സ്വർണ്ണം വെള്ളി നിരക്കുകൾ ഏഴ് വർഷത്തെ ഏറ്റവും ഉയർന്ന നിരക്കിൽ നിന്നും താഴേക്ക്

സ്വർണ്ണം വെള്ളി നിരക്കുകൾ കുത്തനെ ഇടിഞ്ഞു. കഴിഞ്ഞ രണ്ട് ദിവസത്തെ അപേക്ഷിച്ച് സ്വർണ്ണം വെള്ളി നിരക്കുകളിൽ കുറവ് സംഭവിച്ചു. എം‌സി‌എക്‌സിൽ സ്വർണ്ണ ഫ്യൂച്ചർ നിരക്ക് 10 ഗ്രാമിന് 0.53 ശതമാനം അഥവാ 214 രൂപ കുറഞ്ഞ് 40,258 രൂപയിലെത്തി.

ആഗോള വിപണിയിൽ സ്വർണ്ണ വില ഇന്ന് ഏഴ് വർഷത്തെ ഏറ്റവും ഉയർന്ന നിരക്കിൽ നിന്നും താഴേക്ക് വന്നു. സ്‌പോട്ട് സ്വർണം ഇന്ന് ഔൺസിന് 0.2 ശതമാനം ഇടിഞ്ഞ് 1,562.81 ഡോളറിലെത്തി. ഏഴ് വർഷത്തിനിടയിലെ ഏറ്റവും ഉയർന്ന നിലയിലെത്തിയ ശേഷം 1,582.59 ഡോളറിലെത്തി. മറ്റിടങ്ങളിൽ വെള്ളി ഔൺസിന് 0.5 ശതമാനം ഇടിഞ്ഞ് 18.06 ഡോളറിലെത്തി.

യുഎസ്-ഇറാൻ സംഘർഷാവസ്ഥയ്‌ക്കിടയിൽ ആഗോള നിരക്ക് ഉയരുന്നതിന്റെ ഫലമായി കഴിഞ്ഞ കുറച്ചു ദിവസങ്ങളായി ഇന്ത്യയിൽ സ്വർണ്ണവിലയിൽ റെക്കോർഡ് വർധനവായിരുന്നു രേഖപ്പെടുത്തിയത്. ജനുവരിയിൽ സർവ്വകാല റെക്കോഡുകൾ ഭേദിച്ച് സ്വർണ വില കുത്തനെ കുതിയ്ക്കുകയായിരുന്നു. ജനുവരി ഒന്നു മുതൽ അഞ്ചു ദിവസത്തിനിടയിൽ 680 രൂപയാണ് പവന് വർധിച്ചിരുന്നത്. കഴിഞ്ഞ ദിവസം സ്വർണ്ണം പവന് 520 രൂപ ഉയർന്ന് 30,200 രൂപയിൽ എത്തിയിരുന്നു. ജനുവരി ഒന്നിന് 29000 രൂപയായിരുന്ന സ്വർണ്ണത്തിന്റെ വില പിന്നീട് കുത്തനെ ഉയരുകയായിരുന്നു. ഇതിലാണ് ഇപ്പോൾ മാറ്റമുണ്ടായിരിക്കുന്നത്.