ചൂടിനാശ്വാസമായി ബെംഗളൂരുവില്‍ ഇന്ന് മഴ, വൈദ്യുതി മുടങ്ങും; മുന്‍കരുതലുകളെടുക്കാം

ഉയര്‍ന്ന ചൂടിന് ആശ്വാസമായി ബെംഗളൂരുവില്‍ മഴ എത്തുന്നു. കര്‍ണ്ണാടകത്തിലെ പല ജില്ലകളിലും ഇടിമിന്നലോട് കൂടിയ ശക്തമായ മഴയ്ക്ക് സാധ്യതയുണ്ടെന്ന് ഇന്ത്യന്‍ കാലാവസ്ഥ വകുപ്പ് (ഐഎംഡി) പ്രവചിച്ചു.

വിവിധ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്.

ചൊവ്വാഴ്ച പല പ്രദേശങ്ങളിലും മഴ ലഭ്യമായി. ചാമരാജനഗര്‍, മൈസൂരു, ഹാസന്‍, ബെലഗാവി, ധാര്‍വാഡ്, വിജയപുര, കൊപ്പല്‍, ഹുബ്ബള്ളി എന്നിവിടങ്ങളില്‍ ആലിപ്പഴം പൊഴിഞ്ഞു. പലയിടങ്ങളും വെള്ളപുതച്ചു.

കലഘടഗിയില്‍ ഗതാഗതം തടസ്സപ്പെട്ടപ്പോള്‍ ബെലഗാവിയിലും ധാര്‍വാഡിലും ശക്തമായ കാറ്റുണ്ടായി.

ഇടിമിന്നലോട് കൂടിയ മഴയ്ക്ക് സാധ്യത

ബെംഗളൂരുവില്‍ ബുധനാഴ്ച നേരിയതും മിതവുമായ മഴ ലഭിക്കും. ബെംഗളൂരു അര്‍ബന്‍, ബെംഗളൂരു റൂറല്‍, രാമനഗര, തുമകുരു, മാണ്ഡ്യ, മൈസൂരു, ചിക്കമഗളൂരു, ശിവമോഗ, ഹാസന്‍, കുടക്, ദാവണഗെരെ, ചാമരാജനഗര്‍, ഉഡുപ്പി, ദക്ഷിണ കന്നഡ, ബിദാര്‍, കലബുറഗി, യാദ്ഗിര്‍, റായ്ച്ചൂര്‍, ബെലഗാവി, ധാര്‍വാഡ് എന്നിവിടങ്ങളിലാണ് മഴ കിട്ടുക.

ഇന്നും നാളെയും മേഘാവൃതമായ അന്തരീക്ഷമായിരിക്കും. മഴ,മിന്നല്‍, കാറ്റ് എന്നിവയ്ക്ക് സാധ്യതയുണ്ട്. പല പ്രദേശങ്ങളിലും വൈദ്യുതി മുടങ്ങുമെന്ന് അറിയിപ്പുണ്ട്. മരങ്ങള്‍ വീഴുന്ന പക്ഷം ഗതാഗതം തടസ്സപ്പെടാം.

സമീപ ജില്ലകളില്‍ മഴയ്ക്ക് സാധ്യത

ഐഎംഡി പ്രവചനമനുസരിച്ച് ബെംഗളൂരു, ചിക്കബെല്ലാപൂര്‍, കോലാര്‍, തുമകൂരു, മാണ്ഡ്യ, രാമനഗര, മൈസൂരു, ഹാസന്‍, ദാവന്‍ഗെരെ, ബല്ലാരി, വിജയനഗര, പരിസര ജില്ലകളില്‍ അടുത്ത കുറച്ച് മണിക്കൂറുകളില്‍ ഇടിമിന്നലോട് കൂടിയ മഴയ്ക്ക് സാധ്യതയുണ്ട്. മണിക്കൂറില്‍ 30-40 കിലോമീറ്റര്‍ വേഗതയില്‍ കാറ്റ് വീശും.

മാര്‍ച്ച് 20 വരെയുള്ള പ്രവചനം

മാര്‍ച്ച് 17 മുതല്‍ മാര്‍ച്ച് 20 വരെ കര്‍ണാടകയുടെ തീരദേശങ്ങളിലും വടക്ക്,തെക്ക് ഭാഗങ്ങളിലെ ഉള്‍നാടന്‍ പ്രദേശങ്ങളിലും ഇടിമിന്നലുണ്ടാകും. ു.

മാര്‍ച്ച് 17-20: ഇടിമിന്നല്‍, മിന്നല്‍, ശക്തമായ കാറ്റ് സാധ്യത

മാര്‍ച്ച് 21 മുതല്‍: വലിയ മുന്നറിയിപ്പുകളൊന്നുമില്ല. മഴയും മിന്നലും ശമിക്കാനാണ് സാധ്യത.