രാവിലെയോടെ മൊബൈലുകളില്‍ അപ്രതീക്ഷിത മുന്നറിയിപ്പ്-ശ്രദ്ധിക്കുക, ഈ കാര്യങ്ങളറിഞ്ഞിരിക്കണം

ഇന്ന് ഏകദേശം 11.58 ഓടെ മൊബൈലുകള്‍ ബീപ് ശബ്ദത്തിന്റെ അകമ്പടിയോടെ വൈബ്രേറ്റ് ചെയ്തു. ഐഫോണ്‍, ആന്‍ഡ്രോയ്ഡ് ഹാന്‍ഡ്‌സെറ്റുകളിലെല്ലാം സന്ദേശമെത്തി.  സംഭവം, പക്ഷെ ഒരു അപകട മുന്നറിപ്പായിരുന്നില്ല.

സര്‍ക്കാര്‍ നടത്തുന്ന പരീക്ഷണത്തിന്റെ ഭാഗമായി ദേശീയ ദുരന്തനിവാരണ അതോറിറ്റിയും ടെലികോം വകുപ്പും ചേര്‍ന്ന് അയച്ച സന്ദേശങ്ങളായിരുന്നു.

അടിയന്തര മുന്നറിയിപ്പ് സംവിധാനം

ഇന്ത്യ ഒരു രാജ്യവ്യാപക അടിയന്തര മുന്നറിയിപ്പ് സംവിധാനം നടപ്പിലാക്കുകയാണ്. പ്രകൃതി ദുരന്തങ്ങള്‍ക്കും മറ്റ് അപകടങ്ങള്‍ക്കും മുന്നോടിയായി പൗരന്മാരെ ജാഗരൂഗരാക്കുകയാണ് ലക്ഷ്യം.

അതിനായി ഒരേ സമയം, ഒരു പ്രദേശത്തെ എല്ലാ ഫോണുകളിലേയ്ക്കും അടിയന്തര സന്ദേശമയക്കുന്ന സാങ്കേതിക സംവിധാനം, സെല്‍ ബ്രോഡ്കാസ്റ്റ് സജ്ജമാക്കുന്നു.

ഈ സംവിധാനത്തിന്റെ പരീക്ഷണാടിസ്ഥാനത്തിലുള്ള ഉപയോഗമാണ് ഇപ്പോള്‍ ദൃശ്യമായത്.

പല ഭാഗങ്ങളിലായി മൊബൈല്‍ ടവറുകള്‍ സജ്ജമാക്കുന്നതിനാല്‍ സന്ദേശം ആവര്‍ത്തിച്ച് ലഭ്യമായേക്കാമെന്ന് ടെലികോം വകുപ്പ് അറിയിച്ചു.

ഭൂകമ്പം, സുനാമി, മിന്നല്‍പ്രളയം, വെള്ളപ്പൊക്കം തുടങ്ങിയ ദുരന്തങ്ങള്‍ക്ക് മുന്നോടിയായോ ശേഷമോ സന്ദേശം അയക്കുന്നതിനാണ് സംവിധാനം ഉപയോഗപ്പെടുത്തുക.

ഇത് സംബന്ധിച്ച ഔദ്യോഗിക പ്രസ്താവന **Press Information Bureau**യുടെ വെബ്‌സൈറ്റില്‍ പ്രസിദ്ധീകരിച്ചു. വെള്ളപ്പൊക്ക, ഉരുള്‍പൊട്ടല്‍ ബാധിത പ്രദേശമായതിനാല്‍ സംവിധാനം കേരളത്തെ സംബന്ധിച്ച് വളരെ പ്രധാനപ്പെട്ടതാണ്.