കേരളത്തിൽ സ്വർണ വിലയിൽ ഇന്ന് വർദ്ധനവ്, പവന് 200 രൂപ കൂടി

കേരളത്തിൽ ഇന്ന് സ്വർണ വില ഉയർന്നു. ഒരു പവന് 200 രൂപ വർദ്ധിച്ച് 37960 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 25 രൂപ വർദ്ധിച്ച് 4745 രൂപയാണ് ഇന്നത്തെ നിരക്ക്. നവംബറിലെ ഏറ്റവും കുറഞ്ഞ വില പവന് 37680 രൂപയാണ്. നവംബർ 10നാണ് ഈ വിലയ്ക്ക് വ്യാപാരം നടന്നത്. നവംബറിലെ ഏറ്റവും ഉയർന്ന വില നവംബർ 9ന് രേഖപ്പെടുത്തിയ 38880 രൂപയാണ്.

ഇന്ത്യൻ വിപണി

ഇന്ത്യൻ വിപണിയിൽ ഇന്ന് സ്വർണ്ണം, വെള്ളി വിലകൾ ഉയർന്നു. എം‌സി‌എക്‌സിൽ സ്വർണ്ണ ഫ്യൂച്ചറുകൾ 10 ഗ്രാമിന് 0.07 ശതമാനം ഉയർന്ന് 50,635 രൂപയിലെത്തി. വെള്ളി നിരക്ക് 0.2 ശതമാനം കുറഞ്ഞ് കിലോയ്ക്ക് 62,615 രൂപയിലെത്തി. കഴിഞ്ഞ സെഷനിൽ സ്വർണ്ണ വില 10 ഗ്രാമിന് 0.76 ശതമാനം അഥവാ 380 രൂപ ഉയർന്നിരുന്നു. വെള്ളി വില 0.28 ശതമാനം ഉയർന്നു.

വിൽപ്പന ഉയരും

ഇന്ത്യയിൽ, ധൻതേരസ്, ദീപാവലി ദിനത്തിൽ വിൽപ്പനയിൽ വർധനയുണ്ടാകുമെന്നാണ് വിശകലന വിദഗ്ധരുടെ പ്രതീക്ഷ. ഓഗസ്റ്റിൽ സ്വർണ വില റെക്കോർഡ് നിരക്കായ 56,000 രൂപയിൽ എത്തിയിരുന്നു. ജ്വല്ലറി വിപണി ക്രമേണ വീണ്ടെടുക്കലിലാണെന്നും ഉപഭോക്തൃ വികാരം പോസിറ്റീവായി മാറുകയാണെന്നും ഓൾ ഇന്ത്യ ജെം ആൻഡ് ജ്വല്ലറി ഡൊമസ്റ്റിക് കൗൺസിൽ ചെയർമാൻ അനന്ത പദ്മനബൻ പ്രസ് ട്രസ്റ്റ് ഓഫ് ഇന്ത്യയോട് പറഞ്ഞു.

ധൻതേരസ്

ഈ വർഷം, ധൻതേരസ് രണ്ട് ദിവസങ്ങളിലായാണ് ആഘോഷിക്കുന്നത്. ഇന്നലെ ധൻതേരസ് ആരംഭിച്ചിരുന്നു. എന്നാൽ ഇന്ന് രാജ്യത്തുടനീളം പരമാവധി സ്വർണ വിൽപ്പന പ്രതീക്ഷിക്കുന്നതായി വ്യാപാരികൾ പറയുന്നു.

ആഗോള വിപണി

സ്‌പോട്ട് ഗോൾഡ് വില ഔൺസിന് 1,876.92 ഡോളർ എന്ന നിലയിലാണ് ഇന്ന് വ്യാപാരം നടത്തുന്നത്. ഈ ആഴ്ചയിൽ ഇത് 3.8 ശതമാനം ഇടിഞ്ഞു. കൊവിഡ് വാക്സിൻ ട്രയൽ ഫലങ്ങൾ റിപ്പോർട്ട് ചെയ്തതിനുശേഷം ഓഹരി വിപണിയിലെ മുന്നേറ്റത്തിന് പുറമേ ശക്തമായ യുഎസ് ഡോളറും ഈ ആഴ്ച സ്വർണ്ണ വിലയെ ബാധിച്ചു. വിലയേറിയ മറ്റ് ലോഹങ്ങളിൽ വെള്ളി വില ഇന്ന് ഔൺസിന് 0.1 ശതമാനം ഉയർന്ന് 24.26 ഡോളറിലെത്തി.