കേരളത്തില്‍ സ്വര്‍ണവില കുത്തനെ കൂടി; ഇന്നത്തെ പവന്‍, ഗ്രാം നിരക്കുകള്‍ അറിയാം

പുതുവര്‍ഷത്തിലെ ഏറ്റവും ഉയര്‍ന്ന വിലയില്‍ സ്വര്‍ണം. ചൊവാഴ്ച്ച കേരളത്തില്‍ സ്വര്‍ണം പവന് 38,400 രൂപ വില തൊട്ടു. തിങ്കളാഴ്ച്ച 38,080 രൂപയായിരുന്നു ഉച്ചയ്ക്ക് ശേഷം സ്വര്‍ണം രേഖപ്പെടുത്തിയ വില; രാവിലത്തെ വില 37,840 രൂപയും. ചൊവാഴ്ച്ച പവന് 320 രൂപ കൂടി. ഗ്രാം നിരക്കിലും സമാനമായ വര്‍ധനവ് കാണാം. 4,800 രൂപയാണ് ഇന്ന് ഒരു ഗ്രാം സ്വര്‍ണത്തിന് വില. വിലവര്‍ധനവ് 40 രൂപ.

ദേശീയ തലത്തിലും ചൊവാഴ്ച്ച സ്വര്‍ണവില കൂടി. ദില്ലിയില്‍ 10 ഗ്രാം 22 കാരറ്റ് സ്വര്‍ണത്തിന് 49,070 രൂപയാണ് വില. ചെന്നൈയില്‍ വില 48,150 രൂപയും. മുംബൈയില്‍ 22 കാരറ്റ് സ്വര്‍ണത്തിന് (10 ഗ്രാം) 49,220 രൂപ എന്ന നിലയിലും വ്യാപാരം നടക്കുന്നു. രാജ്യാന്തര വിപണിയില്‍ സ്വര്‍ണവില വര്‍ധിച്ച പശ്ചാത്തലത്തിലാണ് ഇന്ത്യയിലും സ്വര്‍ണത്തിന് വില കൂടിയത്.

രാജ്യാന്തര വിപണിയില്‍ രണ്ടു ശതമാനം വര്‍ധനവ് സ്വര്‍ണം തിങ്കളാഴ്ച്ച രേഖപ്പെടുത്തിയിരുന്നു. കഴിഞ്ഞ രണ്ടു മാസത്തിനിടെയുള്ള ഏറ്റവും ഉയര്‍ന്ന നില കൈവരിച്ചാണ് സ്വര്‍ണം തിങ്കളാഴച്ചത്തെ ഇടപാടുകള്‍ പൂര്‍ത്തിയാക്കിയത്. 2018 -ലെ കണക്കുകളിലേക്ക് ഡോളര്‍ കൂപ്പുകുത്തിയതും സ്വര്‍ണവിലയെ സ്വാധീനിച്ചു. പുതിയ കൊറോണ വൈറസ് വകഭേദം ഉയര്‍ത്തുന്ന ആശങ്കയും സ്വര്‍ണത്തെ സ്വാധീനിക്കുന്നുണ്ട്.

നിലവില്‍ സ്വര്‍ണം ഔണ്‍സിന് 1,930.20 ഡോളറാണ് രാജ്യാന്തര വിപണിയില്‍ നിരക്ക്. 1.7 ശതമാനം വര്‍ധനവ് നിരക്കില്‍ സംഭവിച്ചു. നവംബര്‍ 9 -ന് ശേഷം സ്വര്‍ണം കൈവരിക്കുന്ന ഏറ്റവും ഉയര്‍ന്ന വിലനിലവാരമാണിത്. നവംബര്‍ 9 ആം തീയതി സ്വര്‍ണം ഔണ്‍സ് 1,936.31 ഡോളര്‍ വരെ വില രേഖപ്പെടുത്തുകയുണ്ടായി. യുഎസ് സ്വര്‍ണ ഫ്യൂച്ചറുകളും നിലമെച്ചപ്പെടുത്തിയത് കാണാം. 2.1 ശതമാനം വര്‍ധനവോടെ 1,935.60 ഡോളറിലാണ് യുഎസ് സ്വര്‍ണ ഫ്യൂച്ചറുകള്‍ വന്നുനില്‍ക്കുന്നത്.

അമേരിക്കന്‍ ഡോളര്‍ ദുര്‍ബലമായതാണ് സ്വര്‍ണം 1,900 ഡോളര്‍ മാര്‍ക്കിന് മുകളില്‍ കുതിക്കാനുള്ള പ്രധാന കാരണമെന്ന് വിപണി വിദഗ്ധര്‍ പറയുന്നു. വരും ദിവസങ്ങളില്‍ സ്വര്‍ണത്തില്‍ നിക്ഷേപം നടത്തുന്നവരുടെ എണ്ണം ക്രമാതീതമായി ഉയരും. ഈ സാഹചര്യം സ്വര്‍ണവില കൂടാന്‍ ഇനിയും ഇടവരുത്തുമെന്നാണ് നിഗമനം.

സ്വര്‍ണത്തിന് പുറമെ മറ്റു വിലയേറിയ ലോഹങ്ങള്‍ക്കും വില കൂടിയിട്ടുണ്ട്. വെള്ളി ഔണ്‍സിന് 27.16 ഡോളറാണ് ഇപ്പോള്‍ നിരക്ക്. വര്‍ധനവ് 3.1 ശതമാനം. ഡിസംബര്‍ 21 -ന് ശേഷം വെള്ളി കുറിക്കുന്ന ഏറ്റവും ഉയര്‍ന്ന വിലനിലവാരമാണിത്. ഇതേസമയം, പലേഡിയം ലോഹത്തിന് നേരിയ ഇടിവ് നേരിടുന്നുണ്ട്. ഔണ്‍സിന് 2,446.24 ഡോളറാണ് പലേഡിയത്തിന് രാജ്യാന്തര വിപണിയില്‍ വില.