ബെംഗളൂരു യാത്രക്കാർ ശ്രദ്ധിക്കുക; ജെസി നഗർ, ആർടി നഗറിൽ ഗതാഗത നിയന്ത്രണം, ബദൽ വഴികൾ അറിയാം

ദസറ ആഘോഷങ്ങളുടെ ഭാഗമായി ബെംഗളൂരുവിലെ ജെസി നഗർ, ആർടി നഗർ മേഖലകളിൽ ഇന്ന് (ഒക്ടോബർ 13) മുതൽ ട്രാഫിക് നിയന്ത്രണങ്ങൾ ഏർപ്പെടുത്തി. ദസറ മൈതാനത്തിന് ചുറ്റും ഉച്ചയ്ക്ക് 2 മണി മുതൽ രാത്രി 10 മണി വരെയാണ് നിയന്ത്രണം. ഒക്ടോബർ 21 വരെ എല്ലാ ദിവസവും ഈ നിയന്ത്രണങ്ങൾ നിലവിലുണ്ടാകും. ഈ വഴി പോകേണ്ടവർ ബദൽ മാർഗങ്ങൾ തിരഞ്ഞെടുക്കാനും ഇടറോഡുകൾ ഒഴിവാക്കാനും ബെംഗളൂരു ട്രാഫിക് പൊലീസ് നിർദേശിക്കുന്നു. വൈകുന്നേരങ്ങളിൽ ആഘോഷ നഗരിയിലേക്ക് ആൾത്തിരക്ക് കൂടാൻ സാധ്യതയുണ്ട്.

ജെസി നഗർ മെയിൻ റോഡ്, ദിന്നൂർ മെയിൻ റോഡ്, ആർടി നഗർ പൊലീസ് സ്റ്റേഷൻ ജങ്ഷൻ, പിആർടിസി ജങ്ഷൻ, ശിവണ്ണ സർക്കിൾ എന്നിവയെ ബന്ധിപ്പിക്കുന്ന വഴികളിലാണ് ഗതാഗതം തടയുക. നിയന്ത്രണമുള്ള സമയങ്ങളിൽ പ്രാദേശിക യാത്രക്കാരെ പ്രവേശിപ്പിക്കുന്നതിനും വാഹനങ്ങൾ തിരിച്ചുവിടുന്നതിനുമായി ബാരിക്കേഡുകൾ സ്ഥാപിക്കും. പിആർടിസി ജങ്ഷനിലെ ദസറ മണ്ഡപത്തിൽ നിന്നാരംഭിക്കുന്ന ഘോഷയാത്രകൾ ജെസി നഗർ മെയിൻ റോഡ് വഴിയാണ് കടന്നുപോകുന്നത്.

ഗതാഗത നിയന്ത്രണവും ബദൽ വഴികളും

സുൽത്താൻപാളയ, ദിന്നൂർ ഭാഗത്തുനിന്ന് കന്റോൺമെന്റിലേക്ക് പോകുന്നവർ ആർടി നഗർ പൊലീസ് സ്റ്റേഷനിൽ നിന്ന് തിരിഞ്ഞ് ആർടി നഗർ മെയിൻ റോഡ് വഴി ബല്ലാരി റോഡിൽ പ്രവേശിക്കണം. തുടർന്ന് മേഖ്രി സർക്കിൾ അണ്ടർപാസ് വഴി ജയമഹൽ റോഡിലൂടെ ഫ്ലൈഓവറിലേക്ക് പോകാം. ഇനി നഗരത്തിൽ നിന്ന് ആർടി നഗറിലേക്ക് പോകേണ്ടവർ ജയമഹൽ–മേഖ്രി–സിബിഐ അണ്ടർപാസ്–സിബിഐ റോഡ്–ആർടി നഗർ മെയിൻ റോഡ് വഴി യാത്ര ചെയ്യുന്നതാവും സൗകര്യം. യശ്വന്ത്പൂരിൽ നിന്ന് മേഖ്രി വഴി വരുന്നവർ ബല്ലാരി റോഡിൽ നിന്ന് ഇടത്തോട്ട് തിരിഞ്ഞ് സിബിഐ അണ്ടർപാസും സിബിഐ റോഡും വഴി ആർടി നഗറിലെത്താം.

പാർക്കിങ് നിയന്ത്രണങ്ങളും നിർദേശങ്ങളും

വൈകുന്നേരങ്ങളിൽ മുനിരഡ്ഡി പാളയയ്ക്ക് സമീപമുള്ള പിആർടിസി ജങ്ഷൻ–ടിവി ടവർ സ്ട്രെച്ചിൽ വലിയ ജനത്തിരക്കിന് സാധ്യതയുണ്ട്. ദസറ മൈതാനത്തിന് സമീപമുള്ള റോഡരികുകളിൽ വാഹനങ്ങൾ പാർക്ക് ചെയ്യരുത്. പകരം ബല്ലാരി റോഡ്, ജയമഹൽ, ഹെബ്ബാൾ എന്നിവിടങ്ങളിലെ പാർക്കിങ് സ്ഥലങ്ങൾ പ്രയോജനപ്പെടുത്താം. രാത്രി 9 മണിക്ക് ശേഷം ആൾത്തിരക്ക് പെട്ടെന്ന് ഒഴിവാക്കാൻ ക്രോസിങ്ങുകളിൽ ട്രാഫിക് പൊലീസിന്റെ നിർദേശങ്ങൾ കർശനമായി പാലിക്കണം.

ബിഎംടിസി, ക്യാബ് സർവീസുകളിലെ മാറ്റങ്ങൾ

ആർടി നഗറിലെ റോഡുകൾ അടയ്ക്കുമ്പോൾ ബിഎംടിസി ബസുകളും ടാക്സി സർവീസുകളും ബല്ലാരി റോഡ്, മേഖ്രി സർക്കിൾ, ജയമഹൽ വഴികളിലൂടെയായിരിക്കും തിരിച്ചുവിടുക. റൂട്ടുകളിലെ തത്സമയ മാറ്റങ്ങൾ അറിയാൻ ബിഎംടിസിയുടെ എക്സ് (ട്വിറ്റർ) പേജും ബെംഗളൂരു ട്രാഫിക് പൊലീസിന്റെ 'ASTrAM' ആപ്പും ഉപയോഗിക്കാം. സ്കൂളുകളിലേക്കും ആശുപത്രികളിലേക്കും പോകുന്നവർ കൃത്യസമയത്ത് എത്താൻ നേരത്തെ ഇറങ്ങാനും സിബിഐ അണ്ടർപാസ്, ബല്ലാരി റോഡ് എന്നീ വഴികൾ തിരഞ്ഞെടുക്കാനും ശ്രദ്ധിക്കുക.

തിരക്കേറിയ സമയങ്ങളും മഴ മുന്നറിയിപ്പും

വൈകുന്നേരം 5 മണി മുതൽ രാത്രി 8 മണി വരെയും, പരിപാടികൾ അവസാനിക്കുന്ന 9 മുതൽ 10 മണി വരെയുമുള്ള സമയങ്ങളിലാണ് റോഡുകളിൽ ഏറ്റവും കൂടുതൽ തിരക്ക് അനുഭവപ്പെടുക. തത്സമയ ട്രാഫിക് വിവരങ്ങൾക്ക് ASTrAM ആപ്പ് നോക്കുക. തിരക്ക് വർധിക്കുകയാണെങ്കിൽ ഹെബ്ബാൾ–മേഖ്രി–ബല്ലാരി റോഡ് വഴി പോകാം. വൈകുന്നേരങ്ങളിൽ മഴ പെയ്ത് ഗതാഗതം കൂടുതൽ തടസ്സപ്പെടാൻ സാധ്യതയുള്ളതിനാൽ ഐഎംഡി ബെംഗളൂരുവിന്റെ വിവരങ്ങളും കെഎസ്എൻഡിഎംസിയുടെ 'മേഘ സന്ദേശ' ആപ്പിലെ മുന്നറിയിപ്പുകളും ശ്രദ്ധിക്കുന്നത് നന്നായിരിക്കും.