സ്വർണം ഒഴുകുന്ന നദികൾ, 2 എണ്ണം നമ്മുടെ രാജ്യത്താണ്, ആർക്കുവേണമെങ്കിലും പൊന്നെടുക്കാം...

നിങ്ങൾ ഒരു നദിയുടെ തീരത്ത് നിൽക്കുന്നതായി സങ്കൽപ്പിക്കുക. വെള്ളം സൂര്യപ്രകാശത്തിൽ തിളങ്ങുന്നു. നദിയിലേക്ക് നോക്കുന്ന നിങ്ങൾ കാണുന്നത് ചെറിയ ചെറിയ സ്വർണത്തരികൾ ആണെങ്കിലോ.. ഇത് ഏതെങ്കിലും യക്ഷി കഥയിലെ ഭാഗങ്ങളാണെന്ന് കരുതരുത്, യാഥാർത്ഥ്യമാണ്. അമേരിക്കയിലെ മിസോറി, ഇന്ത്യയിലെ സുബർണരേഖ, ദാമോദർ തുടങ്ങിയ നദികളിൽ വെള്ളത്തിനൊപ്പം സ്വർണവും ഒഴുകുന്നുണ്ട്. തലമുറകളായി പ്രദേശ വാസികൾ ഈ സ്വർണം ഖനനം ചെയ്യുകയും ചെയ്യുന്നു. നദിയിലെ മണലിൽ നിന്ന് പൊടിസ്വർണ്ണം വേർതിരിച്ചെടുക്കുന്ന 'പ്ലേസർ മൈനിങ്' രീതി ഇന്നും ചില പ്രദേശങ്ങളിൽ നിലനിൽക്കുന്നു. സ്വർണം ഒഴുകുന്ന നദികളുടെ കൂടുതൽ വിശേഷങ്ങൾ നമുക്ക് അറിയാം.

1. യൂബ നദി: കാലിഫോർണിയയുടെ സ്വർണ്ണ പൈതൃകം

കാലിഫോർണിയയിലെ യൂബ നദി സ്വർണവേട്ടയിലെ തിളങ്ങുന്ന ഏടാണ്. 1850 മുതൽ നദിയുടെ താഴ്ന്ന ഭാഗങ്ങളും അതിന്‍റെ പോഷകനദികളും വിപുലമായ സ്വർണ്ണ ഖനന പ്രവർത്തനങ്ങൾക്ക് സാക്ഷ്യം വഹിച്ചു. ഇപ്പോഴും പരമ്പരാഗത വഴികൾ ഉപയോഗിച്ച് പ്രദേശവാസികൾ യൂബ നദിയിൽ നിന്നും സ്വർണം വേർതിരിച്ചെടുക്കുന്നുണ്ട്.

2. ക്ലോണ്ടൈക്ക് നദി: സ്വർണവേട്ടയുടെ ഹൃദയം

കാനഡയിലെ യൂക്കോൺ പ്രദേശത്തുള്ള ക്ലോണ്ടൈക്ക് നദി 1890 കളുടെ അവസാനത്തിൽ നടന്ന ക്ലോണ്ടൈക്ക് സ്വർണ്ണ ഖനനത്തിന് പേരുകേട്ടതാണ്. 1896 ൽ സ്വർണ്ണം കണ്ടെത്തിയതിനെ തുടർന്ന് ഖനനക്കാരുടെ ഒരു വലിയ പ്രവാഹം ഉണ്ടായി. ചരിത്രത്തിലെ ഏറ്റവും പ്രശസ്തമായ സ്വർണ്ണ ഖനനങ്ങളിലൊന്നാണ് ഈ നദിയും അതിന്റെ പോഷകനദികളും.

3. ബിഗ് ഹോൾ നദി: ഫ്രഞ്ച് ക്രീക്കിന്‍റെ സമ്പത്ത്

1864-ൽ ഫ്രഞ്ച് ക്രീക്കിൽ സ്വർണ്ണം കണ്ടെത്തി. ഇത് ബിഗ് ഹോൾ റിവർ പ്രദേശത്തേക്ക് ഒരു സ്വർണ്ണ പ്രവാഹത്തിന് കാരണമായി. ആദ്യകാല ഖനന ശ്രമങ്ങൾ വളരെ വിജയകരമായിരുന്നു. ആദ്യ കുറച്ച് വർഷങ്ങളിൽ തന്നെ 5 മില്യൺ ഡോളറിലധികം വിലമതിക്കുന്ന സ്വർണ്ണം വേർതിരിച്ചെടുത്തു. ബേസിൻ ക്രീക്ക്, ഫിഷ് ക്രീക്ക് എന്നിവയുൾപ്പെടെ നദിയുടെ പോഷകനദികളിൽ ഗണ്യമായ പ്ലേസർ ഖനനം നടന്നിട്ടുണ്ട്. ഖനിത്തൊഴിലാളികൾ നദിയുടെ അവശിഷ്ടങ്ങളിൽ സ്വർണ്ണം കണ്ടെത്താൻ പാൻ, സ്ലൂയിസ്, ഡ്രെഡ്ജുകൾ എന്നിവ ഉപയോഗിക്കുന്നു.

4. സുബർണരേഖ നദി: ഇന്ത്യയുടെ സ്വർണ രഹസ്യം

ജാര്‍ഖണ്ഡ്, പശ്ചിമ ബംഗാള്‍, ഒഡീഷയുടെ ചില ഭാഗങ്ങള്‍ എന്നിവിടങ്ങളിലൂടെ ഈ നദി ഒഴുകുന്നു. ജാര്‍ഖണ്ഡിന്‍റെ തലസ്ഥാനമായ റാഞ്ചിയില്‍ നിന്ന് 16 കിലോമീറ്റര്‍ അകലെയുള്ള ഛോട്ടാ നാഗ്പൂര്‍ പീഠഭൂമിയില്‍ സ്ഥിതി ചെയ്യുന്ന നാഗ്ഡി ഗ്രാമത്തിലാണ് ഈ നദിയുടെ ഉത്ഭവം. മണ്‍സൂണ്‍ ഒഴികെ വര്‍ഷം മുഴുവനും ഈ നദിയില്‍ സ്വര്‍ണ്ണം വേര്‍തിരിച്ചെടുക്കല്‍ പ്രക്രിയ നടക്കുന്നുണ്ട്. സുബര്‍ണരേഖ നദി മാത്രമല്ല, പോഷകനദിയായ ഖാര്‍കാരി നദിയുടെ മണലിലും സ്വര്‍ണ്ണ കണികകള്‍ കാണാം.

നദിയിൽ നിന്നും ആധുനിക രീതിയില്‍ സ്വർണം ഖനനം ചെയ്യാനുള്ള ശ്രമങ്ങള്‍ സർക്കാർ തലത്തില്‍ തന്നെ നടന്നിരുന്നുവെങ്കിലും ഇവിടുത്തെ സ്വർണ നിക്ഷേപങ്ങൾ വ്യാവസായിക ഖനനത്തിന് അനുയോജ്യമല്ലെന്ന വിലയിരുത്തലാണ് ഉണ്ടായത്. സ്വർണത്തിന്റെ സാന്ദ്രത താരതമ്യേന കുറവാണ് എന്നതാണ് വ്യാവസായിക അടിസ്ഥാനത്തിലുള്ള ഖനനത്തിന് തടസ്സമാകുന്നത്. സുബർണരേഖ നദിയിലെ സ്വർണ നിക്ഷേപങ്ങളെക്കുറിച്ച് നിരവധി പഠനങ്ങളും ഗവേഷണങ്ങളും നടന്നിട്ടുണ്ട്. ചില വിദഗ്ധർ വാദിക്കുന്നത്, സുബർണരേഖയുടെ പോഷക നദിയായ കർകരി നദിയിൽ നിന്നാണ് ഈ സ്വർണം പ്രധാനമായും എത്തിയതെന്നാണ്.

5. ബ്രഹ്മപുത്ര നദി: അസമിലെ സ്വർണ്ണ അരുവി

വടക്കുകിഴക്കൻ സംസ്ഥാനമായ അസമിൽ, ബ്രഹ്മപുത്ര നദി അതിന്റെ പ്ലേസർ സ്വർണ്ണത്തിന് പേരുകേട്ടതാണ്, പ്രത്യേകിച്ച് ഹിമാലയൻ താഴ്‌വരകളിലെ മണലുകളിൽ. പരമ്പരാഗതമായി പാനിംഗ് രീതികൾ ഉപയോഗിച്ചാണ് നദിയിലെ സ്വർണ്ണം വേർതിരിച്ചെടുക്കുന്നത്, തലമുറകളായി പ്രാദേശിക സംസ്കാരത്തിന്റെ ഭാഗമായ ഒരു രീതിയാണിത്.

6. മിസോറി നദി: മൊണ്ടാനയുടെ നിധിശേഖരം

1800-കളുടെ മധ്യത്തിൽ മൊണ്ടാനയിലെ അരുവികളിലെ ചരലുകളിൽ ആദ്യമായി സ്വർണ്ണം കണ്ടെത്തിയപ്പോഴാണ് മിസോറി നദിയുടെ സ്വർണ്ണ ഖനന ചരിത്രം ആരംഭിക്കുന്നത്. മിസോറി നദിയുടെ പോഷകനദിയായ ഇന്ത്യൻ ക്രീക്കിൽ നിന്ന് സ്വർണ്ണം വൻതോതിൽ ഖനനം ചെയ്തിട്ടുണ്ട്.