പുതുവർഷത്തിൽ സ്വർണ വില കുതിച്ചുയരുന്നു, ഇന്നും വില കൂടി

പുതുവർഷത്തിൽ സ്വർണ വില കുത്തനെ മുകളിലേയ്ക്ക്. പവന് 80 രൂപ കൂടി 29080 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഇന്നലെയും വിലയിൽ വർദ്ധനവ് രേഖപ്പെടുത്തിയിരുന്നു. ജനുവരി ഒന്ന് മുതൽ സ്വർണത്തിന് പവന് 29000 രൂപയാണ് നിരക്ക്. ഗ്രാമിന് 3635 രൂപയാണ് ഇന്നത്തെ നിരക്ക്.

ഡിസംബറിലെ സ്വർണത്തിന്റെ ഏറ്റവും കൂടിയ നിരക്ക് പവന് 29080 രൂപയായിരുന്നു. ഡിസംബർ 31നാണ് ഇതേ വിലയ്ക്ക് വ്യാപാരം നടന്നത്. ഡിസംബറിലെ ഏറ്റവും കുറഞ്ഞ വില 28000 രൂപയായിരുന്നു. ഒരു മാസത്തിനിടെ സ്വർണ വില പവന് 1080 രൂപയാണ് വർദ്ധിച്ചത്. സെപ്റ്റംബര്‍ നാലിനാണ് ചരിത്രത്തിലെ ഏറ്റവും ഉയര്‍ന്ന നിരക്ക് സ്വര്‍ണത്തിന് രേഖപ്പെടുത്തിയത്. ഗ്രാമിന് 3,640 രൂപയും പവന് 29,120 രൂപയുമായിരുന്നു അന്നത്തെ നിരക്ക്.

പുതുവർഷത്തിൽ സ്വർണ വില കുതിച്ചുയരുന്നു, ഇന്നും വില കൂടി

സ്വർണ വില ഉയർന്നതോടെ ഇന്ത്യയിൽ സ്വർണ്ണത്തിന്റെ ഡിമാൻഡ് കുറഞ്ഞുവെന്ന് വ്യാപാരികൾ പറയുന്നു. ആഗോള വിപണിയിൽ സ്വർണ വില 2019ൽ 18% നേട്ടം കൈവരിച്ചു. യുഎസും ചൈനയും തമ്മിലുള്ള വ്യാപാര തർക്കം, ലോകത്തെ പ്രമുഖ സമ്പദ്‌വ്യവസ്ഥകളിലെ ധനനയം തുടങ്ങിയവയാണ് സ്വർണ്ണ വില ഉയരാൻ കാരണം. ഇന്ത്യയിൽ സ്വർണ നിരക്ക് 2019ൽ ഏകദേശം 24% ഉയർന്നു.

2019ലെ അത്ര നേട്ടം കൈവരിച്ചില്ലെങ്കിലും 2020ൽ സ്വർണ വില 12% മുതൽ 13% വരെ നേട്ടം പ്രതീക്ഷിക്കുന്നതാണ് സാമ്പത്തിക വിദഗ്ധരുടെ അഭിപ്രായം. ഇന്ത്യയിലെ സ്വർണ്ണ വിലയിൽ 12.5% ​​ഇറക്കുമതി തീരുവയും 3% ജിഎസ്ടിയും ഉൾപ്പെടുന്നുണ്ട്.