കൊവിഡ് കേസുകള്‍ കുതിക്കുന്നു; ഇന്ത്യയിലെ ഉല്‍പ്പാദനം ഹീറോ മോട്ടോകോര്‍പ്പ് താല്‍ക്കാലികമായി നിര്‍ത്തി

നിര്‍മാണ പ്ലാന്റുകളില്‍ ആവശ്യമായ അറ്റകുറ്റപ്പണികള്‍ നടത്താന്‍ ഈ അടച്ചുപൂട്ടല്‍ ദിവസങ്ങള്‍ ഉപയോഗപ്പെടുത്തുമെന്ന് കമ്പനി അറിയിച്ചു.ഈ പാദത്തിന്റെ ശേഷിക്കുന്ന സമയത്ത് ഉല്‍പാദന നഷ്ടം നികത്തുമെന്നും കമ്പനി പറയുന്നു. ഹ്രസ്വകാല അടച്ചുപൂട്ടലിന് ശേഷം എല്ലാ പ്ലാന്റുകളും നേരത്തേത് പോലെ പ്രവര്‍ത്തനമാരംഭിക്കുമെന്നും കമ്പനി വ്യക്തമാക്കി. നിലവിലെ സാഹചര്യം കണക്കിലെടുത്ത് ഏപ്രില്‍ 22 മുതല്‍ മേയ് ഒന്ന് വരെയാണ് അടച്ചുപൂട്ടലുണ്ടാകുക.

ഹീറോ മോട്ടോകോര്‍പ്പിന്റെ എല്ലാ കോര്‍പ്പറേറ്റ് ഓഫീസുകളും ഇതിനകം വര്‍ക്ക് ഫ്രം ഹോം (ഡബ്ല്യുഎഫ്എച്ച്) മോഡിലാണ്, അവശ്യ സേവനങ്ങളുടെ തുടര്‍ച്ചയ്ക്കായി വളരെ പരിമിതമായ ജീവനക്കാര്‍ റൊട്ടേഷന്‍ അടിസ്ഥാനത്തില്‍ ഓഫീസുകളില്‍ എത്തുന്നുണ്ട്. ഹീറോ മോട്ടോകോര്‍പ്പിന് നിലവില്‍ ഇന്ത്യയില്‍ അഞ്ച് നിര്‍മാണ പ്ലാന്റുകളാണുള്ളത്. ഹരിദ്വാര്‍ (ഉത്തരാഖണ്ഡ്), ധരുഹേര (ഹരിയാന), നീമ്രാന (രാജസ്ഥാന്‍), വഡോദര (ഗുജറാത്ത്), ഗുഡ്ഗാവ് (ഹരിയാന) എന്നിവിടങ്ങളിലാണ് ഇവ സ്ഥിതി ചെയ്യുന്നത്.