ഏഷ്യയിലെ കരുത്തുറ്റ വനിതകള്‍; ഫോര്‍ബ്‌സിന്റെ പട്ടികയില്‍ ദിവ്യ ഗോകുല്‍ നാഥും..ബൈജൂസിന്റെ കോ ഫൗണ്ടര്‍

ദില്ലി: ഏഷ്യയിലെ ഏറ്റവും കരുത്തരായ ബിസിനസ്സുകാരായ സ്ത്രീകളുടെ പട്ടിക ഫോര്‍ബ്‌സ് മാസിക തയ്യാറാക്കി. 25 പേരുടെ പട്ടികയാണ് ഇവര്‍ പുറത്തിറക്കിയിരിക്കുന്നത്. അതില്‍ അഞ്ച് പേര്‍ ഇന്ത്യക്കാരാണ്.

ബൈജൂസ് ആപ്പിന്റെ സഹ സ്ഥാപകയായ ദിവ്യ ഗോകുല്‍നാഥും ഈ പട്ടികയില്‍ ഇടം നേടിയിട്ടുണ്ട്. പട്ടികയില്‍ ഒമ്പതാം സ്ഥാനത്താണ് ദിവ്യ.

കാവന്‍വയുടെ സഹസ്ഥാപകയും സിഇഒയും ആയ മെലാനി പെര്‍കിന്‍സ് ആണ് പട്ടികയില്‍ ഒന്നാം സ്ഥാനത്ത്. നാലാം സ്ഥാനത്തുള്ള റോഷ്ണി നാടാര്‍ മല്‍ഹോത്ര ( ചെയര്‍ പേഴ്‌സണ്‍ എച്ച്‌സിഎല്‍ ടെക്‌നോളജീസ്- 4-ാം സ്ഥാനം), സാമന്ത ഡു (ഫൗണ്ടര്‍, ചെയര്‍മാന്‍ ആന്റ് സിഇഒ സായി ലാബ്- എട്ടാം സ്ഥാനം), ദിവ്യ ഗോകുല്‍നാഥ്, അമീറ ഷാ (എംഡി മെട്രോപൊളിസ് ഹെല്‍ത്ത് കെയര്‍-16-ാം സ്ഥാനം), വിനാതി സറഫ് മുത്രേജ (സിഇഒ ആന്‌റ് എംഡി വിനാറ്റി ഓര്‍ഗാനിക്‌സ, 23-ാം സ്ഥാനം) എന്നിവരാണ് പട്ടികയിലെ ഇന്ത്യക്കാര്‍.

ബൈജൂസ് ആപ്പിന്റെ സഹ സ്ഥാപകയായ ദിവ്യ ഗോകുല്‍നാഥ് ബജു രവീന്ദ്രന്റെ ഭാര്യ കൂടിയാണ്. ബൈജു രവീന്ദ്രനും സഹോദരന്‍ റിജു രവീന്ദരനും ദിവ്യ ഗോകുല്‍നാഥും ചേര്‍ന്നാണ് ബൈജൂസ് ആപ്പ് സ്ഥാപിച്ചത്. ആപ്പിന്റെ കണ്ടന്റ് മേഖല കൈകാര്യം ചെയ്യുന്നത് ദിവ്യയാണ്.ബൈജൂസിന്റെ വിജയത്തില്‍ വലിയ പങ്കാണ് ദിവ്യ വഹിച്ചിട്ടുള്ളത്.

ജിആര്‍ഇ പരിശീലനത്തിനായി ബൈജൂസ് അക്കാഡമിയില്‍ വിദ്യാര്‍ത്ഥിയായി എത്തിയ ആളാണ് ദിവ്യ. പിന്നീട് ഇവിടത്തെ അധ്യാപികയും ആയി. ജിആര്‍ഇ ക്ലിയര്‍ ചെയ്‌തെങ്കിലും അധ്യാപക ജോലിയില്‍ തുടരാന്‍ തീരുമാനിക്കുകയായിരുന്നു. പിന്നീടാണ് ബിജു രവീന്ദ്രനെ വിവാഹം കഴിയ്ക്കുന്നതും ബൈജൂസ് ആപ്പ് തുടങ്ങുന്നതും എല്ലാം.