സിഗരറ്റ് വില കുതിച്ചുയര്‍ന്നു; ഒരു പായ്ക്കറ്റിന് ഇപ്പോള്‍ എത്ര വിലവരും?

എക്സൈസ് തീരുവ വര്‍ദ്ധിപ്പിച്ചതിനെത്തുടര്‍ന്ന് രാജ്യമെമ്പാടും സിഗരറ്റ് വില കുതിച്ചുയര്‍ന്നു. 10 സ്റ്റിക്കുകളുള്ള സാധാരണ പായ്ക്കറ്റിന് 22 മുതല്‍ 25 രൂപ വരെയും പ്രീമിയം പായ്ക്കിന് 50 മുതല്‍ 55 രൂപ വരെയുമാണ് വില വര്‍ദ്ധന.

ഒരു പായ്ക്കറ്റിന് എത്ര വിലവരും?
ജനപ്രിയ ഇടത്തരം സിഗരറ്റായ വില്‍സ് നേവി കട്ടിന്റെ (76 മില്ലീമീറ്റര്‍ നീളം) വില പായ്ക്കറ്റിന് 95 രൂപയായിരുന്നത് 120 രൂപയായി. വില്‍സ് ക്ലാസിക്, വില്‍സ് ക്ലാസിക് മൈല്‍ഡ്‌സ്, ഗോള്‍ഡ് ഫ്‌ലേക്ക് ലൈറ്റ്‌സ് തുടങ്ങിയ വലിയ സിഗരറ്റുകളുടെ പായ്ക്കിന് 220 -225 രൂപയും 20 സ്റ്റിക്കുകളുള്ള ക്ലാസിക് കണക്ടിന് (97 മില്ലീമീറ്റര്‍ നീളം) 350 രൂപയുമാണ് വില. ഇത് നേരത്തെ യഥാക്രമം 170 രൂപയും 300 രൂപയുമായിരുന്നു.

രാജ്യത്ത് നിലവില്‍ 8,000 മുതല്‍ 9000 വരെ സിഗരറ്റ്, പുകയില സ്റ്റോക്കിസ്റ്റുകളുണ്ട്. എങ്കിലും വില വര്‍ദ്ധനവ്, കള്ളക്കടത്തിനും വ്യാജ ഉത്പന്ന വ്യാപനത്തിനും കാരണമാകുമെന്ന്‌
വിതരണക്കാര്‍ ഭയക്കുന്നു. പുതുക്കിയ എംആര്‍പിയോട് കൂടിയ പായ്ക്കറ്റുകള്‍ ഈ മാസം അവസാനത്തോടെയാണ് എത്തുക.

ഹാനികരമായ ഉത്പന്നങ്ങള്‍ക്ക് മേലുള്ള അമിത നികുതി ചില്ലറ വില്‍പന സംവിധാനത്തെ തകര്‍ക്കുമെന്ന് എഐസിപിഡിഎഫ് മുന്നറിയിപ്പുനല്‍കി. ചില്ലറ വ്യാപാരികള്‍ ഓണ്‍ലൈന്‍, ഇ-കൊമേഴ്‌സ് പ്ലാറ്റ്‌ഫോമുകളില്‍ നിന്നും കടുത്ത മത്സരം നേരിടുന്നു. അതിനിടയിലാണ് പുതിയ നികുതി നടപ്പിലായത്. ഇത് ചില്ലറ വില്‍പന സംവിധാനത്തെ ബാധിക്കും. 4.5 ലക്ഷത്തിലധികം വിതരണക്കാരേയും 1.3 കോടിയിലധികം ജനറല്‍ സ്‌റ്റോറുകളേയും പ്രതിനിധീകരിക്കുന്ന സംഘടനയാണ് എഐസിപിഡിഎഫ്.

പുതിയ എക്‌സൈസ് തീരുവകള്‍
സിഗരറ്റിനും പുകയില ഉത്പന്നങ്ങള്‍ക്കും അധിക എക്‌സൈസ് തീരുവയും പാന്‍മസാലയ്ക്ക് ആരോഗ്യ സെസും ഫെബ്രുവരി 1 മുതല്‍ ഈടാക്കി തുടങ്ങി. 40 ശതമാനം ജിഎസ്ടി നിരക്കിന് പുറമെയാണിത്. ഇതോടെ ഫില്‍റ്റര്‍ ചെയ്യാത്ത ചെറിയ സിഗരറ്റ് സ്റ്റിക്കിന് 2.05 രൂപയും ഷോര്‍ട്ട് ഫില്‍റ്റര്‍ സിഗരറ്റ് സ്റ്റിക്കിന് 2.10 രൂപയും ഇടത്തരം നീളമുള്ള (65-70 മില്ലിമീറ്റര്‍) സ്റ്റിക്കിന് 3.6 മുതല്‍ 4 രൂപ വരെയും 70-75 മില്ലിമീറ്റര്‍ നീളമുള്ള (പ്രീമിയം) സ്റ്റിക്കിന് 5.4 രൂപയും അധിക തീരുവ നിലവില്‍ വന്നു.