നിങ്ങളുടെ ആരോഗ്യ ഇൻഷുറൻസ് പോളിസിയിൽ കൊറോണ ചികിത്സയ്‌ക്ക് പരിരക്ഷ ലഭിക്കുമോ?

ലോകാരോഗ്യ സംഘടന കൊറോണ വൈറസ് ഒരു പകർച്ചവ്യാധിയായി പ്രഖ്യാപിച്ചിട്ടുണ്ട്. രാജ്യത്തിന്റെ പല ഭാഗങ്ങളിലും കൊറോണ വൈറസ് റിപ്പോർട്ടുചെയ്‌തുകൊണ്ടിരിക്കുകയാണ്. ഈ സാഹചര്യത്തിൽ എല്ലാവർക്കും ഉണ്ടാവുന്ന സംശയമാണ് ആരോഗ്യ ഇന്‍ഷൂറൻസിൽ കൊറോണ വൈറസ് ചികിത്സയ്ക്ക് പരിരക്ഷ ലഭിക്കുമോയെന്ന്.

ഇന്ത്യയിലെ മിക്ക ആരോഗ്യ ഇൻഷുറൻസ് പോളിസികളും കൊറോണ വൈറസിന് പരിരക്ഷ നൽകുന്നുണ്ട്. ആശുപത്രിയിൽ പ്രവേശിപ്പിക്കുന്ന കേസുകളിൽ കോവിഡ്-19 അനുബന്ധ ക്ലെയിമുകൾ വേഗത്തിൽ പ്രോസസ്സ് ചെയ്യാൻ ഇൻഷുറൻസ് റെഗുലേറ്ററി ആൻഡ് ഡവലപ്മെന്റ് അതോറിറ്റി ഓഫ് ഇന്ത്യ (ഐആർഡിഎഐ) നിർദ്ദേശിച്ചിട്ടുണ്ട്. റെഗുലർ ആരോഗ്യ ഇൻഷൂറൻസ് പോളിസി ഉള്ളവർക്ക് ഈ പ്രക്രീയ ലളിതമാക്കാൻ സാധ്യതയുണ്ട്.

കൊറോണ വൈറസ് ചികിത്സയ്ക്കായി ക്ലെയിം ചെയ്യാൻ കഴിയുന്ന ചില സാഹചര്യങ്ങൾ ഇവയാണ്;

കുറഞ്ഞത് 24 മണിക്കൂറെങ്കിലും രോഗിയെ ആശുപത്രിയിൽ കിടത്തി ചികിത്സിച്ചാൽ : കോവിഡ്-19 കാരണം കുറഞ്ഞത് 24 മണിക്കൂറെങ്കിലും രോഗിയെ ആശുപത്രിയിൽ കിടത്തി ചികിത്സിച്ചാൽ മാത്രമേ നിങ്ങൾക്ക് ഇത് ക്ലെയിം ചെയ്യാൻ കഴിയൂ. രോഗം പകർച്ചവ്യാധിയോ സാംക്രമിക രോഗമോ ആയി പ്രഖ്യാപിക്കുകയാണെങ്കിൽ:

കോവിഡ്-19 രോഗം ഒരു പകർച്ചവ്യാധിയോ സാംക്രമിക രോഗമോ ആയി ലോകാരോഗ്യ സംഘടന പ്രഖ്യാപിച്ചതിനാൽ നിങ്ങളുടെ ഇൻഷുറർ നിങ്ങളുടെ ആരോഗ്യ ഇൻഷുറൻസ് പോളിസി പ്രകാരം ക്ലെയിം ചെയ്യാനും ചെയ്യാതിരിക്കാനും സാധ്യതയുണ്ട്. കാരണം ചില പോളിസികൾക്ക് പകർച്ചവ്യാധികൾ ഉൾക്കൊള്ളാതിരിക്കാനുള്ള വ്യവസ്ഥകളുണ്ട്. അതിനാൽ കോവിഡ്-19 നിങ്ങളുടെ പോളിസിയിൽ ഉൾപ്പെടുന്നുണ്ടോയെന്ന് നിങ്ങളുടെ ഇൻഷൂററിനോട് ചോദിച്ച് മനസ്സിലാക്കുക. കൂടാതെ പോളിസി രേഖൾ വായിക്കുകയും നിങ്ങളുടെ ആരോഗ്യ ഇൻ‌ഷുററുമായി ഉടനെ ബന്ധപ്പെടുകയും വേണം.

 

പ്രത്യേക പോളിസികൾ തയ്യാറാക്കാൻ നിർദ്ദേശിച്ചു

കൊറോണ വൈറസ് ബാധയുടെ ചികിത്സാ ചെലവും വഹിക്കുന്ന തരത്തിലുള്ള പോളിസികള്‍ ഡിസൈന്‍ ചെയ്യാൻ ഐആര്‍ഡിഎഐ അവരുടെ സര്‍ക്കുലറില്‍ ഇന്‍ഷൂറന്‍സ് കമ്പനികളോട് ആവശ്യപ്പെട്ടിരുന്നു. വിവിധ വിഭാഗത്തിലുള്ള ആളുകളുടെ ആരോഗ്യ ഇന്‍ഷൂറന്‍സ് ആവശ്യങ്ങള്‍ മുന്‍ നിര്‍ത്തി കൊറോണ ചികിത്സക്കുള്ള ചെലവും ഉള്‍പ്പെടുത്തി പുതിയ പോളിസികള്‍ വികസിപ്പിക്കാനാണ് ആവശ്യപ്പെട്ടിരുന്നത്.

രോഗം സ്ഥിരീകരിച്ച ശേഷമെടുക്കുന്ന പോളിസികളുടെ ക്ലെയിം നിരസിക്കപ്പെടും

അപ്രതീക്ഷിത രോഗങ്ങള്‍ വന്നാല്‍ ചികിത്സാ ചെലവ് വഹിക്കാനാണ് ആരോഗ്യ ഇന്‍ഷൂറന്‍സ് പോളിസികള്‍. അതിനാൽ തന്നെ രോഗനിര്‍ണയത്തിന് ശേഷം പോളിസിയെടുത്താല്‍ ക്ലെയിം നിരസിക്കപ്പെടും.