സ്വർണ വില കത്തിക്കയറുമ്പോൾ ഇത്തവണ അക്ഷയ തൃതീയ ദിനത്തിൽ സ്വർണം വാങ്ങുന്നുണ്ടോ? എപ്പോൾ വാങ്ങാം?

ഇന്ത്യയിലെ ഏറ്റവും വലിയ പരമ്പരാ​ഗത ആഘോഷങ്ങളിലൊന്നാണ് അക്ഷയ തൃതീയ. ഹിന്ദു ആചാര പ്രകാരം ഈ ദിവസം സ്വർണം വാങ്ങിയാൽ നിങ്ങൾക്കും കുടുംബത്തിനും ഐശ്വര്യവും സമൃദ്ധിയും വർദ്ധിക്കും എന്നാണ് വിശ്വാസം. അതിനാൽ രാജ്യത്തിൻ്റെ വിവിധ സംസ്ഥാനങ്ങളിൽ ഈ ദിവസം അവധിയായിരിക്കും. സാധാരണ ദിവസങ്ങളെ അപേക്ഷിച്ച് ഈ ദിവസം സ്വർണം വാങ്ങുന്നവരുടെ എണ്ണത്തിൽ വൻ വർദ്ധനവുണ്ടാവും. ഇത്തവണ ഏപ്രിൽ 30 നാണ് അക്ഷയ തൃതീയ ആഘോഷം. നിങ്ങളും വാങ്ങുന്നുണ്ടോ?

നിലവിലെ സാഹചര്യത്തിൽ ഇത്തവണ സ്വർണം വാങ്ങുന്നത് എങ്ങനെയാണ്? ഇന്ന് സ്വർണം പവന് 70,000 കടന്നു. സാധാരണക്കാർക്ക് ഇത്രയും വിലയിൽ അക്ഷയ തൃതീയയിൽ സ്വർണം വാങ്ങുന്നത് അത്ര എളുപ്പമല്ല. പൊതുവേ ഈ ദിവസം എല്ലാവർക്കും സ്വർണം വാങ്ങാൻ സാധിക്കാറില്ല. സാധാരണ ദിവസത്തേക്കാൾ ഏറ്റവും ഡിമാൻഡ് ഉയരുന്ന ദിവസമാണ് അക്ഷയ തൃതീയ.

താരിഫ് യുദ്ധം ശക്തിയാർജ്ജിക്കുന്നതോടെ വില ഇനിയും മുന്നോട്ട് കുതിക്കാൻ സാധ്യതയുണ്ട്. പവൻ വില 75,000 രൂപ വരെ എത്തിയേക്കാം. നിലവിൽ യുഎസ് ചൈനക്കെതിരെ അമിതമായി താരിഫ് ചുമത്തിയിട്ടുണ്ട്. ഇന്നത്തെ സ്വർണ വില ചരിത്രത്തിലെ ഏറ്റവും വലിയ റെക്കോർഡാണ്. രാജ്യാന്തര വിലയിലും ഇന്ന് വമ്പൻ കുതിപ്പാണ്.

അക്ഷയ തൃതീയ 2025: സ്വർണം എപ്പോൾ വാങ്ങാം..?

ഈ വർഷത്തെ അക്ഷയ തൃതീയ 2025 ഏപ്രിൽ 30 നാണ്. വൈശാഖ മാസത്തിലെ ശുക്ല പക്ഷത്തിലെ തൃതീയ തിഥി 2025 ഏപ്രിൽ 29 ന് വൈകുന്നേരം 5:31 ന് ആരംഭിച്ച് 2025 ഏപ്രിൽ 30 ന് ഉച്ചയ്ക്ക് 2:12 ന് അവസാനിക്കും. ഈ സമയത്താണ് സ്വർണം വാങ്ങേണ്ടത്. അതായത് ഏപ്രിൽ 30ന് സ്വർണം വാങ്ങാനുള്ള ശുഭകരമായ സമയം രാവിലെ 5:41 മുതൽ ഉച്ചയ്ക്ക് 2:12 വരെയാണ്. പൂജ മുഹൂർത്തം അതേ ദിവസം രാവിലെ 6:00 മുതൽ ഉച്ചയ്ക്ക് 12:18 വരെയാണ്.

അക്ഷയ തൃതീയയിൽ സ്വർണം വാങ്ങുന്നത് ശുഭകരമാണോ?

സ്വർണം ലക്ഷ്മി ദേവിയുടെ പ്രതിരൂപമാണെന്ന് വിശ്വസിക്കുന്നു. കാരണം പുരാണം അനുസരിച്ച്, പാലാഴി മഥനത്തിൽ ലഭിച്ച നിധികളിൽ ഒന്ന് സ്വർണമായിരുന്നു. അത് ഭഗവാൻ മഹാവിഷ്ണുവിന് അലങ്കരിക്കപ്പെട്ടു. അതിനാൽ, സ്വർണത്തെ സമ്പത്തിന്റെയും ശക്തിയുടെയും പ്രതീകമായി കാണുന്നു. അക്ഷയ തൃതീയ, ധന്തേരസ് തുടങ്ങിയ ശുഭദിനങ്ങളിൽ സ്വർണം വാങ്ങുക എന്ന പാരമ്പര്യം ഈ കാരണത്താലാണ് സംഭവിച്ചത്. ഈ ദിവസം സ്വർണമോ സ്വർണാഭരണങ്ങളോ വീട്ടിലേക്ക് കൊണ്ടുവരുന്നത് ലക്ഷ്മി ദേവിയുടെ ഐശ്വര്യവും അനു​ഗ്രഹവും ലഭിക്കുന്നതിന് വഴിയൊരുക്കും.

ഈ അക്ഷയ തൃതീയയ്ക്ക് സ്വർണം വാങ്ങണോ?

ഈ അക്ഷയ തൃതീയയിൽ സ്വർണം വാങ്ങിക്കുന്നത് നിർബന്ധമില്ല. സ്വർണം എപ്പോൾ വാങ്ങിയാലും നിലവിലെ സാഹചര്യത്തിൽ അതൊരു വലിയ ആസ്തിയാണ്. ഓരോ ദിവസവും സ്വർണ വില കുതിച്ചുയരുകയാണ്. ഇപ്പോൾ വാങ്ങിയാൽ അത് ഏറ്റവും മികച്ച നിക്ഷേപമായിരിക്കും. എന്നാൽ എല്ലാവർക്കും ഈ വിലക്കയറ്റത്തിൽ സ്വർണം വാങ്ങുന്നത് വാങ്ങില്ല. പക്ഷേ സ്വർണത്തിൽ നിക്ഷേപിക്കാൻ സാധിക്കും. അതിനാൽ ഇപ്പോൾ സ്വർണ ഇടിഎഫ് പോലുള്ള നിക്ഷേപങ്ങളിൽ ഇൻവെസ്റ്റ് ചെയ്യുന്നതായിരിക്കും ഉചിതം.

സ്വർണം പോലെ വെള്ളി ആഭരണങ്ങൾ വാങ്ങുന്നതും അക്ഷയ തൃതീയ ദിനത്തിൽ സമ്പത്തും ഭാഗ്യവും കൊണ്ടുവരുമെന്ന് വിശ്വസിക്കപ്പെടുന്നു. വെള്ളി പാത്രങ്ങള്‍, ആഭരണങ്ങള്‍, നാണയങ്ങള്‍, മറ്റ് വെള്ളി സാധനങ്ങള്‍ എന്നിവ വാങ്ങുന്നതും നിങ്ങളുടെ ഭാഗ്യം ഇരട്ടിപ്പിക്കും. മാത്രമല്ല കാര്‍ അല്ലെങ്കില്‍ ബൈക്ക് പോലുള്ള വാഹനങ്ങള്‍ വാങ്ങുന്നതും നിങ്ങൾക്ക് ഭാഗ്യവും സമ്പത്തും നൽകും.