ബജറ്റ് ദിവസം ഇരുട്ടടി, വാണിജ്യ എൽപിജി സിലിണ്ടറുകളുടെ വില കൂട്ടി, പുതുക്കിയ നിരക്ക് അറിയാം

കേന്ദ്ര ബജറ്റ് അവതരിപ്പിക്കാൻ മണിക്കൂറുകൾ മാത്രം ബാക്കി നിൽക്കെ ജനങ്ങൾക്ക് ഇരുട്ടടി. രാജ്യത്തെ പാചക വാതക സിലിണ്ടറിന്‍റെ വില വീണ്ടും ഉയർന്നു. 19 കിലോഗ്രാം വാണിജ്യ എൽപിജി സിലിണ്ടറിന് 49 രൂപയുടെ വർധനയാണ് ഉണ്ടായിരിക്കുന്നത്. ഇതോടെ സിലിണ്ടറിന്‍റെ പഴയ വിലയായ 1698 രൂപയിൽ നിന്ന് 1747 രൂപയായി ഉയർന്നു. ഹോട്ടലുകൾ, റെസ്റ്റോറന്റുകൾ, മറ്റ് വാണിജ്യ സ്ഥാപനങ്ങൾ എന്നിവിടങ്ങളിലാണ് വാണിജ്യ എൽപിജി സിലിണ്ടറുകൾ ഉപയോഗിക്കുന്നത്. അതുകൊണ്ടുതന്നെ വിലയിലെ വർദ്ധനവ് ഈ മേഖലകൾക്ക് തിരിച്ചടിയാണ്.

വില വർധന തുടർന്നാൽ ഹോട്ടൽ ഭക്ഷണങ്ങളുടെ വില കൂടാനും, ചെറിയ ഭക്ഷ്യ സംരംഭങ്ങൾ അധിക ചെലവ് ഉപഭോക്താക്കളെ ബാധിക്കാനും സാധ്യതയുണ്ടെന്ന് വ്യാപാര സംഘടനകൾ മുന്നറിയിപ്പ് നൽകുന്നു. അതേസമയം ഗാർഹിക എൽപിജി സിലിണ്ടറുകളുടെ വിലയിൽ മാറ്റമില്ല. 2025 ഏപ്രിൽ 8-നാണ് അവസാനമായി ഗാർഹിക എൽപിജി സിലിണ്ടറുകളുടെ വിലയിൽ മാറ്റമുണ്ടായത്.

നഗരത്തിലെ പുതിയ വില

ഇന്ത്യൻ ഓയിലിന്‍റെ ഔദ്യോഗിക വെബ്‌സൈറ്റ് പ്രകാരം, ഫെബ്രുവരി 1 മുതൽ ഡൽഹിയിൽ 19 കിലോഗ്രാം വാണിജ്യ എൽപിജി സിലിണ്ടറിന് 1,740.50 രൂപയായിരിക്കും. മുംബൈയിൽ പുതുക്കിയ വില 1,692 രൂപയാണ്. കൊൽക്കത്തയിൽ വില 1,844.50 രൂപയായി ഉയർന്നപ്പോൾ, ചെന്നൈയിൽ ഇപ്പോൾ 1,899.50 രൂപയായി. കേരളത്തിൽ എറണാകുളത്ത് 1747 രൂപയാണ് വില.

രാജ്യത്തെ എണ്ണ വിപണന കമ്പനികൾ എല്ലാ മാസവും ആദ്യ ദിവസം എൽപിജി സിലിണ്ടറുകളുടെ വില പരിഷ്കരിക്കുന്നു. 2026 ജനുവരിയിൽ 19 കിലോഗ്രാം വാണിജ്യ എൽപിജി സിലിണ്ടറുകളുടെ വില 111 രൂപ വർദ്ധിപ്പിച്ചിരുന്നു. എന്നാൽ കഴിഞ്ഞ വർഷം നവംബർ, ഡിസംബർ മാസങ്ങളിൽ വില കുറഞ്ഞിരുന്നു. ഒക്ടോബറിന് മുമ്പ്, വാണിജ്യ എൽപിജി സിലിണ്ടറുകളുടെ വില തുടർച്ചയായി ആറ് മാസത്തേക്ക് കുറഞ്ഞിരുന്നു.

അതേസമയം, കഴിഞ്ഞാഴ്ചയുമായി താരതമ്യം ചെയ്യുമ്പോൾ എണ്ണവില ഉയർന്നിട്ടുണ്ട്. അഞ്ച് ശതമാനം വില വർധനവാണ് അന്താരാഷ്ട്ര വിപണിയിൽ രേഖപ്പെടുത്തിയത്. 68.53 ഡോളറായാണ് വില ഉയർന്നത്. വെസ്റ്റ് ടെക്സാസ് ഇന്റർമീഡിയേറ്റ് ക്രൂഡോയിലിന്റെ വില 5.1 ശതമാനം ഉയർന്നു. 64.33 ഡോളറായാണ് വില ഉയർന്നത്. മിഡിൽ ഈസ്റ്റിൽ ഉടലെടുത്ത സംഘർഷ സാഹചര്യമാണ് എണ്ണവില ഉയരാനുള്ള പ്രധാന കാരണം.