ബജറ്റ് 2020; നിങ്ങളുടെ ഓൺലൈൻ ഓഡറുകൾക്ക് ടിഡിഎസ് നൽകേണ്ടിവരും

ന്യൂഡൽഹി: രണ്ടാം മോദി സർക്കാറിന്റെ 2020-21 സാമ്പത്തിക വർഷത്തേക്കുള്ള കേന്ദ്ര ബജറ്റ് വളരെ പ്രതീക്ഷകളോടെയാണ് എല്ലാവരും കാത്തിരുന്നത്. ശമ്പളക്കാരെ ഏറെ ബാധിക്കുന്ന ആദായ നികുതി നിയമങ്ങളിൽ നിരവധി മാറ്റങ്ങൾ കൊണ്ടുവന്നിട്ടുണ്ട്. ഒറ്റ നോട്ടത്തിൽ ഇടത്തരക്കാര്‍ക്ക് ആശ്വാസകരമാകുമെന്ന് തോന്നിക്കുന്നുണ്ടെങ്കിലും നിരക്കിലെ കുറവുകൾ നിബന്ധനകൾക്ക് വിധേയമാണ്. പുതുക്കിയ നിബന്ധനകൾ അടുത്ത സാമ്പത്തിക വർഷം മുതൽ നിലവിൽ വരും.

ആദായനികുതി നിയമത്തിലെ നിർദ്ദിഷ്ട ഭേദഗതി പ്രാബല്യത്തിൽ വന്നാൽ നിങ്ങളുടെ ആമസോൺ ഓർഡർ അല്ലെങ്കിൽ ഉബർ സവാരി ഇപ്പോൾ കുറച്ചുകൂടി ചെലവേറിയതാകും. ആദായനികുതി നിയമത്തിലെ സെക്ഷൻ 194-ഒ യിൽ പുതിയ വിഭാഗം ഉൾപ്പെടുത്താൻ 2020-21-ലെ കേന്ദ്ര ബജറ്റ് നിർദ്ദേശിച്ചിട്ടുണ്ട്. അതായത് ഇ-കൊമേഴ്‌സ് പ്ലാറ്റ്‌ഫോമുകളിൽ സാധനങ്ങളോ സേവനങ്ങളോ വാങ്ങുമ്പോൾ ഇ-കൊമേഴ്‌സ് ഓപ്പറേറ്റർ ടിഡിഎസ് നൽകണം. ഇത് ഏപ്രിൽ ഒന്ന് മുതൽ പ്രാബല്യത്തിൽ വരും.

ഇ-കൊമേഴ്‌സ് ഓപ്പറേറ്റർ എല്ലാ പേയ്‌മെന്റുകൾക്കും ക്രെഡിറ്റുകൾക്കും ടിഡിഎസ് നൽകണം. പാൻ/ആധാർ കാർഡുകൾ ഉണ്ടെങ്കിൽ 1 ശതമാനവും പാൻ/ആധാർ ഇല്ലാത്ത സാഹചര്യത്തിൽ 5 ശതമാനവും ടിഡിഎസ് നൽകണം. ഒരു സ്റ്റോറിൽ നിന്ന് നേരിട്ട് സാധനങ്ങൾ വാങ്ങുമ്പോൾ ടിഡിഎസ് ബാധകമല്ല. എങ്കിലുംഓൺലൈൻ വാങ്ങലുകൾക്ക് 1 ശതമാനം ടിഡിഎസ് ബാധകമാകും. ആമസോൺ, ഫ്ലിപ്കാർട്ട്, ഒയോ, ഉബർ, ഓല, മെയ്‌ക്ക് മൈട്രിപ്പ്, മിന്ത്ര, സൊമാറ്റോ, സ്വിഗ്ഗി തുടങ്ങി എല്ലാത്തരം ഡിജിറ്റൽ ബിസിനസുകളെയും ഈ വ്യവസ്ഥ ബാധകമാണ്.