കുട്ടികൾക്കും സമ്പാദ്യം, പുതിയ പദ്ധതി പ്രഖ്യാപിച്ച് ധനമന്ത്രി, എൻപിഎസ് വാത്സല്യയുടെ നേട്ടങ്ങളറിയാം

രാജ്യത്തെ കുട്ടികളുടെ ഭാവി സാമ്പത്തിക സുരക്ഷിതത്വമുള്ളതാക്കി മാറ്റാൻ നിരവധി നിക്ഷേപ പദ്ധതികൾ കേന്ദ്രസർക്കാർ പ്രഖ്യാപിച്ചിട്ടുണ്ട്. എന്നാൽ ആ പട്ടികയിലേക്ക് പുതിയ ഒരു പദ്ധതി കൂടി വരികയാണ്. കുട്ടികളുടെ ആദ്യകാല സമ്പാദ്യവും നിക്ഷേപവും പ്രോത്സാഹിപ്പിക്കുന്നതിനായി എൻപിഎസ് വാത്സല്യ എന്ന പുതിയ പദ്ധതിയാണ് ബജറ്റിൽ ധനമന്ത്രി നിർമ്മല സീതാരാമൻ പ്രഖ്യാപിച്ചത്.

എന്താണ് എൻപിഎസ് വാത്സല്യ..?

പദ്ധതിക്ക് കീഴിൽ, മാതാപിതാക്കൾക്കോ ​​രക്ഷിതാക്കൾക്കോ ​​അവരുടെ പ്രായപൂർത്തിയാകാത്ത കുട്ടികൾക്കായി ഒരു അക്കൗണ്ട് തുറക്കാനും അവരുടെ വിരമിക്കൽ സമ്പാദ്യത്തിലേക്ക് സംഭാവന നൽകാനും കഴിയും. രക്ഷിതാക്കള്‍ക്ക് ഇനി മക്കളുടെ പെന്‍ഷന്‍ കൂടി ആസൂത്രണം ചെയ്യാം എന്നതാണ് പദ്ധതിയുടെ ഹൈലൈറ്റ്. പ്രായപൂർത്തിയാകാത്ത കുട്ടിക്ക് 18 വയസ്സ് പൂർത്തിയാകുമ്പോൾ മാതാപിതാക്കൾക്ക് അക്കൗണ്ട് ഒരു സാധാരണ നാഷണൽ പെൻഷൻ സിസ്റ്റം അക്കൗണ്ടാക്കി മാറ്റാം എന്നതാണ് ഇതിന്റെ സവിശേഷത.

എൻ പി എസുമായി ബന്ധപ്പെട്ട സർക്കാർ ജീവനക്കാരുടെ ആശങ്കകൾ പരിഹരിക്കുന്നതിനുള്ള നടപടികളും ഉടൻ പ്രഖ്യാപിക്കുമെന്നും നിർമ്മലാ സീതാരാമൻ ബജറ്റ് പ്രസംഗത്തിൽ വ്യക്തമാക്കി. പദ്ധതിയിൽ ഇനിയും മാറ്റങ്ങൾ വരാം. ഇത് പദ്ധതിയുടെ തുടക്കം മാത്രമാണ്. പെന്‍ഷന്‍ ഫണ്ട് റെഗുലേറ്ററി ആന്‍ഡ് ഡെവലപ്മെന്റ് അതോറിറ്റി 2013-ലെ ആക്ട് പ്രകാരം പദ്ധതി നിയന്ത്രിക്കും.

ബജറ്റിലെ മറ്റ് പ്രഖ്യാപനങ്ങൾ

യുവജനങ്ങള്‍ക്കായി നൈപുണ്യനയം, ഉന്നത വിദ്യാഭ്യാസ മേഖലയില്‍ 10 ലക്ഷം രൂപ വരെയുള്ള വിദ്യാഭ്യാസ വായ്പ തുടങ്ങിയ സുപ്രധാന തീരുമാനങ്ങളും ബജറ്റിലുണ്ട്. അതോടൊപ്പം ആദായ നികുതി സംബന്ധിച്ചും നിർണ്ണായക പ്രഖ്യാപനം ധനമന്ത്രി നടത്തി. മൂന്നുലക്ഷം രൂപ വരെ വാര്‍ഷിക വരുമാനമുള്ളവര്‍ക്ക് നികുതിയില്ല. മൂന്ന് മുതല്‍ ഏഴു ലക്ഷം രൂപവരെ വരുമാനത്തിന് അഞ്ച് ശതമാനവും ഏഴു മുതല്‍ പത്തു ലക്ഷം രൂപ വരെ വാര്‍ഷിക വരുമാനമുള്ളവര്‍ക്ക് 12 മുതല്‍ 15 ശതമാനം വരെയുമാകും ഇനി ആദായ നികുതി. 15 ലക്ഷത്തിന് മുകളിലാണ് വാര്‍ഷിക വരുമാനമെങ്കില്‍ ആദായനികുതി 30 ശതമാനമാകും.

തൊഴിലുമായി ബന്ധപ്പെട്ട ആനുകൂല്യങ്ങൾ നൽകുന്ന മൂന്ന് പുതിയ പദ്ധതികൾ ധനമന്ത്രി പ്രഖ്യാപിച്ചു. ഇപിഎഫിൽ എൻറോൾമെൻ്റ്, ആദ്യമായി ജോലി ചെയ്യുന്നവരെ അംഗീകരിക്കുന്നതിൽ ശ്രദ്ധ കേന്ദ്രീകരിക്കൽ, ജീവനക്കാർക്കും തൊഴിൽദാതാക്കൾക്കുമുള്ള പിന്തുണ തുടങ്ങിയ പുതിയ പദ്ധതികളാണ് 2024- 25 വർഷത്തെ കേന്ദ്ര ബജറ്റിൽ ധനമന്ത്രി നിർമ്മല സീതാരമൻ‌ പ്രഖ്യാപിച്ചത്.