സംരംഭകർക്ക് സന്തോഷ വാർത്ത, ഇന്ത്യയിലെ സ്റ്റാർട്ടപ്പുകളെ പിന്തുണയ്ക്കുന്നതിനായി പുതിയ പോർട്ടൽ

സ്റ്റാർട്ടപ്പുകളുടെ സാമ്പത്തിക ആവശ്യങ്ങൾ പരിഗണിക്കുന്നതിന് കേന്ദ്രീകൃത പ്ലാറ്റ്‌ഫോം സ്ഥാപിക്കാൻ സർക്കാർ നീക്കം. അതിനായി പൊതുമേഖലാ ബാങ്കുകളെ ഉൾപ്പെടുത്തിയാണ് കേന്ദ്രീകൃത പ്ലാറ്റ്‌ഫോം തയ്യാറാക്കുക. ഒക്ടോബറോടെ പ്ലാറ്റ്ഫോൺ പ്രവർത്തനക്ഷമമാക്കാനാണ് തീരുമാനം. അതോടെ സ്റ്റാർട്ടപ്പ് അപേക്ഷകൾ, വായ്പാ അംഗീകാരങ്ങൾ, ക്രോസ്-ലെൻഡിംഗ്, വിവരങ്ങൾ പങ്കിടൽ എന്നിവ പൊതുമേഖലാ ബാങ്കുകൾക്ക് ലളിതമാകും. വായ്പാ കാര്യക്ഷമതയും സ്റ്റാർട്ടപ്പുകൾക്കുള്ള പിന്തുണയും മെച്ചപ്പെടുത്തുക എന്നതാണ് ലക്ഷ്യം.

വായ്പാ അനുമതിക്കും അംഗീകാരത്തിനുമായി ഈ പോർട്ടൽ പൂർണ്ണമായും ഡിജിറ്റൽ പ്രക്രിയ ഉറപ്പാക്കുമെന്ന് ഒരു ബാങ്ക് എക്സിക്യൂട്ടീവ് എടുത്തുപറഞ്ഞു. ജൻ സമർഥ് പോർട്ടലുമായി ഇത് സംയോജിപ്പിക്കാനുള്ള പദ്ധതികൾ പുരോഗമിക്കുകയാണ്. പിഎസ്ബി അലയൻസ് കൈകാര്യം ചെയ്യുന്ന ഈ പ്ലാറ്റ്ഫോം ബാങ്കുകൾ തമ്മിലുള്ള സഹകരണം വർദ്ധിപ്പിക്കുകയാണ് ലക്ഷ്യമിടുന്നത്. 2024-25 ൽ പിഎസ്ബികൾ സ്റ്റാർട്ടപ്പുകൾക്ക് 956 കോടി രൂപയുടെ വായ്പകൾ നൽകി.

ബാങ്ക് ഒരു പുതിയ സ്റ്റാർട്ടപ്പ് വായ്പാ നയം ആരംഭിച്ചിട്ടുണ്ടെന്ന് പഞ്ചാബ് നാഷണൽ ബാങ്ക് ചീഫ് എക്സിക്യൂട്ടീവ് ഓഫീസർ അശോക് ചന്ദ്ര ഇതിനോട് പ്രതികരിച്ചത്. "രാജ്യത്തുടനീളമുള്ള ഏഴ് കേന്ദ്രങ്ങളിൽ ഞങ്ങൾ സ്റ്റാർട്ടപ്പ് ഹബ്ബുകൾ സൃഷ്ടിച്ചിട്ടുണ്ട്, കൂടാതെ ഐഐടി മുംബൈ, കാൺപൂർ, ചെന്നൈ, ഡൽഹി എന്നിവിടങ്ങളിലെ ഒന്നിലധികം ഇൻകുബേഷൻ സെന്‍ററുകളുമായി ധാരണാപത്രങ്ങൾ ഉണ്ടാക്കാൻ പോകുകയാണ്," അദ്ദേഹം കൂട്ടിച്ചേർത്തു.

വിദ്യാഭ്യാസ സ്ഥാപനങ്ങളുമായും ഇൻകുബേഷൻ സെന്ററുകളുമായും സഹകരിക്കാൻ സർക്കാർ പൊതുമേഖലാ ബാങ്കുകളോട് നിർദ്ദേശിച്ചിട്ടുണ്ട്. ഔപചാരിക ബാങ്കിംഗ് ബന്ധങ്ങൾ സ്ഥാപിക്കുന്നതിനായി പ്രാരംഭ ഘട്ട സ്റ്റാർട്ടപ്പുകളെ തിരിച്ചറിയുകയും നിരീക്ഷിക്കുകയും ചെയ്യുക എന്നതാണ് ഈ പങ്കാളിത്തത്തിന്റെ ലക്ഷ്യം. വളർന്നുവരുന്ന സംരംഭകർക്കുള്ള പിന്തുണാ സംവിധാനം വർദ്ധിപ്പിക്കാൻ ഇത്തരം സഹകരണങ്ങൾ സഹായിക്കുമെന്നാണ് പ്രതീക്ഷയെന്നും അധികൃതർ വ്യക്തിമാക്കി.

ജൂണിൽ നടന്ന അവലോകന യോഗത്തിന് ശേഷം, അടുത്ത ദശകത്തിൽ ഉയർന്നുവരുന്ന വാണിജ്യ വളർച്ചാ മേഖലകൾ മുൻകൂട്ടി തിരിച്ചറിയാൻ ധനമന്ത്രി നിർമ്മല സീതാരാമൻ ബാങ്കുകളോട് ആവശ്യപ്പെട്ടു. ശക്തമായ അണ്ടർറൈറ്റിംഗ്, റിസ്ക്-മാനേജ്മെന്റ് മാനദണ്ഡങ്ങൾ നിലനിർത്തിക്കൊണ്ട് ഉൽപ്പാദന മേഖലകളിൽ കോർപ്പറേറ്റ് വായ്പകൾ കൂടുതൽ ആഴത്തിലാക്കണമെന്നും മന്ത്രി വ്യക്തമാക്കി.

പൊതുമേഖലാ ബാങ്കുകൾ തമ്മിലുള്ള സഹകരണത്തിലൂടെയും സുഗമമായ പ്രക്രിയകളിലൂടെയും സാമ്പത്തിക സ്രോതസ്സുകളിലേക്ക് എളുപ്പത്തിൽ പ്രവേശനം നൽകുന്നതിലൂടെ ഇന്ത്യയുടെ സ്റ്റാർട്ടപ്പ് മേഖലയെ ശക്തിപ്പെടുത്തുക എന്ന വിശാലമായ തന്ത്രമാണ് ഈ സംരംഭം പ്രതിഫലിപ്പിക്കുന്നത്. വായ്പാ അനുമതികൾ വേഗത്തിലാക്കാനും അതുവഴി സ്റ്റാർട്ടപ്പുകൾക്ക് വായ്പ നൽകുന്നത് വർദ്ധിപ്പിക്കാൻ ബാങ്കുകളെ പ്രോത്സാഹിപ്പിക്കാനും പോർട്ടൽ സഹായിക്കുമെന്ന് പ്രതീക്ഷിക്കുന്നു.