ക്രിപ്‌റ്റോ വസന്തം; ബിറ്റ്‌കോയിന്‍ റെക്കോര്‍ഡ് ഉയരത്തില്‍, ഒപ്പം കൂടാന്‍ ഷിബ, ഗാല, ഡോജ്‌കോയിനുകള്‍!

ക്രിപ്‌റ്റോ വസന്തം കഴിഞ്ഞെന്ന് കരുതിയവര്‍ക്ക് തെറ്റി. ബിറ്റ്‌കോയിന്‍ വീണ്ടും ഉയിര്‍ത്തെഴുന്നേറ്റു. കഴിഞ്ഞ മൂന്നുവര്‍ഷത്തെ ക്ഷീണത്തിന് ശേഷം ക്രിപ്‌റ്റോ ലോകം ഒരിക്കല്‍ക്കൂടി വെള്ളിവെളിച്ചത്തിലേക്ക്.

സംഭവം എന്തെന്നല്ലേ? വ്യാഴാഴ്ച്ച റെക്കോര്‍ഡ് ഉയരം നോട്ടമിട്ടാണ് ബിറ്റ്‌കോയിന്റെ വ്യാപാരം. കഴിഞ്ഞ മൂന്നുവര്‍ഷത്തിനിടെയുള്ള ഏറ്റവും വലിയ കുതിപ്പ് ഫെബ്രുവരി മാസം ബിറ്റ്‌കോയിന്‍ രേഖപ്പെടുത്തിക്കഴിഞ്ഞു.

ബിറ്റ്‌കോയിന്‍ വില 62,000 ഡോളര്‍ നിലവാരത്തില്‍ നില്‍ക്കെയാണ് ഏഷ്യന്‍ ഭൂഖണ്ഡം വ്യാഴം രാവിലെ കണ്ണുതുറന്നത്. 63,933 ഡോളര്‍ വരെയ്ക്കും വില നിലവാരം ഉയര്‍ത്താന്‍ ബുധനാഴ്ച്ച അര്‍ധരാത്രി ബിറ്റ്‌കോയിന് സാധിച്ചിരുന്നു.

ഫെബ്രുവരിയില്‍ മാത്രം 45 ശതമാനം വിലക്കയറ്റം ബിറ്റ്‌കോയിന്‍ പറഞ്ഞുവെയ്ക്കുന്നുണ്ട്. 2020 ഡിസംബറിന് ശേഷമുള്ള ഏറ്റവും മികച്ച പ്രതിമാസ കുതിപ്പാണിത്.

പതിവുപോലെ ബിറ്റ്‌കോയിനൊപ്പം ക്രിപ്‌റ്റോ ലോകത്തെ മറ്റു കുഞ്ഞന്‍ ഡിജിറ്റല്‍ കോയിനുകളും റാലിയില്‍ പങ്കുചേരുന്നത് കാണാം. ലോകത്തെ ഏറ്റവും പ്രചാരമേറിയ രണ്ടാമത്തെ ക്രിപ്‌റ്റോകറന്‍സി ഈഥര്‍ ഫെബ്രുവരിയില്‍ 50 ശതമാനം ഉയര്‍ച്ച കൈവരിച്ചു. നിലവില്‍ 3,429 ഡോളര്‍ വിലനിലവാരം ഈഥര്‍ കോയിനുകള്‍ക്കുണ്ട്.

സമാനമായ ചിത്രമാണ് ഡോജ്‌കോയിന്‍, ഷിബ ഇനു, ഗാല കോയിന്‍ തുടങ്ങിയ കുഞ്ഞന്‍മാരും വരച്ചുകാട്ടുന്നുന്നത്. ഫെബ്രുവരിയില്‍ ഡോജ്‌കോയിന്‍ 43 ശതമാനം കയറി (0.11 ഡോളര്‍). ഗാല കോയിനാകട്ടെ 67 ശതമാനവും (0.0386 ഡോളര്‍). ഷിബ ഇനുവിന്റെ വിലയില്‍ 30 ശതമാനം വര്‍ധനവാണ് സംഭവിച്ചത് (0.00001186 ഡോളര്‍).

ഇപ്പോഴത്തെ അവസ്ഥയില്‍ ബിറ്റ്‌കോയിനില്‍ പുത്തന്‍ ബ്രേക്കൗട്ട് സാധ്യത ആഗോള വിപണി വിദഗ്ധര്‍ തള്ളിക്കളയുന്നില്ല. ആദ്യം 69,000 ഡോളര്‍ വിലനിലവാരം ബിറ്റ്‌കോയിന്‍ പരീക്ഷിക്കും. പിന്നാലെ ഈ കടമ്പ മറികടക്കുമെന്നാണ് പ്രതീക്ഷ. 2021 നവംബറിലാണ് 69,000 ഡോളര്‍ നിലവാരം ബിറ്റ്‌കോയിന്‍ ആദ്യം കൈവരിച്ചത്.

അമേരിക്ക ആസ്ഥാനമായി പ്രവര്‍ത്തിക്കുന്ന ക്രിപ്‌റ്റോകറന്‍സി എക്‌സ്‌ചേഞ്ച് കോയിന്‍ബേസ് സമീപകാലത്തെ നിക്ഷേപകരുടെ വര്‍ധിച്ച പങ്കാളിത്തം വെളിപ്പെടുത്തുന്നുണ്ട്.

കുതിപ്പിന് കാരണം?

ബിറ്റ്‌കോയിന്റെ പെട്ടെന്നുള്ള വളര്‍ച്ചയ്ക്കുള്ള കാരണമായിരിക്കും മിക്കവരും അന്വേഷിക്കുന്നത്. പുതിയ ബിറ്റ്‌കോയിന്‍ ഇടിഎഫുകള്‍ക്ക് (എക്‌സ്‌ചേഞ്ച് ട്രേഡഡ് ഫണ്ടുകള്‍) അമേരിക്ക അനുവാദം കൊടുത്തതാണ് ബിറ്റ്‌കോയിന്റെ ഇപ്പോഴത്തെ ഉയര്‍ച്ചയ്ക്ക് കാരണം. ബിറ്റ്‌കോയിന്‍ ഇടിഎഫുകളിലേക്ക് നിക്ഷേപകര്‍ കാര്യമായി കടന്നെത്തുന്നുണ്ട്.

ലണ്ടന്‍ സ്റ്റോക്ക് എക്‌സ്‌ചേഞ്ച് ഗ്രൂപ്പ് നല്‍കുന്ന വിവരം പ്രകാരം ചൊവാഴ്ച്ച മാത്രം ലോകത്തെ പ്രമുഖ 10 ബിറ്റ്‌കോയിന്‍ ഇടിഎഫുകളിലേക്ക് 420 ദശലക്ഷം ഡോളര്‍ നിക്ഷേപമെത്തി. ആഗോള ട്രേഡര്‍മാരും സജീവമായി ബിറ്റ്‌കോയിന്‍ വ്യാപാര രംഗത്തുണ്ട്. നിലവില്‍ 21 ദശലക്ഷം യൂണിറ്റുകളാണ് ബിറ്റ്‌കോയിന്റെ പരമാവധി സപ്ലൈ. ഇതില്‍ 19 ദശലക്ഷം ബിറ്റ്‌കോയിന്‍ യൂണിറ്റുകള്‍ മൈന്‍ ചെയ്തുകഴിഞ്ഞു.

അമേരിക്കന്‍ കേന്ദ്ര ബാങ്കായ ഫെഡറല്‍ റിസര്‍വ് വരും മാസങ്ങളില്‍ പലിശ നിരക്കുകള്‍ കുറയ്ക്കുമെന്ന പ്രതീക്ഷ ബിറ്റ്‌കോയിന് ഗുണം ചെയ്യുന്നുണ്ട്.