സ്വര്‍ണവില ഇടിഞ്ഞത് 1,000 രൂപ! വെള്ളി വില രണ്ട് ദിവസം കൊണ്ട് കുതിച്ചുയര്‍ന്നത് 3,000 രൂപ

മുംബൈ: സ്വര്‍ണ വിലയില്‍ വലിയ ചാഞ്ചാട്ടങ്ങളായിരുന്നു 2021 ന്റെ ആദ്യമാസത്തില്‍ തന്നെ പ്രകടമായത്. കൂടിയും കുറഞ്ഞും ഇപ്പോഴും സ്വര്‍ണവില മുന്നോട്ട് പോവുകയാണ്. വിപണികള്‍ തിരിച്ചെത്തിത്തുടങ്ങിയെങ്കിലും അസംസ്‌കൃത എണ്ണ വിപണി ഇപ്പോഴും സ്ഥിരത നേടിയിട്ടില്ല.

ഒരുമാസത്തിലെ മൊത്തം സ്വര്‍ണ വിലയുടെ കണക്കെടുത്താല്‍ രണ്ട് ശതമാനം ഇടിഞ്ഞു എന്നാണ് ലൈവ് മിന്റ് റിപ്പോര്‍ട്ട് ചെയ്യുന്നത്. മാസക്കണക്കില്‍ നോക്കിയാല്‍ ആയിരം രൂപയുടെ ഇടിവാണ് സ്വര്‍ണത്തിനുണ്ടായത്. എന്നാല്‍ വെള്ളി വില ഇപ്പോള്‍ കുതിച്ചുകയറുകയാണ്. വിശദാംശങ്ങള്‍...

 

ജനുവരിയുടെ നഷ്ടം

സ്വര്‍ണവിലയുടെ കാര്യത്തില്‍ ജനുവരി മൊത്തത്തിലെടുത്താല്‍ നഷ്ടമായിരിക്കും ഫലം. എന്നിരുന്നാലും ആ നഷ്ടത്തിന്റെ വലിപ്പം അല്‍പം കുറയ്ക്കാനുതകുന്നതാണ് ജനുവരി 31 ലെ സ്വര്‍ണ വില വര്‍ദ്ധന. 0.8 ശതമാനം ആണ് മാസാവസാനത്തെ വില വര്‍ദ്ധന.

വെള്ളി വില കുതിക്കുന്നു

സ്വര്‍ണത്തിന്റെ വിലയില്‍ കുറവാണ് സംഭവിക്കുന്നത് എങ്കില്‍ നേരെ മറിച്ചാണ് വെള്ളി വില. വെള്ളിയാഴ്ച സില്‍വര്‍ ഫ്യൂച്വര്‍സ് 3.2 ശതമാനം ആണ് കുതിച്ചത്. ഒറ്റ ദിവസം കിലോഗ്രാമിന് കൂടിയത് 2,170 രൂപ. അങ്ങനെ ഒരു കിലോഗ്രാമിന് 67,765 രൂപയായി.

ആഗോള വിപണിയില്‍

ആഗോള വിപണിയിലും വെള്ളിവില കുതിക്കുകയാണ്. കൊമെക്‌സില്‍ വെള്ളിയാഴ്ച് വെള്ളി വില 4.3 ശതമാനം ആണ് കുതിച്ചുയര്‍ന്നത്. ഒരു ഔണ്‍സിന് 27.06 ഡോളര്‍ വരെ ആയി. സ്വര്‍ണ വില 0.4 ശതമാനം വര്‍ദ്ധിച്ച് ഔണ്‍സിന് 1,849.8 ഡോളര്‍ ആയി.

രണ്ട് ദിവസം കൊണ്ട് മൂവായിരം കൂടി

ആഗോള വിപണിയിലെ വെള്ളിയുടെ കുതിപ്പ് ഇന്ത്യയിലും പ്രകടമായി. രണ്ട് ദിവസം കൊണ്ട് ഒരു കിലോ ഗ്രാം വെള്ളിയുടെ വിലയില്‍ മൂവായിരം രൂപയാണ് വര്‍ദ്ധിച്ചത്. അടുത്തകാലത്തുണ്ടായ ഏറ്റവും വലിയ വിലവര്‍ദ്ധനകളില്‍ ഒന്നാണിത്.

സ്വര്‍ണ വിലയിലെ ചാഞ്ചാട്ടം

യുഎസ് ട്രഷറി വരുമാനം വര്‍ദ്ധിച്ചതും ഇടിഎഫ് നിക്ഷേപകരുടെ വാങ്ങലില്‍ കുറവ് വന്നതും ആണ് സ്വര്‍ണ വിപണിയിലെ ചാഞ്ചാട്ടത്തിന് കാരണം എന്നാണ് വിലയിരുത്തുന്നത്. അമേരിക്കയുടെ അടുത്ത ഉത്തേജക പാക്കേജ് പ്രഖ്യാപനം വൈകുന്നതും അത് സംബന്ധിച്ച ആശങ്കകളും ആണ് ഇതിന് വഴിവച്ചത് എന്നാണ് നിരീക്ഷണം.