23ന് പകരം 47 കിലോമീറ്റർ സഞ്ചരിച്ചിട്ടും 23 മിനിട്ട് നേരത്തെയെത്തി; ബെംഗളൂരുവിലെ ട്രാഫിക് വീണ്ടും ചർച്ചയാകുന്നു

ബെംഗളൂരുവിലെ ട്രാഫിക് ബുദ്ധിമുട്ടുകൾ പലപ്പോഴായി മുൻപും വാർത്തയായിട്ടുള്ളതും ചർച്ച ചെയ്യപ്പെട്ടിട്ടുള്ളതുമാണ്. ഇന്ത്യയുടെ ടെക് ഹബ്ബ് എന്ന് വിളിക്കുമ്പോഴും ബെംഗളൂരു നഗരത്തിലെ ട്രാഫിക് തിരക്കിൽ വളരെ സാവധാനം മാത്രമേ ലക്ഷ്യസ്ഥാനത്ത് എത്താൻ സാധിക്കൂ. സമാനമായ അനുഭവം പങ്കുവെച്ച് സോഷ്യൽ മീഡിയയിൽ പുതിയ ചർച്ചകൾക്ക് തുടക്കം കുറിച്ചിരിക്കുകയാണ് ശ്രാവിക ജെയ്ൻ എന്ന പെൺകുട്ടി. ബെംഗളൂരുവിൽ താമസിക്കുന്ന ശ്രാവിക 23 കിലോമീറ്റർ മാത്രം അകലെയുള്ള ലക്ഷ്യ സ്ഥാനത്ത് എത്താൻ വേണ്ടി സഞ്ചരിച്ചത് 47 കിലോമീറ്ററാണ്. 'മറ്റൊരു സാധാരണ ദിവസം’ എന്ന് വിശേഷിപ്പിച്ചുകൊണ്ടാണ് ശ്രാവികയുടെ പോസ്റ്റ്. 

തന്റെ പോസ്റ്റിൽ, തന്റെ യാത്രയ്ക്ക് സാധ്യമായ രണ്ട് വഴികൾ കാണിക്കുന്ന ഒരു നാവിഗേഷൻ ആപ്പിൽ നിന്നുള്ള സ്ക്രീൻഷോട്ടുകൾ ജെയിൻ പങ്കിട്ടു. ഒരു വഴിക്ക് 23 കിലോമീറ്റർ മാത്രമേ നീളമുണ്ടായിരുന്നുള്ളൂ, പക്ഷേ വലിയ ഗതാഗതം തടസ്സം കാണാം. മറ്റേ വഴി 47 കിലോമീറ്ററിൽ ഇരട്ടി ദൂരമായിരുന്നു, പക്ഷേ സുഗമമായ ഗതാഗതം ഉണ്ടായിരുന്നു. ഇക്കാരണത്താൽ, ദൂരം കൂടുതലുള്ള വഴിയേ സഞ്ചരിച്ച് 23 കിലോമീറ്റർ സഞ്ചരിച്ച് എത്തുന്ന സമയത്തേക്കാൾ നേരത്തെ എത്താൻ സാധിച്ചുവെന്ന് ശ്രാവിക വ്യക്തമാക്കുന്നു. 

അതായത്, 23 കിലോമീറ്ററുള്ള വഴി തിരഞ്ഞെടുക്കുകയായിരുന്നുവെങ്കിൽ 1.35 മണിക്കൂറിൽ മാത്രമായിരുന്നിരിക്കും ശ്രാവിക ലക്ഷ്യസ്ഥാനത്ത് എത്തിയിരുന്നിരിക്കുക. എന്നാൽ, ഗതാഗത തിരക്ക് കുറഞ്ഞ് 47 കിലോമീറ്ററിലൂടെ ഇരട്ടിയിലധികം ദൂരം സഞ്ചരിച്ചെങ്കിലും ശ്രാവികയ്ക്ക് 1.12 മണിക്കൂറിൽ ഉദ്ദേശിച്ച സ്ഥലത്ത് എത്താൻ സാധിച്ചു. സോഷ്യൽ മീഡിയയിൽ പെട്ടന്നു തന്നെ വൈറലായ പോസ്റ്റ് നൂറു കണക്കിന് ആളുകളാണ് ഏറ്റെടുത്തിരിക്കുന്നത്. ബെംഗളൂരുവിൽ താമസിക്കുന്നവർക്ക് എളുപ്പം മനസ്സിലാകുന്ന സാഹചര്യമാണിതെന്നാണ് നിരവധി ആളുകൾ കമന്റിൽ തങ്ങളുടെ അഭിപ്രായമായി രേഖപ്പെടുത്തിയിരിക്കുന്നത്. കുറെയധികം ആളുകൾ തമാശ രൂപേണയും വിഷയത്തോട് പ്രതികരിച്ചിട്ടുണ്ട്. 

ചെറിയ റൂട്ടിൽ തിരക്ക് കൂടുതലായിരിക്കാമെന്നും, കാരണം പല ഡ്രൈവർമാരും ടോൾ റോഡുകൾ ഒഴിവാക്കാൻ ശ്രമിക്കുന്നതിനാൽ അവിടെ കനത്ത ഗതാഗതക്കുരുക്ക് ഉണ്ടാകുമെന്നും മറ്റൊരു ഉപയോക്താവ് അഭിപ്രായപ്പെട്ടു. ബെംഗളൂരുവിലെ യാത്രക്കാർ നേരിടുന്ന ദൈനംദിന ബുദ്ധിമുട്ടുകളെ അടിവരയിടുകയാണ് ഈ പോസ്റ്റ്. ഗതാഗതക്കുരുക്ക് കാരണം സമയം ലാഭിക്കാൻ വേണ്ടി മാത്രം ദീർഘദൂര യാത്രകൾ തിരഞ്ഞെടുക്കാൻ ആളുകൾ നിർബന്ധിതരാകുന്നു. പലർക്കും ഇത്തരം അനുഭവങ്ങൾ നഗരജീവിതത്തിന്റെ ഒരു സാധാരണ ഭാഗമായി മാറിയിരിക്കുന്നു.