ഇന്ത്യയിലെ ഏറ്റവും ധനികനായ മുഖ്യമന്ത്രി ആര്? ഇദ്ദേഹം ഇത്രയും റിച്ചോ? ആസ്തി 1000 കോടി

ഇന്ത്യയിലെ മുഖ്യമന്ത്രിമാരുടെ ആസ്‌തി സംബന്ധിച്ച കണക്ക് അസോസിയേഷൻ ഫോർ ഡെമോക്രാറ്റിക് റിഫോംസ് ഡിസംബറിൽ പുറത്ത് വിട്ടിരുന്നു. ആന്ധ്രാപ്രദേശ് മുഖ്യമന്ത്രി എൻ. ചന്ദ്രബാബു നായിഡു ആണ് അന്ന് ആയിരക്കണക്കിന് കോടികളുടെ ആസ്‌തിയോടെ രാജ്യത്തെ ഏറ്റവും വലിയ സമ്പന്നനായ മുഖ്യമന്ത്രി എന്ന പട്ടം സ്വന്തമാക്കിയത്. എ ഡി എയുടെ റിപ്പോർട്ട് പ്രകാരം ₹931 കോടി മൂല്യമുള്ള ആസ്‌തിയാണു നായിഡുവിന്റെ പേരിലുള്ളത്. എവിടെ നിന്നാണ് ഇദ്ദേഹത്തിന് ഇത്രത്തോളം ആസ്തി ഉണ്ടായത് എന്ന ചോദ്യം ഈ സമയങ്ങളിൽ ഉയർന്നിരുന്നു.

സംസ്ഥാനത്തിന്റെ കടം കൂടുന്നുവെന്നും, മുഖ്യമന്ത്രിയുടെ സമ്പത്ത് വർധിക്കുന്നുവെന്നും ചൂണ്ടിക്കാട്ടി ഈ റിപ്പോർട്ടിന് പിന്നാലെ പ്രതിപക്ഷ പാർട്ടികൾ രംഗത്ത് വന്നിരുന്നു.

ചന്ദ്രബാബു നായിഡുവിന്റെ പ്രധാന ആസ്തികൾ എന്തൊക്കെയെന്ന് നോക്കാം

*ഹെറിറ്റേജ് ഫുഡ്സ്

ചന്ദ്രബാബു നായിഡുവിന്റെ കുടുംബത്തിന്റെ പ്രധാന ആസ്തിയാണ് ഹെറിറ്റേജ് ഫുഡ്സ്. 1992-ൽ അദ്ദേഹം സ്ഥാപിച്ച ഈ കമ്പനി, പാൽ, പാൽ ഉൽപ്പന്നങ്ങൾ, കാർഷിക ഉൽപ്പന്നങ്ങൾ തുടങ്ങിയവയുടെ വിപണനത്തിലാണ് ശ്രദ്ധ കേന്ദ്രീകരിക്കുന്നത്. ഇപ്പോൾ അദ്ദേഹത്തിന്റെ ഭാര്യ നാരാ ഭുവനേശ്വരി ആണ് ഈ കമ്പനിയുടെ ചുമതല വഹിക്കുന്നത്.

ഹെറിറ്റേജ് ഫുഡ്സിലുള്ള ഷെയർ ഹോൾഡിംഗ്സ് ആണ് അദ്ദേഹത്തിന്റെ ആസ്തിയിൽ പ്രധാന പങ്ക് വഹിക്കുന്നത്.

സ്ഥാവര-ജംഗമ ആസ്തികൾ

ഭൂമികൾ, ആഡംബര വസതികൾ, നിക്ഷേപങ്ങൾ, മറ്റ് സ്വകാര്യ സ്വത്തുക്കൾ എന്നിവയുടേയും വലിയൊരു ശേഖരം ഇദ്ദേഹത്തിന്റെ പക്കൽ ഉണ്ട്.
എന്നാൽ, ഈ ആസ്തികളുടെ വിശദമായ കണക്കുകൾ പൊതുവിജ്ഞാപനങ്ങളിൽ പരാമർശിച്ചിട്ടില്ല.

ബാധ്യതകൾ

₹10 കോടിയിലധികം ബാധ്യതയും അദ്ദേഹത്തിനുണ്ടെന്ന് എ ഡി ആർ റിപ്പോർട്ട് വ്യക്തമാക്കുന്നു.

ചന്ദ്രബാബു നായിഡുവിന്റെ ആസ്തി ഇന്ത്യയിലെ മറ്റ് മുഖ്യമന്ത്രിമാരുടെ ശരാശരി ആസ്തിയേക്കാൾ (₹52.59 കോടി) പതിനേഴിരട്ടിയിലധികമാണ്. ഹെറിറ്റേജ് ഫുഡ്സിലുള്ള നിക്ഷേപം അദ്ദേഹത്തെ ഇന്ത്യയിലെ ഏറ്റവും സമ്പന്നനായ രാഷ്ട്രീയ നേതാവാക്കി മാറ്റിയതിൽ പ്രധാന പങ്ക് വഹിച്ചു.

അതേസമയം, പശ്ചിമ ബംഗാൾ മുഖ്യമന്ത്രി മമതാ ബാനർജിയായിരുന്നു അന്നത്തെ എ ഡി ആർ പുറത്തു വിട്ട പട്ടികയിലെ ഏറ്റവും കുറഞ്ഞ സമ്പത്തുള്ള മുഖ്യമന്ത്രി എന്ന പദവി സ്വന്തമാക്കിയത്. വെറും ₹15 ലക്ഷം മൂല്യമുള്ളതാണു അവരുടെ ആസ്‌തി.

മറ്റു മുഖ്യമന്ത്രിമാരുടെ ആസ്‌തി എത്ര?

ഇന്ത്യയിലെ 31 മുഖ്യമന്ത്രിമാരുടെ ആകെ ആസ്‌തി ₹1,630 കോടി രൂപയിലധികമാണെന്നും ശരാശരി ആസ്‌തി ₹52.59 കോടി രൂപയാണെന്നും റിപ്പോർട്ട് വ്യക്തമാക്കി. ചന്ദ്രബാബു നായിഡുവിന്റെ പേരിൽ മാത്രം പകുതിയിലധികം ആസ്‌തി ഉള്ളതും ശ്രദ്ധേയമാണ്.

പട്ടികയിൽ അരുണാചൽ പ്രദേശ് മുഖ്യമന്ത്രി പേമ ഖണ്ഡു ആണ് ₹332 കോടി മൂല്യമുള്ള ആസ്‌തിയോടെ രണ്ടാം സ്ഥാനത്തും, കർണാടക മുഖ്യമന്ത്രി സിദ്ധരാമയ്യ ₹51 കോടി ആസ്‌തിയോടെ മൂന്നാം സ്ഥാനത്തുമാണുള്ളത്. ചന്ദ്രബാബു നായിഡുവിനും പേമ ഖണ്ഡുവിനും മാത്രമേ 100 കോടിക്ക് മുകളിലുള്ള ആസ്‌തി ഉള്ളൂ.

കേരള മുഖ്യമന്ത്രി പിണറായി വിജയൻ എവിടെയാണ്?

കേരള മുഖ്യമന്ത്രി പിണറായി വിജയൻ പട്ടികയിൽ ഏറ്റവും ഒടുവിൽ നിന്ന് മൂന്നാം സ്ഥാനത്താണ്. അദ്ദേഹത്തിന്റെ ആസ്‌തി ₹1.18 കോടി രൂപയെന്നാണ് റിപ്പോർട്ടിൽ പറയുന്നത്. ജമ്മു കശ്മീർ മുൻ മുഖ്യമന്ത്രി ഒമർ അബ്ദുള്ള ₹55 ലക്ഷം രൂപയുള്ള ആസ്‌തിയോടെ രണ്ടാമത്തെ ദരിദ്രനായ മുഖ്യമന്ത്രിയാണെന്നതും വ്യക്തമാക്കുന്നു.