ദില്ലി: ഓണ്ലൈന് വഴി ഇടപാടുകള് വേഗത്തിലാക്കാന് എളുപ്പവഴി ഒരുക്കി എംപ്ലോയീസ് പ്രൊവിഡന്റ് ഫണ്ട് ഓര്ഗനൈസേഷന് (ഇപിഎഫ്ഒ). ആധാര് അടിസ്ഥാനമാക്കിയുള്ള ഇ-നോമിനേഷന് ആരംഭിച്ചു. നേരത്തെ ഫോറം രണ്ട് പൂരിപ്പിച്ച് റീജ്യണല് ഓഫീസുകളില് നേരിട്ടെത്തിയാണ് നോമിനേഷന് പ്രക്രിയ ചെയ്തിരുന്നത്. ഇ-നോമിനേഷന് ആരംഭിച്ചതോടെ ഇനി നേരിട്ട് എത്തേണ്ടതില്ല. ഓണ്ലൈന് വഴി സാധിക്കും. ഇപിഎഫ്ഒ അംഗങ്ങള്ക്കുള്ള വെബ്സൈറ്റില് ഇതിന് സൗകര്യമുണ്ട്.
യുഎഎന്നുമായി മൊബൈല് നമ്പര് ലിങ്ക് ചെയ്തവര്ക്കാണ് ഓണ്ലൈന് വഴി സൗകര്യം. മാത്രമല്ല, ആധാര് വെരിഫിക്കേഷന് കഴിയുകയും വേണം. മൊബൈന് ലിങ്ക് ചെയ്യുകയും ആധാര് വെരിഫിക്കേഷന് കഴിയുകയും ചെയ്തവര് വേഗത്തില് ഇ-നോമിനേഷന് ചെയ്യണം. അംഗത്തിന്റെ മരണ ശേഷം അവകാശികള്ക്ക് ഓണ്ലൈന് വഴി പെന്ഷന് ക്ലെയിം ചെയ്യണമെങ്കില് നോമിനേഷന് പ്രക്രിയ പൂര്ത്തിയാക്കേണ്ടത് ആവശ്യമാണ്. അങ്ങനെ ചെയ്തിട്ടുണ്ടെങ്കില് ആധാര് ലിങ്ക് ചെയ്ത മൊബൈലിലേക്ക് ലഭിക്കുന്ന ഒടിപി വഴി അവകാശികള്ക്ക് പണം പിന്വലിക്കാന് സാധിക്കും.
നേരത്തെ തൊഴിലുടമ വഴി നോമിനേഷന് ഫോറം പൂരിപ്പിച്ചു നല്കിയവര് ഓണ്ലൈന് വഴി ചെയ്യേണ്ടതില്ല. ഒട്ടേറെ അംഗങ്ങള് ഇതുവരെ ആധാര്, ബാങ്ക് അക്കൗണ്ടുകള് യുഎഎന്നുമായി ബന്ധിപ്പിച്ചിട്ടില്ല. പണം പിന്വലിക്കല് ഉള്പ്പെടെയുള്ള എല്ലാ ഇടപാടുകളും വളരെ വേഗത്തില് ഓണ്ലൈന് വഴി ചെയ്യാന് സാധിക്കണമെങ്കില് ഇവ നിര്ബന്ധമാണ്. കൊറോണ വ്യാപനത്തിന്റെ പശ്ചാത്തലത്തില് അംഗങ്ങള് നേരിട്ട് ഇപിഎഫ്ഒ ഓഫീസില് എത്തുന്നത് ഒഴിവാക്കാനും കെവൈസി യുഎഎന്നുമായി ബന്ധിപ്പിക്കണം.