കേന്ദ്ര സർക്കാർ ജീവനക്കാർക്ക് ദീപാവലി സമ്മാനം: ക്ഷാമബത്ത 3% ഉയർത്തി; പെൻഷൻകാർക്കും നേട്ടം

കേന്ദ്ര സർക്കാർ ജീവനക്കാർക്കും പെൻഷൻകാർക്കും ഇരട്ടി മധുരം. അതെ, ധനകാര്യ മന്ത്രാലയം ക്ഷാമബത്ത വർദ്ധിപ്പിച്ചു. ദസറ, ദീപാവലി ആഘോഷങ്ങൾക്ക് മുന്നോടിയായിട്ടാണ് ഈ പ്രഖ്യാപനം നടത്തിയിരിക്കുന്നത്. 3% വർദ്ധിപ്പിച്ചു കൊണ്ട് ക്ഷാമബത്ത 55% നിരക്കിൽ നിന്ന് 58 ശതമാനമായി ഉയർത്തിയിട്ടുണ്ട്. ഏകദേശം 49.19 ലക്ഷം കേന്ദ്ര സർക്കാർ ജീവനക്കാർക്കും 68.72 ലക്ഷം പെൻഷൻകാർക്കും ഇതിലൂടെ നേട്ടം ലഭിക്കും.

വിലക്കയറ്റം കാരണം പൊറുതി മുട്ടിയിരിക്കുന്ന സമയത്താണ് ക്ഷാമബത്ത പ്രഖ്യാപനം നടത്തിയിരിക്കുന്നത്. ഇത് എല്ലാ ജീവനക്കാർക്കും വലിയ ആശ്വാസം നൽകുന്നു. എട്ടാം ശമ്പള കമ്മീഷൻ ഇനിയും പ്രാബല്യത്തിൽ വരാത്തതിനാൽ ഏഴാം ശമ്പള കമ്മീഷൻ പ്രകാരമാണ് ഈ വർദ്ധനവ്.

ക്ഷാമബത്ത (DA) വർദ്ധിച്ചു

പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്ര മന്ത്രിസഭ അംഗീകരിച്ച ക്ഷാമബത്ത (DA) വർദ്ധനവ് 2025 ജൂലൈ 1 മുതൽ മുൻകാല പ്രാബല്യത്തോടെയാണ് നടപ്പിലാക്കുന്നത്. ക്ഷാമബത്തയിലും (DA) ക്ഷാമാശ്വാസത്തിലും (DR) ഉണ്ടായ ഈ വർദ്ധനവ് മൂലം സർക്കാരിന് പ്രതിവർഷം 10,083.96 കോടി രൂപയുടെ അധിക ബാധ്യതയുണ്ടാകും. എങ്കിലും, ഈ വർദ്ധനവ് വിലക്കയറ്റം മൂലം ജീവനക്കാർക്ക് ഉണ്ടാകുന്ന സാമ്പത്തിക ബുദ്ധിമുട്ടുകൾ ലഘൂകരിക്കാൻ സഹായിക്കും.

ജീവനക്കാരുടെയും വിരമിച്ചവരുടെയും ജീവിതച്ചെലവ് പണപ്പെരുപ്പ നിരക്കിന് അനുസരിച്ച് ക്രമീകരിക്കുന്നതിനാണ് ക്ഷാമബത്ത വർദ്ധിപ്പിക്കാൻ സർക്കാർ ലക്ഷ്യമിടുന്നത്. ഇത് വർഷത്തിൽ രണ്ടു തവണ പുതുക്കാറുണ്ട്. അതായത് ജനുവരി-ജൂൺ കാലയളവിലും, ജൂലൈ-ഡിസംബർ കാലയളവിലുമായിട്ടാണ് നടക്കുന്നത്.

ഇതിനു മുന്നേ ക്ഷാമബത്ത വർദ്ധിപ്പിച്ചത് 2025 മാർച്ചിലായിരുന്നു. അന്ന് 53% ൽ നിന്ന് 55 ശതമാനമായിട്ടാണ് വർദ്ധിപ്പിച്ചത്. ഇപ്പോൾ വർദ്ധിപ്പിച്ചപ്പോൾ അത് 58 ശതമാനമായി ഉയർന്നിരിക്കുന്നു. സത്യത്തിൽ ജീവനക്കാരൻ്റെ അടിസ്ഥാന ശമ്പളത്തിന്റെ ഒരു ശതമാനമായാണ് ക്ഷാമബത്ത കണക്കാക്കുന്നത്. ഓരോ ജീവനക്കാരൻ്റെയും അടിസ്ഥാന ശമ്പളം വ്യത്യാസപ്പെട്ടേക്കാം, അതിനാൽ ഈ വർദ്ധനവിലും മാറ്റം വന്നേക്കാം.

ക്ഷാമബത്ത നികുതി വിധേയമാണോ?

ക്ഷാമബത്തക്ക് നികുതി ഇളവുകൾ ഇല്ല. ശമ്പളം വാങ്ങുന്ന ജീവനക്കാർക്ക് ലഭിക്കുന്ന ക്ഷാമബത്തക്ക് നികുതി നൽകേണ്ടതുണ്ട്. ചില പ്രത്യേക സാഹചര്യങ്ങളിൽ ഈ ക്ഷാമബത്തയെ വിരമിക്കൽ ആനുകൂല്യങ്ങൾ കണക്കാക്കുന്ന ശമ്പളത്തിന്റെ ഭാഗമായി പരിഗണിക്കപ്പെടാറുണ്ട്. എങ്കിലും ഇത് ശമ്പളത്തിൻ്റെ ഘടകം തന്നെയാണ്.

ക്ഷാമബത്തയുടെ ഫോർമുല

• കേന്ദ്ര സർക്കാർ ജീവനക്കാർ: ((അഖിലേന്ത്യാ ഉപഭോക്തൃ വില സൂചികയുടെ ശരാശരി (അടിസ്ഥാന വർഷം 2001 = 100) കഴിഞ്ഞ 12 മാസത്തേക്ക് - 115.76) / 115.76) * 100

• കേന്ദ്ര പൊതുമേഖലാ സ്ഥാപനങ്ങളിലെ ജീവനക്കാർ: ((അഖിലേന്ത്യാ ഉപഭോക്തൃ വില സൂചികയുടെ ശരാശരി (അടിസ്ഥാന വർഷം 2001 = 100) കഴിഞ്ഞ 3 മാസത്തേക്ക് - 126.33) / 126.33) * 100

പെൻഷൻകാർക്കും ശമ്പളക്കാർക്കും എത്രത്തോളം പ്രയോജനം?

ഏഴാം ശമ്പള കമ്മീഷൻ പ്രകാരം പ്രകാരം 18,000 രൂപ കുറഞ്ഞ അടിസ്ഥാന ശമ്പളം വാങ്ങുന്ന ജീവനക്കാരന് ക്ഷാമബത്ത 3 ശതമാനം വർദ്ധിച്ചാൽ 540 രൂപ പ്രതിമാസ വരുമാനത്തിലേക്ക് സംഭാവന ചെയ്യും. അതായത് മൊത്തം 28,440 രൂപ ലഭിക്കും. മാത്രമല്ല, 9,000 രൂപ കുറഞ്ഞ പെൻഷൻ വാങ്ങുന്നവർക്ക്, ഈ വർദ്ധനവ് പ്രകാരം 270 രൂപ വർദ്ധിക്കും. അങ്ങനെയെങ്കിൽ മൊത്തം പെൻഷൻ 14,220 രൂപയാവും.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.