സ്വർണ വിലയിൽ വൻ ഇടിവ്; ഒരാഴ്ച്ചയിൽ കുറഞ്ഞത് 600 രൂപ, ഉടൻ 28000ന് താഴേയ്ക്ക്

സംസ്ഥാനത്ത് ഒരാഴ്ച്ചയായി സ്വർണ വിലയിൽ വൻ ഇടിവ്. ഇന്ന് പവന് 80 രൂപ കൂടി കുറഞ്ഞതോടെ ഒരാഴ്ച്ചയ്ക്കകം സ്വർണ വിലയിൽ 600 രൂപയാണ് കുറഞ്ഞിരിക്കുന്നത്. പവന് 28,040 രൂപയിലും ഗ്രാമിന് 3,505 രൂപയിലുമാണ് ഇന്ന് വ്യാപാരം നടക്കുന്നത്. ഒക്ടോബറിന് ശേഷമുള്ള ഏറ്റവും കുറഞ്ഞ വിലയാണ് ഇന്ന് രേഖപ്പെടുത്തിയിരിക്കുന്നത്. ഇന്നലെ (തിങ്കളാഴ്ച്ച) സ്വർണ വില പവന് 28,120 രൂപയായിരുന്നു. ഡിസംബറിലെ ഏറ്റവും ഉയർന്ന വില 28640 രൂപയാണ്. ഡിസംബർ നാലിനാണ് ഈ വിലയ്ക്ക് വ്യാപാരം നടന്നത്.

ഇന്ത്യൻ വിപണി

ഇന്ത്യൻ വിപണികളിൽ കഴിഞ്ഞ അഞ്ച് ദിവസമായി തുടർച്ചായായി സ്വർണ വില കുറയുകയാണ്. എം‌സി‌എക്‌സിൽ ഇന്ന് സ്വർണ്ണ ഫ്യൂച്ചറുകളുടെ വില 10 ഗ്രാമിന് 0.03 ശതമാനം ഇടിഞ്ഞ് 37,570 രൂപയായി. അഞ്ച് ദിവസത്തിനുള്ളിൽ സ്വർണ്ണ വില 10 ഗ്രാമിന് 750 രൂപയാണ് കുറഞ്ഞിരിക്കുന്നത്. സെപ്റ്റംബറിലെ ഏറ്റവും ഉയർന്ന നിരക്കായ 10 ഗ്രാമിന് 40,000 രൂപയിൽ നിന്ന് ഇപ്പോൾ 10 ഗ്രാമിന് 2,450 രൂപയാണ് കുറഞ്ഞിരിക്കുന്നത്.

വെള്ളി വില

ആഭ്യന്തര വിപണിയിൽ വെള്ളി വിലയും കുത്തനെ ഇടിഞ്ഞു. എം‌സി‌എക്‌സിൽ വെള്ളി നിരക്ക് 0.09 ശതമാനം കുറഞ്ഞ് കിലോയ്ക്ക് 43,465 രൂപയിലെത്തി.

ആഗോള വിപണി

ആഗോള വിപണിയിൽ സ്വർണ വില ഇന്ന് ഔൺസിന് 1,460.95 ഡോളറായി കുറഞ്ഞു. ആഗോള വിപണികളിലെ വിലയിടിവാണ് ആഭ്യന്തര വിപണിയിലും പ്രതിഫലിച്ചത്. യുഎസ് ഫെഡറൽ റിസർവിന്റെ രണ്ട് ദിവസത്തെ പോളിസി മീറ്റിംഗിലാണ് ഇപ്പോൾ നിക്ഷേപകർ ശ്രദ്ധ കേന്ദ്രീകരിച്ചിരിക്കുന്നത്. ഈ വർഷം മൂന്നുതവണ പലിശനിരക്ക് കുറച്ചതിനാൽ ഇത്തവണ നിരക്കിൽ മാറ്റമുണ്ടാകില്ലെന്നാണ് സാമ്പത്തിക വിദഗ്ധരുടെ പ്രതീക്ഷ. ആഗോള വിപണിയിൽ ഈ വർഷം ഇതുവരെ സ്വർണത്തിന്റെ വില 14% ആണ് ഉയർന്നിരിക്കുന്നത്.

ഇന്ത്യയിലെ വില വർദ്ധനവ്

ഇറക്കുമതി തീരുവയും യുഎസ് ഡോളറിനെതിരായ രൂപയുടെ മൂല്യത്തകർച്ചയും കാരണം ഇന്ത്യയിൽ ഈ വർഷം സ്വർണ വിലകൾ 19% ഉയർന്നു. ആഗോള ശരാശരിയേക്കാൾ കൂടുതലാണിത്. എന്നാൽ ഇപ്പോൾ ഇന്ത്യയിൽ സ്വർണ വിലയിൽ തുടർച്ചയായ ഇടിവുണ്ടായിട്ടും സ്വർണ്ണത്തിന് ആവശ്യക്കാരില്ലെന്ന് റോയിട്ടേഴ്സ് കഴിഞ്ഞ ദിവസം റിപ്പോർട്ട് ചെയ്തിരുന്നു.