കത്തിക്കയറി സംസ്ഥാനത്തെ സ്വർണവില, ഇന്ന് കൂടിയത് 1200 രൂപ, 1 പവൻ വാങ്ങാൻ 1 ലക്ഷം രൂപ നൽകേണ്ടി വരുമോ..?

ആഭരണപ്രേമികളുടെ എല്ലാ കണക്ക് കൂട്ടലും തെറ്റിച്ച് റെക്കോർഡിൽ നിന്നും റെക്കോർഡിലേക്ക് കുതിക്കുകയാണ് സംസ്ഥാനത്തെ സ്വർണവില. കഴിഞ്ഞ പത്ത് ദിവസത്തിനിടെ 3520 രൂപയാണ് സംസ്ഥാനത്ത് ഒരുപവൻ സ്വർണത്തിന് വർദ്ധിച്ചത്. ചിങ്ങം പിറന്നതിനാൽ വിവാഹ സീസൺ ആണ് വരാനിരിക്കുന്നത്. അതിനാൽ തന്നെ ഉയരുന്ന സ്വർണനിരക്ക് സാധാരണക്കാരിൽ ആശങ്ക ജനിപ്പിക്കുന്നുണ്ട്. വരും ദിവസങ്ങളിൽ ഗ്രാം നിരക്ക് 10000 കടക്കുമെന്നാണ് ട്രേഡ് അനലിസ്റ്റുകരുടെ വിലയിരുത്തൽ.

പുതിയ റെക്കോർഡ്

ചരിത്രത്തിലെ ഏറ്റവും ഉയർന്ന വിലയിലാണ് സംസ്ഥാനത്തെ സ്വർണവ്യാപാരം നടക്കുന്നത്. ഗ്രാമിന് 150 രൂപ കൂടി 9,620 രൂപയിലെത്തി. ഒരുപവന് 1200 രൂപയാണ് കൂടിയത്. അതോടെ പവന്‍റെ വില 76,960 രൂപയിലെത്തി.

1 പവൻ വാങ്ങാൻ

ഇന്നത്തെ നിരക്കിൽ ഒരു പവൻ സ്വർണ്ണം വാങ്ങാൻ എത്ര രൂപ നൽകേണ്ടി വരും എന്ന് നോക്കാം. കാരണം സ്വർണാഭരണം വാങ്ങുമ്പോൾ പവന്‍റെ വിലയോടൊപ്പം പണിക്കൂലി, നികുതി, ഹാൾമാർക്കിംങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 85,000 രൂപ നൽകേണ്ടി വരും.

കുതിപ്പിന് പിന്നിലെ കാരണം

ലോകത്തെ ഏറ്റവും വലിയ സ്വർണ ഉപഭോക്താക്കളാണ് ഇന്ത്യ. ഓരോ വർഷവും ടൺ കണക്കിന് സ്വർണം രാജ്യത്ത് ഇറക്കുമതി ചെയ്യപ്പെടുന്നു. അതുകൊണ്ട് ആഗോള വിപണിയിൽ സംഭവിക്കുന്ന ചെറിയ ചലനങ്ങൾ പോലും അടിസ്ഥാനപരമായി ഇന്ത്യയിലെ സ്വർണവിലയിൽ പ്രതിഫലിക്കുന്നത്. അന്താരാഷ്ട്ര വിപണിക്കനുസരിച്ചാണ് ഇന്ത്യയിലെ വെള്ളി വില നിശ്ചയിക്കപ്പെടുന്നത്. ഡോളറുമായി താരതമ്യം ചെയ്യുന്പോള്‍ രൂപയുടെ വിലയില്‍ വരുന്ന കയറ്റിറക്കങ്ങളും സ്വർണവിലയെ സ്വാധീനിക്കും.

യുഎസ് പ്രസിഡന്റ് ഡൊണാൾഡ് ട്രംപും, യുഎസ് ഫെഡറൽ റിസർവ് ഗവർണർ ലീസ കുക്കും തമ്മിലെ തർക്കം കോടതിയിലെത്തിയിരിക്കുന്നു. ഈ സാഹചര്യത്തിലാണ് ഡോളർ ഇടിഞ്ഞതും, സ്വർണ വില കത്തിക്കയറിയതും. ഫെഡറൽ റിസർവ് ഇത്തവണ യുഎസിന്റെ അടിസ്ഥാന പലിശ നിരക്ക് വെട്ടിക്കുറക്കുമെന്ന് പ്രഖ്യാപിച്ചതിനാൽ സെപ്റ്റംബറിൽ വലിയ ചലനങ്ങൾ പ്രതീക്ഷിക്കാം. പലിശ കുറഞ്ഞാൽ അത് സ്വർണ വിലക്ക് വലിയ ശക്തിയാവും, സ്വർണ വില വീണ്ടും കുതിച്ചുയരും. ഇത് കേരളത്തിലും ഒരുപോലെ പ്രതിഫലിക്കും.

റെക്കോർഡുകൾ തീർത്ത മാസം

സ്വർണം ചരിത്രത്തിലെ ഏറ്റവും ഉയർന്ന വില രേഖപ്പെടുത്തിയ മാസമാണ് ഓഗസ്റ്റ്. പവന് 73,200 രൂപ എന്ന നിരക്കിലാണ് ഓഗസ്റ്റ് മാസത്തെ സ്വർണവ്യാപാരം ആരംഭിച്ചത്. ഏറിയും കുറഞ്ഞും ഏഴാം തീയത്തി ആകുമ്പോഴേക്കും പവന്‍റെ വില 75,200 രൂപയിലേക്കെത്തി. പിറ്റേദിവസം അത് 75,760 രൂപയിലേക്ക് കുതിച്ചു. ഇതാണ് ചരിത്രത്തിലെ തന്നെ ഏറ്റവും ഉയർന്ന സ്വർണവില. എന്നാൽ പിന്നീടുള്ള ദിവസങ്ങളിൽ സ്വർണവില താഴേക്ക് വീണതോടെ ആഭരണപ്രേമികൾക്ക് ആശ്വാസമായി. 20 തീയ്യതി ആകുമ്പോഴേക്കും വില 73,440 രൂപയിലേക്ക് വീണു. പക്ഷെ പ്രതീക്ഷകൾ മുഴുവൻ തെറ്റിച്ചുകൊണ്ട് 29-ആം തീയ്യതി പവന്‍റെ വില വീണ്ടും 75,760 രൂപയിലെത്തി. എന്നാൽ ഓഗസ്റ്റ് 30-ന് സ്വർണം വീണ്ടും വിലയിൽ പുതിയ റെക്കോർഡ് ഇട്ടു.