ഫോബ്സ് അടുത്തിടെ ഇന്ത്യയിലെ ശതകോടീശ്വരന്മാരുടെ 2020ലെ പട്ടിക പുറത്തിറക്കി. 36.8 ബില്യൺ ഡോളർ ആസ്തിയുള്ള റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി ഏറ്റവും സമ്പന്നനായ ഇന്ത്യക്കാരനെന്ന പദവി ഇത്തവണയും നിലനിർത്തി. ഒരു വർഷം മുമ്പ് 13.2 ബില്യൺ ഡോളർ ആസ്തിയിൽ ഇടിവുണ്ടായിട്ടും അംബാനി പട്ടികയിൽ ഒന്നാം സ്ഥാനം നേടിയിരുന്നു. കൊവിഡ് -19 മഹാമാരി പശ്ചാത്തലത്തിൽ ഈ വർഷം തന്റെ മുഴുവൻ ശമ്പളവും ഉപേക്ഷിക്കാൻ തീരുമാനിച്ചതായി അംബാനി അടുത്തിടെ പ്രഖ്യാപിച്ചിരുന്നു. ആർഐഎല്ലിന്റെ 2019 ലെ വാർഷിക റിപ്പോർട്ട് അനുസരിച്ച് അംബാനിയുടെ വാർഷിക ശമ്പളം 15 കോടി രൂപയാണ്.
രാധാകിഷൻ ദമാനി
ഓഹരി വിപണിയിൽ ഇടിവുണ്ടായിട്ടും റീട്ടെയിൽ രാജാവ് രാധാകിഷൻ ദമാനി 13.8 ബില്യൺ ഡോളർ ആസ്തിയുള്ള ഇന്ത്യയിലെ രണ്ടാമത്തെ ധനികനായി മാറി. ആദ്യമായാണ് ദമാനി ഇന്ത്യൻ സമ്പന്നനായ രണ്ടാമത്തെ ശതകോടീശ്വരനായി. ഡിമാർട്ട് സൂപ്പർമാർക്കറ്റ് ശൃംഖല ഉടമയായ അദ്ദേഹത്തിന്റെ അവന്യൂ സൂപ്പർമാർട്ടുകളുടെ ഓഹരികൾ കൊറോണ വൈറസ് പ്രഭാവത്തിലും ഓഹരി വിപണിയിൽ താരതമ്യേന മികച്ച പ്രകടം കാഴ്ച്ച വച്ചിരുന്നു.
ഇന്ത്യൻ കോടീശ്വരന്മാരിൽ കൊവിഡ് 19ന്റെ സ്വാധീനം
കൊവിഡ് 19 മഹാമാരി ഇന്ത്യൻ ശതകോടീശ്വരന്മാരെ സംബന്ധിച്ചിടത്തോളം തിരിച്ചടിയായി. സമ്പദ്വ്യവസ്ഥ ഇതിനകം മന്ദഗതിയിലായതും ഉപഭോക്തൃ ആവശ്യം കുറയുന്നതുമാണ് കോടീശ്വരന്മാർക്കും തിരിച്ചടിയായിരിക്കുന്നത്. ഇന്ത്യ മൊത്തം ലോക്ക്ഡൌണിലേക്ക് കടക്കുന്നതിന് മുമ്പുതന്നെ, ഓഹരി വിപണി മാർച്ച് 18 ന് മൂന്ന് വർഷത്തെ ഏറ്റവും താഴ്ന്ന നിലയിലേക്ക് താഴ്ന്നിരുന്നു. ഫോർബ്സിന്റെ കണക്കുകൾ പ്രകാരം, മൊത്തം ഇന്ത്യൻ ശതകോടീശ്വരന്മാരുടെ എണ്ണം 102 ആയി കുറഞ്ഞു. 2019 ൽ 106 പേർ പട്ടികയിൽ ഉൾപ്പട്ടിരുന്നു. കോടീശ്വരന്മാരുടെ ആകെ സമ്പത്തും 23% ചുരുങ്ങി 313 ബില്യൺ ഡോളറായി.
ആദ്യ 10 സ്ഥാനങ്ങളിലെ ഇന്ത്യൻ കോടീശ്വരന്മാർ
പട്ടികയിൽ മൂന്നാം സ്ഥാനത്ത് എത്തിയ എച്ച്സിഎൽ സ്ഥാപകനും ചെയർമാനുമായ ശിവ് നാടറിന് 11.9 ബില്യൺ ഡോളർ ആസ്തിയുണ്ട്. പട്ടികയിൽ ഇന്ത്യയിലെ നാലാമത്തെ ഏറ്റവും ധനികനായ വ്യക്തി 10.4 ബില്യൺ ഡോളർ ആസ്തിയുള്ള ഉദയ് കൊട്ടക്കാണ്. ലോകത്തിലെ ഏറ്റവും സമ്പന്നമായ നിക്ഷേപ ബാങ്കർമാരിൽ ഒരാളാണ് കൊട്ടക്. പട്ടികയിൽ അഞ്ചാം സ്ഥാനത്ത് 8.9 ബില്യൺ ഡോളർ ആസ്തിയുള്ള ഗൌതം അദാനിയാണ്. ടെലികോം ഭീമൻ ഭാരതി എയർടെല്ലിന്റെ സ്ഥാപകൻ സുനിൽ മിത്തൽ 8.8 ബില്യൺ ഡോളർ ആസ്തിയുമായി പട്ടികയിൽ ആറാം സ്ഥാനത്താണ്. 8.2 ബില്യൺ ഡോളർ ആസ്തിയുള്ള ഏഴാമത്തെ സമ്പന്ന ഇന്ത്യക്കാരനാണ് സൈറസ് പൂനവല്ല. 7.6 ബില്യൺ ഡോളർ ആസ്തിയുള്ള കുമാർ ബിർള എട്ടാം സ്ഥാനത്താണ്. 7.4 ബില്യൺ ഡോളർ ആസ്തിയോടെ സ്റ്റീൽ മാഗ്നറ്റ് ലക്ഷ്മി മിത്തൽ ഒമ്പതാം സ്ഥാനത്തെത്തിയപ്പോൾ പത്താം സ്ഥാനം വിപ്രോ സ്ഥാപകൻ അസിം പ്രേംജിയും സൺ ഫാർമ സ്ഥാപകൻ ദിലീപ് ഷാങ്വിയും 6.1 ബില്യൺ ഡോളർ ആസ്തിയിൽ നേടി.
അസിം പ്രേംജിയുടെ ജീവകാരുണ്യപ്രവർത്തനം
2019 ൽ വിപ്രോയിൽ തന്റെ ഓഹരികളിൽ വലിയൊരു ഭാഗം അസിം പ്രേംജി ഫൌണ്ടേഷന് സംഭാവന ചെയ്ത പ്രേംജിയുടെ ജീവകാരുണ്യ പ്രവർത്തനമാണ് ഇന്ത്യൻ ശതകോടീശ്വരന്മാരുടെ സമ്പത്തിന്റെ ഇടിവിന്റെ അഞ്ചിലൊന്ന് കാരണമെന്ന് എടുത്തുപറയേണ്ടതാണ്. ഈ സംഭാവനയിലൂടെ, പ്രേംജി തന്റെ ചാരിറ്റിക്ക് നൽകിയ സംഭാവന 21 ബില്യൺ ഡോളറായി.