വില 10 രൂപയിൽ താഴെ, ഓഹരി അപ്പർ സർക്യൂട്ടിലെത്തി: ഈ പെന്നി സ്റ്റോക്ക് വാങ്ങിയാലോ? നിക്ഷേപകർ ആവേശത്തിൽ

ഇന്ന് തുടർച്ചയായ മൂന്ന് ദിവസത്തെ ഇടിവിനു ശേഷം ഓഹരി വിപണി പോസിറ്റീവ് നേട്ടത്തോടെ മുന്നേറുന്നു. നിരവധി ഓഹരികൾ മികച്ച നേട്ടങ്ങൾ കൈവരിച്ചു. എന്നാൽ നിങ്ങൾ ഇപ്പോഴും കുറഞ്ഞ വിലയിൽ വാങ്ങിക്കൂട്ടാവുന്ന പെന്നി സ്റ്റോക്കുകൾക്കായി തിരയുകയാണോ? ഇന്നലെ മെയ് 20ന് മൈക്രോ-ക്യാപ് കമ്പനിയായ കൈസർ കോർപ്പറേഷൻ്റെ ഓഹരികളിൽ വൻതോതിലുള്ള വാങ്ങൽ താൽപ്പര്യം പ്രകടമായിരുന്നു. ഇതേ പ്രവണത ഇന്നും കാണുന്നു. ഇന്നത്തെ വിപണിയിലും കൈസർ കോർപ്പറേഷൻ ഓഹ​രികൾ കുതിപ്പിലാണ്.

ഇവി വിഭാഗത്തിലെ ഒരു കമ്പനിയുമായി ധാരണാപത്രം ഒപ്പുവച്ചതിനെത്തുടർന്നാണ് ഇന്നലെ ഈ ഓഹരികൾ കുതിച്ചത്. നിലവിൽ ഈ ഓഹരിയുടെ വില 6.96 രൂപയിലെത്തി അപ്പർ സർക്യൂട്ടിലേക്ക് എത്തിയിട്ടുണ്ട്. അതായത് 10 രൂപയിൽ താഴെയുള്ള ഓഹരികളാണ് ഇത്. ഇന്ന് 4.98 ശതമാനമാണ് ഓഹരികൾ കുതിച്ചത്.

നിലവിൽ ബിഎസ്ഇയിൽ 34.89 കോടി രൂപയാണ് കൈസർ കോർപ്പറേഷൻ്റെ വിപണി മൂലധനം. കൈസർ കോർപ്പറേഷൻ വാർഡ് വിസാർഡുമായി ധാരണാപത്രത്തിൽ ഒപ്പുവെച്ചതായി പ്രഖ്യാപിച്ചതിന് ശേഷമാണ് കൈസർ കോർപ്പറേഷൻ ഓഹരികൾ അപ്രതീക്ഷിത നേട്ടം കൈവരിച്ചത്. ഇതോടെ നിക്ഷേപകരെല്ലാം ഈ പെന്നി സ്റ്റോക്ക് വാരിക്കൂട്ടാനുള്ള തിരക്കിലായി. ഇന്നും ഇതിൻ്റെ തുടർച്ചയായി വില മുന്നേറുന്നു.

10 രൂപയിൽ താഴെയുള്ള പെന്നി സ്റ്റോക്ക് വാങ്ങിയാലോ?

ഇപ്പോൾ ഓഹരി വിപണിയിൽ കമ്പനിയുടെ ഓഹരികൾ 10 രൂപയിൽ താഴെയാണ് വ്യാപാരം നടത്തുന്നത്. ഇന്നലെ മെയ് 20ന് കൈസർ കോർപ്പറേഷൻ ഓഹരികൾ അപ്പർ സർക്യൂട്ടിൽ എത്തി 6.63 രൂപയിലാണ് ക്ലോസ് ചെയ്തത്. എന്നാൽ ഇന്ന് ഓഹരി വില രാവിലെ മുതൽ 6.95 രൂപയിൽ സ്ഥിരതയോടെ നിൽക്കുന്നു.

കഴിഞ്ഞ ഒരു ആഴ്ചയിൽ, ഈ പെന്നി സ്റ്റോക്ക് ഏകദേശം 3 ശതമാനം ഉയർന്നപ്പോൾ കഴിഞ്ഞ രണ്ടാഴ്ചയ്ക്കുള്ളിൽ ഏകദേശം 12 ശതമാനം വർധനവുണ്ടായി. കഴിഞ്ഞ മൂന്ന് മാസത്തിനുള്ളിൽ ഓഹരി വില 41 ശതമാനം ഉയർന്നെങ്കിലും കഴിഞ്ഞ ആറ് മാസത്തിനുള്ളിൽ 19 ശതമാനവും കഴിഞ്ഞ ഒരു വർഷത്തിനുള്ളിൽ 39 ശതമാനത്തിലധികവും ഇടിഞ്ഞു. ​1 രൂപയിൽ നിന്ന് 52 രൂപ വരെ ഈ ഓഹരികളുടെ വില ഉയർന്നിട്ടുണ്ട്.

കൈസർ കോർപ്പറേഷൻ-വാർഡ്‌വിസാർഡ് കരാർ

കൈസർ കോർപ്പറേഷന്റെ അനുബന്ധ സ്ഥാപനമായ സിക്കോൺ ഇന്റർനാഷണൽ, ഇലക്ട്രിക് വാഹന മേഖലയിലെ മുൻനിര നിർമ്മാതാക്കളായ വാർഡ് വിസാർഡ് ഇന്നൊവേഷൻ ആൻഡ് മൊബിലിറ്റിയുമായി ഒരു ധാരണാപത്രത്തിൽ ഏർപ്പെട്ടു. ധാരണാപത്രം അനുസരിച്ച് 2026 സാമ്പത്തിക വർഷത്തിലും 2027 സാമ്പത്തിക വർഷത്തിലും വാർഡ് വിസാർഡിൽ നിന്ന് 7,500 ഇലക്ട്രിക് സ്കൂട്ടറുകൾ സിക്കോൺ ഇന്റർനാഷണൽ പാട്ടത്തിന് നൽകും.

"മികച്ച ഗതാഗത പരിഹാരങ്ങളിലേക്കായി മുംബൈ, പൂനെ, അഹമ്മദാബാദ് എന്നിവിടങ്ങളിലെ വിവിധ ലോജിസ്റ്റിക്സിനും ലാസ്റ്റ്- മൈൽ ഡെലിവറി പങ്കാളികൾക്കും ഇത്തരം ഇവി വാഹനങ്ങൾ കൂടുതൽ പാട്ടത്തിന് നൽകാനാണ് ഉദ്ദേശിക്കുന്നത്. പുതിയ കരാറിലൂടെ കൈസർ കോർപ്പറേഷന്റെ അനുബന്ധ സ്ഥാപനത്തിന് 30 കോടി രൂപയുടെ വരുമാനം ലഭിക്കുമെന്ന് പ്രതീക്ഷിക്കുന്നു," എന്നാണ് കരാറിൽ വ്യക്തമാക്കുന്നത്.

കൈസർ കോർപ്പറേഷൻ ലിമിറ്റഡ്

ലേബലുകള്‍, ലേഖനങ്ങള്‍, മാഗസിനുകള്‍, കാര്‍ട്ടണുകള്‍ എന്നിവയുടെ പ്രിന്റിംഗ് ബിസിനസ് നടത്തുന്ന പ്രമുഖ ഇന്ത്യൻ കമ്പനിയാണ് കെസര്‍ കോര്‍പ്പറേഷന്‍ ലിമിറ്റഡ്. 1993ലാണ് കമ്പനി സ്ഥാപിതമായത്. എഞ്ചിനീയറിംഗ് ഗുഡ്സ്, ഇലക്ട്രിക് ഹീറ്റ് ട്രെയ്‌സിംഗ്, ടേൺകീ പ്രോജക്ടുകൾ എന്നിവയുടെ പ്രവർത്തനങ്ങളിലും കമ്പനി ഏർപ്പെട്ടിരിക്കുന്നു.