ഫ്ലൈറ്റ് ടിക്കറ്റുകൾ ബുക്ക് ചെയ്തവർ ഉടൻ ചെയ്യേണ്ടതെന്ത്? തീർച്ചയായും അറിഞ്ഞിരിക്കണം ഇക്കാര്യങ്ങൾ

കൊറോണ വൈറസ് ഭീതിയിൽ വിമാനയാത്രകളെല്ലാം ഒഴിവാക്കേണ്ട അവസ്ഥയിലാണ് ടിക്കറ്റ് ബുക്ക് ചെയ്ത യാത്രക്കാര്‍. കുറഞ്ഞ നിരക്കിൽ ടിക്കറ്റുകൾ ലഭിക്കുന്നതിനാൽ മുമ്പേ തന്നെ ബുക്ക് ചെയ്‌തവരാണ് പ്രതിസന്ധിയിലായത്. ഒപ്പം നിരവധി ഫ്ലൈറ്റുകൾ വിമാന കമ്പനികൾ ക്യാൻസൽ ചെയ്‌തിട്ടുമുണ്ട്. ചൈന, സിങ്കപ്പുര്‍, തായിലൻഡ് തുടങ്ങിയ റൂട്ടുകളിലാണ് പ്രധാനമായും കൂടുതൽ ഫ്ലൈറ്റുകൾ റദ്ദാക്കിയിരിക്കുന്നത്. പല രാജ്യങ്ങളിൽ നിന്നുള്ള യാത്രക്കാർ ഇന്ത്യയിലേക്ക് വരുന്നതും വിലക്കിയിട്ടുണ്ട്.

ലോകാരോഗ്യ സംഘടന കോവിഡ്-19 മാഹാമാരിയായി പ്രഖ്യാപിച്ചതോടെ ഇന്ത്യയിലെ വ്യോമയാന മന്ത്രാലയം ബുക്കിംഗ് റീ ഷെഡ്യൂളിങ് ചാര്‍ജുകള്‍ ഒഴിവാക്കി നല്‍കാന്‍ വിമാനക്കമ്പനികളോട് അഭ്യര്‍ഥിച്ചിരുന്നു. ഇത് ഏകദേശം എല്ലാ കമ്പനികളും അംഗീകരിച്ചിട്ടുണ്ട്. എയർ ഇന്ത്യ ഉൾപ്പെടെയുള്ള വിമാന കമ്പനികൾ റീബുക്കിംഗ് ചാർജിന്റെ ആനുകൂല്യം പ്രഖ്യാപിച്ചതിനാൽ തന്നെ, നിങ്ങൾ പ്ലാൻ ചെയ്ത യാത്രകൾ കൊറോണ വൈറസ് കാലത്ത് പരമാവധി ഒഴിവാക്കുക. നിലവിൽ കാൻസലേഷൻ ഒരു വിമാന കമ്പനിയും സൗജന്യമാക്കിയിട്ടില്ല. അതുകൊണ്ട് നിങ്ങൾ പ്ലാൻ ചെയ്‌ത യാത്ര റദ്ദാക്കാതെ റീഷെഡ്യൂൾ ചെയ്യുന്നതാണ് നല്ലത്.

നിങ്ങൾ ഇനിപ്പറയുന്ന വിമാന കമ്പനികളിൽ വഴിയാണ് ടിക്കറ്റ് ബുക്ക് ചെയ്‌തതെങ്കിൽ, ഈ കാര്യങ്ങൾ തീർച്ചയായും അറിഞ്ഞിരിക്കണം.

ഇൻഡിഗോ: നിങ്ങൾ ഇൻഡിഗോ മുഖേനയാണ് യാത്ര ആസൂത്രണം ചെയ്‌തതെങ്കിൽ, ടിക്കറ്റുകൾ റീഷെഡ്യൂൾ ചെയ്യാനുള്ള സൗകര്യമുണ്ട്. 2020 മാർച്ച് 31-നോ അതിനുമുമ്പോ ടിക്കറ്റ് ബുക്ക് ചെയ്‌ത യാത്രക്കാർക്ക് യാതൊരു നിരക്കും കൂടാതെ ടിക്കറ്റ് റീഷെഡ്യൂൾ ചെയ്യാം. നിങ്ങളുടെ യാത്ര തീയതിയുടെ മൂന്ന് ദിവസം മുമ്പെങ്കിലും ഇത് ചെയ്യണം.

ഗോ എയർ: മാർച്ച് 1-നും ഏപ്രിൽ 15-നും ഇടയിൽ ടിക്കറ്റ് ബുക്ക് ചെയ്ത യാത്രക്കാർ ടിക്കറ്റ് റദ്ദാക്കുകയോ റീഷെഡ്യൂൾ ചെയ്യുകയോ ചെയ്യണമെന്ന് നിർബന്ധമില്ല. കാരണം അടുത്ത ഒരു വർഷത്തിനുള്ളിൽ ചെയ്യുന്ന ഏതെങ്കിലും പുതിയ ബുക്കിംഗിൽ യാത്രക്കാർക്ക് ഈ ടിക്കറ്റ് നിരക്ക് റിഡീം ചെയ്യാനുള്ള സൗകര്യം കമ്പനി നൽകുന്നതാണ്.

സ്‌പൈസ് ജെറ്റ്: സ്‌പൈസ് ജെറ്റിനൊപ്പമാണ് നിങ്ങളുടെ യാത്ര ആസൂത്രണം ചെയ്‌തിരുന്നതെങ്കിൽ, 2020 മാർച്ച് 12-നും 31-നും ഇടയിൽ യാത്ര റീഷെഡ്യൂൾ ചെയ്യാൻ നിരക്കൊന്നും കമ്പനി ഈടാക്കില്ല.

എയർ ഏഷ്യ: എയർ ഏഷ്യയുടെ എല്ലാ ഡൊമസ്റ്റിക്ക് നെറ്റ്‌വർക്കിലെ ടിക്കറ്റുകളും 2020 മാർച്ച് 31 വരെ സൗജന്യമായി റീ ഷെഡ്യൂൾ ചെയ്യാവുന്നതാണ്.