യൂട്യൂബ് റെഡ് ഡയമണ്ട് പ്ലേ ബട്ടണ്‍ നേടുന്ന ആദ്യ സംഗീതബാന്റായി ബ്ലാക്ക്പിങ്ക്, ചരിത്രനേട്ടം അറിയാം

ദക്ഷിണ കൊറിയയില്‍ നിന്നുള്ള ബ്ലാക്ക്പിങ്ക്, യൂട്യൂബിന്റെ റെഡ് ഡയമണ്ട് പ്ലേ ബട്ടണ്‍ നേടുന്ന ആദ്യ സംഗീതബാന്റായി. സബ്‌സ്‌ക്രൈബര്‍മാരുടെ എണ്ണം 100 ദശലക്ഷം കടന്നതോടെയാണ് ജിസൂ, ജെന്നി, ലിസ, റോസ് എന്നിവരുള്‍പ്പെടുന്ന സംഘം നാഴികക്കല്ല് പിന്നിട്ടത്.

തങ്ങളുടെ ആരാധകര്‍ക്കും സബ്‌സ്‌ക്രൈബര്‍മാര്‍ക്കും നന്ദി അറിയിക്കുകയാണ് ഇപ്പോള്‍ ഇവര്‍.

പത്ത് വര്‍ഷം മുന്‍പാണ് യൂട്യൂബില്‍ ബ്ലാക്ക്പിങ്ക് ആദ്യ വീഡിയോ പോസ്റ്റ് ചെയ്യുന്നത്. പിന്നീട് നടന്നത് ചരിത്രം. 2024 ല്‍ ഏറ്റവും കൂടുതല്‍ സബ്‌സ്‌ക്രൈബര്‍മാരെ നേടുന്ന ആദ്യ ആര്‍ട്ടിസ്റ്റ് ചാനലായി മാറിയ ഇവര്‍ ഇതിനോടകം 41 ബില്യണ്‍ വ്യൂസ് നേടി.

മാത്രമല്ല കൊറിയന്‍ പോപ്പ് സംഗീതത്തെ ജനകീയമാക്കാനും ഇവര്‍ക്ക് സാധിച്ചു.ജസ്റ്റിന്‍ ബീബര്‍, ബിടിഎസ്, ടെയ്ലര്‍ സ്വിഫ്റ്റ് തുടങ്ങിയ ആഗോള സൂപ്പര്‍സ്റ്റാറുകള്‍ക്ക് സ്വന്തമാക്കാന്‍ കഴിയാത്ത നേട്ടമാണ് ഇപ്പോള്‍ ബ്ലാക്ക്പിങ്കിനെ തേടിയെത്തിയിരിക്കുന്നത്.

സംഘത്തിലെ ഓരോരുത്തരും ഗായകരെന്ന നിലയിലും പ്രശസ്തരാണ്.

റെഡ് ഡയമണ്ട് പ്ലേ ബട്ടണ്‍ 

റെഡ് ഡയമണ്ട് പ്ലേ ബട്ടണ്‍ എന്നറിയപ്പെടുന്ന റെഡ് ഡയമണ്ട് ക്രിയേറ്റര്‍ അവാര്‍ഡ്, 100 ദശലക്ഷം സബ്സ്‌ക്രൈബര്‍മാരെ മറികടക്കുന്ന ചാനലുകള്‍ക്ക് യൂട്യൂബ് സമ്മാനിക്കുന്നു.

യൂട്യൂബ് പ്ലേ ചിഹ്നത്തോടുകൂടിയ കടും ചുവപ്പ് നിറത്തിലുള്ള ക്രിസ്റ്റല്‍ ഫലകം ഫ്രാന്‍സിലെ ബക്കാരാറ്റാണ് മണലും 24 കാരറ്റ് സ്വര്‍ണ്ണവും ചേര്‍ത്ത് നിര്‍മ്മിച്ചത്.

പ്യൂഡൈപൈ, കോകോമെലോണ്‍, മിസ്റ്റര്‍ബീസ്റ്റ്, ലൈക്ക് നാസ്ത്യ, വ്‌ലാഡ് ആന്‍ഡ് നിക്കി, ഡബ്ല്യുഡബ്ല്യുഇ, ടി-സീരീസ്, സെറ്റ് ഇന്ത്യ തുടങ്ങിയവയാണ് നേട്ടം സ്വന്തമാക്കിയ മറ്റ് ചാനലുകള്‍.