ബെംഗളൂരു മലയാളികളുടെ ശ്രദ്ധയ്ക്ക്, ഈ പ്രദേശങ്ങളില്‍ നാളെ കുടിവെള്ളം മുടങ്ങും, മുന്‍കരുതലുകളെടുക്കാം

ബെംഗളൂരുവില്‍ താമസിക്കുന്ന മലയാളികള്‍ ശ്രദ്ധിക്കുക. കിഴക്കന്‍, ദക്ഷിണ പ്രദേശങ്ങളില്‍ നാളെ കുടിവെള്ളം മുടങ്ങും.

വ്യാഴാഴ്ച രാവിലെ 6 ന് നിര്‍ത്തുന്ന ജലവിതരണം, വെള്ളിയാഴ്ച രാവിലെ മാത്രമേ പുനരാരംഭിക്കൂ.

ജലവിതരണ സംവിധാനം മെച്ചപ്പെടുത്താനായി ബെംഗളൂരു വാട്ടര്‍ സപ്ലേ ആന്റ് സ്യൂവേജ് ബോര്‍ഡ് പുതിയ ഇലക്ട്രോമാഗ്‌നറ്റിക് ഫ്‌ലോ മീറ്റര്‍ ( ഇഎംഎഫ് മീറ്റര്‍)സ്ഥാപിക്കുകയാണ്.കാവേരി സ്റ്റേജ് V പദ്ധതിയുടെ ഭാഗമാണ് നടപടി.ഇതാണ് കുടിവെള്ളം
തടസ്സപ്പെടാന്‍ കാരണം.

ജലഉപഭോഗം കൃത്യമായി അളക്കുന്ന ഉപകരണമാണ് ഇഎംഎഫ് മീറ്റര്‍. ചോര്‍ച്ചകള്‍ കണ്ടെത്താനും വിതരണം നിയന്ത്രിക്കാനും ഇത് സഹായിക്കുന്നു.

ജലവിതരണം തടസ്സപ്പെടുന്ന പ്രധാന പ്രദേശങ്ങള്‍
കിഴക്കന്‍ ബെംഗളൂരുവിലെ മഹാദേവപുര മേഖലയേയും സമീപ പ്രദേശങ്ങളേയും നടപടി ബാധിക്കും. ഈ പ്രദേശങ്ങള്‍:

വൈറ്റ്ഫീല്‍ഡ്
കടുഗോഡി
ഹൂഡി
ഗരുഡചര്‍പാള്യ
ഡോഡ്ഡനെക്കുണ്ടി
മുന്നേക്കോളാല (മരത്തഹള്ളി പ്രദേശം)
നല്ലുഹള്ളി
സിദ്ധാപുര
നഗോണ്ടനഹള്ളി
രാമഗോണ്ടനഹള്ളി
ചന്നസന്ദ്ര

ദക്ഷിണ ബെംഗളൂരുവില്‍ താഴെ പറയുന്ന പ്രദേശങ്ങള്‍ ബാധിക്കും.

ബനശങ്കരി വിവിധ ഘട്ടങ്ങള്‍
കുമാരസ്വാമി ലേയൗട്ട്
പൂര്‍ണപ്രജ്ഞ ലേയൗട്ട്
അഞ്ജനാപുര
ഗൊട്ടിഗെറെ
ബെഗൂര്‍
കല്ലഹള്ളി
കുഡ്‌ലു
കൊഡിച്ചിക്കനഹ

ഈ പ്രദേശങ്ങളില്‍ താമസിക്കുന്നവര്‍ വെള്ളം മുന്‍കൂട്ടി സംഭരിക്കണം.

സമയക്രമം
പമ്പ് നിര്‍ത്തുന്നത് വ്യാഴാഴ്ച ഫെബ്രുവരി 26 രാവിലെ 6 മണിക്ക്.
പമ്പ് വീണ്ടും പ്രവര്‍ത്തനം ആരംഭിക്കുന്നത് വെള്ളിയാഴ്ച ഫെബ്രുവരി 27 രാവിലെ 6 മണിക്ക്.

വെള്ളിയാഴ്ച 6 മണിക്ക് പമ്പിംഗ് ആരംഭിച്ചാലും വീടുകളിലേക്ക് വെള്ളം എത്താന്‍ 3 മുതല്‍ 6 മണിക്കൂര്‍ വരെ വൈകും. പൈപ്പുകള്‍ സാധരണനിലയിലാകാന്‍ സമയമെടുക്കുന്നതിനാലാണിത്.

എങ്ങനെ തയ്യാറാകാം?

ബുധനാഴ്ച രാത്രി തന്നെ ടാങ്കുകള്‍ പൂര്‍ണ്ണമായി നിറയ്ക്കുക.

കൂടുതല്‍ വെള്ളം ആവശ്യമുള്ള ജോലികള്‍ വാരാന്ത്യത്തിലേക്ക് മാറ്റുക.

ഓട്ടോമാറ്റിക് പമ്പ് ഉപയോഗിക്കുന്നവര്‍ ശ്രദ്ധിക്കണം. വെള്ളം വരാത്ത സമയത്ത് പമ്പ് പ്രവര്‍ത്തിച്ചാല്‍ ''എയര്‍ലോക്ക്'' ഉണ്ടാകാം. പമ്പ് മാനുവല്‍ മോഡിലേക്ക് മാറ്റുക.

വെള്ളിയാഴ്ച രാവിലെ 6 മണിക്ക് തന്നെ പൂര്‍ണ്ണ സമ്മര്‍ദ്ദത്തില്‍ വെള്ളം ലഭ്യമാകില്ല. സമയമെടുക്കും.

കാവേരി സ്റ്റേജ് V പദ്ധതി

കാവേരി നദിയില്‍ വെളളം ശേഖരിച്ച് അത് ബെംഗളൂരുവിലേയ്‌ക്കെത്തിക്കുന്ന
പദ്ധതിയാണ് ഇത്. അതിലെ അഞ്ചാം ഘട്ടമാണ് ''കാവേരി സ്റ്റേജ് V'. ജനസംഖ്യ കൂടുന്നതനുസരിച്ച് ജലലഭ്യത ഉറപ്പുവരുത്തുകയാണ് പദ്ധതിയുടെ ലക്ഷ്യം.