ബെംഗളൂരു യാത്ര ഇനി ഏറെ എളുപ്പം, ട്രയൽ റൺ നടത്തി വന്ദേഭാരത്, ടിക്കറ്റ് നിരക്കും സ്റ്റോപ്പുകളും അറിയാം

Ernakulam-Bengaluru Vande Bharat Express: കേരളം ഏറെ കാത്തിരുന്ന പ്രഖ്യാപനം നാളെയാണ്. പ്രധാനമന്ത്രി നരേന്ദ്ര മോദി എറണാകുളം- കെഎസ്ആർ ബെംഗളൂരു വന്ദേഭാരത് എക്സ്പ്രസ് നാളെ ഫ്ലാ ഓഫ് ചെയ്യും. നാളെ രാവിലെ 8നാണ് ഉദ്ഘാടനച്ചടങ്ങ്. വാരാണസിയിൽ നടക്കുന്ന ചടങ്ങിലാണ് പ്രധാനമന്ത്രി ഓൺലൈനായി ഫ്ലാഗ് ഓഫ് ചെയ്യുക. ട്രെയിൻ ബെംഗളൂരു- എറണാകുളം റൂട്ടിൽ ട്രയൽ റൺ പൂർത്തിയാക്കി. 8 കോച്ചുകളുള്ള റേക്കാണ് ട്രയൽ റൺ നടത്തിയത്. അതേസമയം, ട്രെയിന്‍ പതിവ് സര്‍വീസ് ആരംഭിക്കുക നവംബര്‍ 14 മുതല്‍ ആയിരിക്കും.

അതിവേഗം, ബഹുദൂരം

എറണാകുളം- ബെംഗളൂരു വന്ദേഭാരത് ട്രെയിൻ യാത്രാ സമയം വെറും ഒമ്പത് മണിക്കൂറായി കുറയ്കും. ആയിരക്കണക്കിന് മലയാളികൾക്ക്, പ്രത്യേകിച്ച് ഐടി പ്രൊഫഷണലുകൾക്കും കേരളത്തിനും ബെംഗളൂരുവിനും ഇടയിൽ യാത്ര ചെയ്യുന്ന വിദ്യാർത്ഥികൾക്കും ഈ ട്രെയിൻ യാത്ര വേഗത്തിലും സുരക്ഷിതമായും കൂടുതൽ സുഖകരവുമാക്കും. അതോടൊപ്പം കേരളവും കർണാടകയും തമ്മിലുള്ള ബന്ധം വർദ്ധിപ്പിക്കുകയും ചെയ്യും. ഈ പുതിയ ട്രെയിൻ ദക്ഷിണ റെയിൽവേ (എസ്ആർ) മേഖലയായിരിക്കും പരിപാലിക്കുകയും പ്രവർത്തിപ്പിക്കുകയും ചെയ്യുക.

വന്ദേ ഭാരത് സ്റ്റോപ്പുകൾ

ട്രെയിൻ നമ്പർ 26651/26652 എറണാകുളം-കെഎസ്ആർ ബെംഗളൂരു-എറണാകുളം കോയമ്പത്തൂർ, പാലക്കാട് റൂട്ട് വഴിയാണ് ഓടുന്നത്. എറണാകുളത്തിനും കെഎസ്ആർ ബെംഗളൂരുവിനും ഇടയിലുള്ള യാത്രയിൽ ഈ വന്ദേ ഭാരത് ട്രെയിൻ ഏഴ് സ്റ്റേഷനുകളിൽ നിർത്തും. കൃഷ്ണരാജപുരം, സേലം, ഈറോഡ്, തിരുപ്പൂർ, കോയമ്പത്തൂർ, പാലക്കാട്, തൃശൂർ എന്നിവയാണ് സ്റ്റേഷനുകൾ. 600ല്‍ കൂടുതല്‍ സീറ്റുകളുണ്ടെന്നതാണ് സവിശേഷത. സ്വകാര്യ ബസുകളുടെ കഴുത്തറപ്പന്‍ നിരക്കില്‍ നിന്ന് ഇത് ഏറെ ആശ്വാസകരമാകുമെന്നാണ് പ്രതീക്ഷിക്കപ്പെടുന്നത്.

സമയക്രമം

ട്രെയിൻ നമ്പർ 26651 ബാംഗ്ലൂർ - എറണാകുളം വന്ദേ ഭാരത് എക്സ്പ്രസ് രാവിലെ 05:10 ന് കെ.എസ്.ആർ ബെംഗളൂരുവിൽ നിന്ന് പുറപ്പെട്ട് 13:50 ന് എറണാകുളത്ത് എത്തിച്ചേരും. മടക്കയാത്രയിൽ, ട്രെയിൻ നമ്പർ 26652 എറണാകുളം - കെ.എസ്.ആർ ബെംഗളൂരു വന്ദേ ഭാരത് എക്സ്പ്രസ് ഉച്ചയ്ക്ക് 2:20 ന് എറണാകുളത്ത് നിന്ന് പുറപ്പെട്ട് 23:00 ന് കെ.എസ്.ആർ ബെംഗളൂരുവിൽ എത്തിച്ചേരും. ബുധന്‍ ഒഴികെയുള്ള ദിവസങ്ങളില്‍ സര്‍വീസുണ്ടാകും.

ബുക്കിംഗ്

എറണാകുളം-ബെംഗളൂരു വന്ദേ ഭാരത് എക്സ്പ്രസ്സിനുള്ള ടിക്കറ്റ് ബുക്കിംഗ് പ്രക്രിയ ഇന്ത്യൻ റെയിൽവേ ഉടൻ ആരംഭിക്കും. യാത്രക്കാർക്ക് ഓൺലൈനായും ഓഫ്‌ലൈനായും ട്രെയിൻ ടിക്കറ്റുകൾ ബുക്ക് ചെയ്യാൻ കഴിയും. ഓൺലൈൻ ബുക്കിംഗിനായി, യാത്രക്കാർക്ക് സാധുവായ ഒരു ഐആർസിടിസി ഉപയോക്തൃ ഐഡി ഉണ്ടായിരിക്കണം , അതേസമയം ഓഫ്‌ലൈൻ ബുക്കിംഗുകൾ അടുത്തുള്ള റെയിൽവേ റിസർവേഷൻ കൗണ്ടറിൽ നടത്താം.

മൂന്നാമത്തെ വന്ദേ ഭാരത്

കേരളത്തിന് അനുവദിച്ച മൂന്നാമത്തേ വന്ദേ ഭാരത് ട്രെയിൻ ആണ് എറണാകുളം- ബെംഗളൂരു വന്ദേ ഭാരത്. ബനാറസ്- ഖജുരാഹോ, ലക്നൗ- സഹാരൻപുർ, ഫിറോസ്പുർ-ഡൽഹി റൂട്ടുകളിലെ സർവീസാണ് പ്രധാനമന്ത്രി നാളെ ഉദ്ഘാടനം ചെയ്യുന്ന മറ്റു വന്ദേഭാരത് ട്രെയിനുകൾ.