കേരളത്തിൽ ഇന്ന് സ്വർണ വില കുത്തനെ ഉയർന്നു, ഒറ്റയടിയ്ക്ക് കൂടിയത് പവന് 560 രൂപ

സംസ്ഥാനത്ത് ഇന്ന് സ്വർണ വില കുതിച്ചുയർന്നു. പവന് 560 രൂപ വർദ്ധിച്ച് 37280 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 4660 രൂപയാണ് ഇന്നത്തെ വില. കഴിഞ്ഞ മൂന്ന് ദിവസമായി പവന് 36720 രൂപയായിരുന്നു കേരളത്തിലെ സ്വർണ വില. എന്നാൽ ഇന്ന് വില കുത്തനെ ഉയർന്നു. ഡിസംബറിലെ ഇതുവരെയുള്ള ഏറ്റവും ഉയർന്ന വിലയാണ് ഇന്ന് സ്വർണത്തിന് രേഖപ്പെടുത്തിയത്. ഈ മാസത്തെ ഏറ്റവും കുറഞ്ഞ വില പവന് 35920 രൂപയാണ്.

ഇന്ത്യൻ വിപണി

ഇന്ത്യൻ വിപണിയിൽ സ്വർണ വില ഇന്ന് ഉയർന്നു. വെള്ളി വിലയിൽ ഇടിവ്. എംസിഎക്സിൽ സ്വർണ്ണ ഫ്യൂച്ചേഴ്സ് 10 ഗ്രാമിന് 0.2 ശതമാനം ഉയർന്ന് 50,064 രൂപയിലെത്തി. വെള്ളി 0.2 ശതമാനം ഇടിഞ്ഞ് കിലോയ്ക്ക് 65,370 രൂപയിലെത്തി. കഴിഞ്ഞ സെഷനിൽ സ്വർണ്ണ ഫ്യൂച്ചറുകൾ 10 ഗ്രാമിന് 1.5% അഥവാ 750 രൂപ ഉയർന്നപ്പോൾ വെള്ളി വില കിലോഗ്രാമിന് 2.5% അഥവാ 1,600 ഉയർന്നിരുന്നു.

അന്താരാഷ്ട്ര വിപണി

കഴിഞ്ഞ സെഷനിൽ വലിയ മുന്നേറ്റത്തിന് സാക്ഷ്യം വഹിച്ചതിന് ശേഷം അന്താരാഷ്ട്ര വിപണികളിൽ സ്വർണ്ണ നിരക്കിൽ ഇന്ന് കാര്യമായ മാറ്റമില്ല. കഴിഞ്ഞ സെഷനിൽ 1.7 ശതമാനം കുതിച്ചുയർന്നതിനുശേഷം സ്‌പോട്ട് സ്വർണ വില ഔൺസിന് 1,863.30 ഡോളർ എന്ന നിലയിൽ ചെറിയ മാറ്റം രേഖപ്പെടുത്തി. വിലയേറിയ മറ്റ് ലോഹങ്ങളിൽ വെള്ളി വില ഔൺസിന് 24.51 ഡോളറിലും പല്ലേഡിയം വില 2,330.71 ഡോളറിലും എത്തി.

സ്വർണ വിലയെ സ്വാധീനിക്കുന്ന ഘടകങ്ങൾ

• ദുർബലമായ യുഎസ് ഡോളർ
• വർദ്ധിച്ചു വരുന്ന വൈറസ് കേസുകൾ
• വൈറസുമായി ബന്ധപ്പെട്ട നിയന്ത്രണങ്ങൾ
• പ്രധാന സമ്പദ്‌വ്യവസ്ഥകളിൽ നിന്നുള്ള സമ്മിശ്ര സാമ്പത്തിക ഡാറ്റ
• അധിക ഉത്തേജക നടപടികളുടെ പ്രതീക്ഷകൾ
• ബ്രെക്‌സിറ്റ് അനിശ്ചിതത്വം
• കൊവിഡ് -19 വാക്സിൻ പ്രതീക്ഷകൾ

വാക്സിൻ പുരോഗതിയും സ്വർണ വിലയും

കഴിഞ്ഞ ഏതാനും ആഴ്ചകളായി സ്വർണ്ണ വിലയിൽ സമ്മർദ്ദം ചെലുത്തിയ ഏറ്റവും വലിയ ഘടകം വാക്സിൻ രംഗത്തെ പുരോഗതിയാണെന്ന് നിരീക്ഷകർ പറയുന്നു. ലോകത്തിലെ ഏറ്റവും വലിയ സ്വർണ്ണ പിന്തുണയുള്ള എക്സ്ചേഞ്ച് ട്രേഡഡ് ഫണ്ടായ എസ്‌പി‌ഡി‌ആർ ഗോൾഡ് ട്രസ്റ്റിന്റെ ഓഹരികൾ തിങ്കളാഴ്ച 0.18 ശതമാനം ഇടിഞ്ഞ് 1,179.78 ടണ്ണായി.