കേന്ദ്ര ബജറ്റ് ഞാറാഴ്ച, ഈ ജനപ്രിയ പദ്ധതിയിൽ വലിയ മാറ്റങ്ങൾക്ക് സാധ്യത, നടന്നാൽ യുവാക്കളുടെ കീശ നിറയും

യുവാക്കൾക്ക് തൊഴിലവസരങ്ങളും പരിശീലനവും നൽകുന്നതിനുള്ള ഒരു പ്രധാന പദ്ധതിയാണ് ഇന്ത്യാ ഗവൺമെന്റ് നടപ്പിലാക്കുന്ന പ്രധാനമന്ത്രി ഇന്റേൺഷിപ്പ് പദ്ധതി (PMIS). അതേസമയം, 2026 ലെ കേന്ദ്ര ബജറ്റിൽ ഈ പദ്ധതിയിൽ എന്തെങ്കിലും മാറ്റങ്ങൾ ഉണ്ടാകുമോ എന്ന ചോദ്യം ഉയർന്നുവന്നിട്ടുണ്ട്. 2026 ലെ ബജറ്റിൽ പ്രധാനമന്ത്രി ഇന്റേൺഷിപ്പ് പദ്ധതിയിൽ വലിയ മാറ്റമുണ്ടാകുമെന്നാണ് സാമ്പത്തിക വിദഗ്ധർ പറയുന്നത്. പദ്ധതി പരിഷ്കരിക്കാൻ കോർപ്പറേറ്റ് കാര്യ മന്ത്രാലയം (MCA) പദ്ധതിയിട്ടിട്ടുണ്ട്. തൊഴിലന്വേഷകരുടെ പങ്കാളിത്തം വർദ്ധിപ്പിക്കുകയും കൂടുതൽ കമ്പനികളെ പരിശീലനം നൽകാൻ പ്രേരിപ്പിക്കുകയും ചെയ്യുക എന്നതാണ് ലക്ഷ്യം.

പദ്ധതിയുടെ വ്യാപ്തി, കുറഞ്ഞ പ്രായം, ഇന്റേൺഷിപ്പ് കാലയളവ് എന്നിവയിൽ മാറ്റങ്ങളുണ്ടാകും. ഫെബ്രുവരി 1-ന് ധനമന്ത്രി നിർമ്മല സീതാരാമൻ അവതരിപ്പിക്കുന്ന ബജറ്റിലാണ് ഈ പ്രതീക്ഷകളെല്ലാം കേന്ദ്രീകരിച്ചിരിക്കുന്നത്.

പിഎം ഇന്റേൺഷിപ്പ് സ്കീം

തൊഴിലന്വേഷകർക്കായി 2024 ലെ ബജറ്റിൽ പിഎം ഇന്റേൺഷിപ്പ് സ്കീം പ്രഖ്യാപിച്ചു. 5 വർഷത്തിനുള്ളിൽ മികച്ച 500 കമ്പനികളിലെ 1 കോടി യുവാക്കൾക്ക് ഇന്റേൺഷിപ്പ് അവസരങ്ങൾ നൽകുക എന്നതാണ് ഇതിന്റെ ലക്ഷ്യം.

സ്റ്റൈപ്പൻഡ് : പ്രതിമാസം 5000. ഇതിനുപുറമെ, 6000 രൂപയുടെ ഒറ്റത്തവണ ഗ്രാന്റും ഇൻഷുറൻസ് പരിരക്ഷയും നൽകും.

കുറഞ്ഞ പ്രായം: 21 വയസ്സ്

കാലാവധി: 6 മാസം

കമ്പനികൾ: നിലവിൽ 549 കമ്പനികൾ മാത്രമേ ഈ പദ്ധതിയിൽ ചേർന്നിട്ടുള്ളൂ.

2026 ലെ ബജറ്റിൽ ഈ പദ്ധതിയെക്കുറിച്ചുള്ള പ്രതീക്ഷകൾ എന്തൊക്കെ..?

സ്റ്റൈപ്പൻഡ് വർദ്ധനവ്: പ്രതിമാസം 5000 രൂപയിൽ നിന്ന് 11,800 രൂപയായി വർദ്ധിപ്പിക്കാൻ സാധ്യതയുണ്ടെന്ന് പറയപ്പെടുന്നു. ഇന്റേൺഷിപ്പിന് വരുന്നവരുടെ ജീവിതച്ചെലവുകൾക്ക് സഹായകമാകുന്നതിനായാണ് ഇത് നടപ്പിലാക്കാൻ പദ്ധതിയിട്ടിരിക്കുന്നത്.

കമ്പനികളുടെ വിപുലീകരണം: നിലവിലുള്ള 549 ൽ നിന്ന് 6,000 ആയി കമ്പനികളുടെ എണ്ണം വർദ്ധിപ്പിക്കുന്നതിനുള്ള പദ്ധതികൾ ആസൂത്രണം ചെയ്യുന്നു. ഇത് കൂടുതൽ അവസരങ്ങൾ നൽകുകയും ചെയ്യും.

കുറഞ്ഞ പ്രായപരിധിയിൽ കുറവ്: നിലവിലെ നിയമങ്ങൾ അനുസരിച്ച്, കുറഞ്ഞ പ്രായം 21 വയസ്സായി നിശ്ചയിച്ചിരിക്കുന്നു. എന്നിരുന്നാലും, ഇത് 18 വയസ്സായി കുറയ്ക്കുമെന്നാണ് സൂചന. ബിരുദം പൂർത്തിയാക്കിയവർക്കും ഇത് സഹായകരമാകും.

ഇന്റേൺഷിപ്പ് കാലയളവിലെ വർദ്ധനവ്: നിലവിലുള്ള ഇന്റേൺഷിപ്പ് കാലയളവ് 6 മാസത്തിൽ നിന്ന് 1 വർഷമായി വർദ്ധിപ്പിക്കുന്നതിനുള്ള ഒരു പദ്ധതി ആവിഷ്കരിച്ചിട്ടുണ്ട്.

ഈ പ്രതീക്ഷകളെല്ലാം 2026 ലെ ബജറ്റിൽ ഔദ്യോഗികമായി പ്രഖ്യാപിക്കപ്പെട്ടാൽ, അത് യുവാക്കൾക്ക് വലിയൊരു അവസരം നൽകും. രാജ്യത്തെ തൊഴിലില്ലായ്മ പ്രശ്നം കുറയ്ക്കുകയും നിരവധി ആളുകൾക്ക് ജോലി ലഭിക്കാൻ സഹായിക്കുകയും ചെയ്യും.

ബജറ്റ് 1-ആം തീയ്യതി

2026 ഫെബ്രുവരി ഒന്നിന് ധനമന്ത്രി നിർമലാ സീതാരാമൻ കേന്ദ്ര ബജറ്റ് അവതരിപ്പിക്കും. മൂന്നാം മോദി സർക്കാരിൻ്റെ രണ്ടാമത്തെ പൂർണ്ണ ബജറ്റാണിത്. ഒപ്പം, തുടർച്ചയായി 9 ബജറ്റുകൾ അവതരിപ്പിക്കുന്ന ധനമന്ത്രി എന്ന റെക്കോഡിലേക്കും നിർമല സീതാരാമൻ എത്തുകയാണ്. ഇത്തവണത്തെ ബജറ്റ് ദിവസത്തിനും പ്രത്യേതകതയുണ്ട്. ചരിത്രത്തിൽ ആദ്യമായി ബജറ്റ് അവതരണം ഞാറാഴ്ച നടക്കുന്നു എന്നതാണ് ആ പ്രത്യേകത.