന്ന് അധികൃതര്‍ പറഞ്ഞു.

സെന്റര്‍ ഫോര്‍ ഇ-ഗവേര്‍ണന്‍സാണ് ഇതിനായി ആപ്പ് വികസിപ്പിക്കുന്നത്. ബെംഗളൂരു സ്‌ക്കൂള്‍ വിദ്യാഭ്യാസ-സാക്ഷരത വകുപ്പിന്റെ ആവശ്യമാര്‍ത്ഥമാണിത്. ഇവര്‍ തന്നെ എല്ലാ സ്‌ക്കൂളുകളിലും സംവിധാനം സജ്ജീകരിക്കും.

2.16 കോടി രൂപ വകയിരുത്തിയിട്ടുള്ള പദ്ധതി വിദ്യാര്‍ത്ഥികളുടെ രജിസ്‌ട്രേഷനും ഹാജറും സോഫ്റ്റ് വെയറുമായി ബന്ധിപ്പിക്കുന്നു. ബന്ധപ്പെട്ട ഡാറ്റ ഇതിനോടകം ശേഖരിച്ചു.

പുതിയ സംവിധാനം വിദ്യാര്‍ത്ഥികളുടെ ഹാജര്‍ നില കൃത്യമായി രേഖപ്പെടുത്തുമെന്ന് അധികൃതര്‍ പറഞ്ഞു. സംവിധാനം കുറ്റമറ്റതാക്കാന്‍ ഇതുവഴിയാകും. നിലവില്‍ ഹാജരില്ലാത്ത വിദ്യാര്‍ത്ഥികളുടെ ഹാജര്‍ രേഖപ്പെടുത്തുന്ന രീതിയുണ്ട്.

അധ്യാപക തസ്തിക സംരക്ഷിക്കാനാണ് ഇങ്ങിനെ ചെയ്യുന്നത്. പുതിയ സംവിധാനം ഈ പ്രവണത ഇല്ലാതാക്കുന്നു. കുട്ടികളെ സ്‌ക്കൂളിലെത്തിക്കാന്‍ അധ്യാപകര്‍ കഷ്ടപ്പെടേണ്ടിവരും.

കൂടാതെ വിദ്യാര്‍ത്ഥികള്‍ പാതിവഴിയില്‍ പഠനമുപേക്ഷിക്കുന്നത് കുറയ്ക്കാനും സാധിക്കും.