സ്വർണ വില വീണ്ടും പവന് 30000 കടന്നു; വില റെക്കോർഡ് മറികടക്കാൻ സാധ്യത

കഴിഞ്ഞ ഒരാഴ്ച്ചയായി തുടരുന്ന സ്വർണ വിലയിലെ കുതിപ്പ് ഇന്നും തുടർന്നു. സംസ്ഥാനത്ത് പവന് 160 രൂപയാണ് ഇന്ന് വർദ്ധിച്ചത്. 30160 രൂപയ്ക്കാണ് വ്യാപാരം പുരോഗമിക്കുന്നത്. ഗ്രാമിന് 3770 രൂപയാണ് ഇന്നത്തെ വില. ജനുവരിയിലെ ഏറ്റവും ഉയർന്ന വില പവന് 30400 രൂപയായിരുന്നു. ജനുവരി 8നാണ് ഈ വിലയ്ക്ക് വ്യാപാരം നടന്നത്. ഈ മാസത്തെ ഏറ്റവും കുറഞ്ഞ വില പവന് 29000 രൂപയാണ്.

ഇന്ത്യൻ വിപണി

ഇന്ത്യൻ വിപണിയിൽ ഇന്ന് മൊത്തത്തിൽ സ്വർണത്തിന്റെയും വെള്ളിയുടെയും വില ഉയർന്നു. എം‌സി‌എക്‌സിൽ ഫെബ്രുവരി സ്വർണ്ണ ഫ്യൂച്ചർ വില 10 ഗ്രാമിന് 0.52 ശതമാനം ഉയർന്ന് 40,560 രൂപയിലെത്തി. സിൽവർ ഫ്യൂച്ചേഴ്സ് നിരക്ക് 0.76 ശതമാനം ഉയർന്ന് കിലോയ്ക്ക് 47,291 രൂപയിലെത്തി.

ആഗോള വിപണി

ആഗോള വിപണികളിൽ സ്വർണ്ണ നിരക്ക് 0.6 ശതമാനം ഉയർന്ന് 1,586 ഡോളറിലെത്തി. സിൽവർ 0.9 ശതമാനം ഉയർന്ന് 18.24 ഡോളറിലെത്തി. കൊറോണ വൈറസ് പകരാനുള്ള സാധ്യത കൂടുതൽ ശക്തമാകുന്നതായി ചൈനയിലെ ആരോഗ്യ അധികൃതർ അറിയിച്ചതിനെ തുടർന്നാണ് വിപണി ഉണർന്നത്. ചൈനയിൽ കൊറോണ വൈറസ് ബാധിച്ച് മരിച്ചവരുടെ എണ്ണം 80ൽ എത്തി, രോഗബാധിതരുടെ എണ്ണം രണ്ടായിരത്തിലധികമായി. ജനുവരി 28 മുതൽ 29 വരെ നടക്കാനിരിക്കുന്ന യുഎസ് ഫെഡറൽ റിസർവിന്റെ ഈ വർഷത്തെ ആദ്യ മീറ്റിംഗ് സ്വർണ്ണ വ്യാപാരികൾ ആകാംക്ഷയോടെയാണ് കാത്തിരിക്കുന്നത്.

ആവശ്യം കുറഞ്ഞു

ഇന്ത്യയടക്കം പല ഏഷ്യൻ വിപണികളിലെയും സ്വർണ്ണത്തിന്റെ ആവശ്യകത ദുർബലാവസ്ഥയിൽ തുടരുകയാണെന്ന് റിപ്പോർട്ടുകൾ പുറത്തു വന്നിരുന്നു. ഇന്ത്യയിൽ, ഔദ്യോഗിക ആഭ്യന്തര വിലയേക്കാൾ ഡീലർമാർ ഔൺസിന് 11 ഡോളർ വരെ കിഴിവ് വാഗ്ദാനം ചെയ്തതായി റോയിട്ടേഴ്‌സ് റിപ്പോർട്ട് ചെയ്തു. ഇന്ത്യയിലെ സ്വർണ്ണ വിലയിൽ 12.5% ​​ഇറക്കുമതി നികുതിയും 3% ജിഎസ്ടിയും ഉൾപ്പെടുന്നു.

ബജറ്റ് പ്രതീക്ഷ

വലിയ വാങ്ങലുകൾ നടത്തുന്നതിന് മുമ്പ് ഫെബ്രുവരി ഒന്നിന് അവതരിപ്പിക്കാനിരിക്കുന്ന ബജറ്റിനായി കാത്തിരിക്കുകയാണ് സ്വർണ്ണ ഡീലർമാർ. കഴിഞ്ഞ വർഷത്തെ ബജറ്റിൽ സർക്കാർ സ്വർണത്തിന്റെ ഇറക്കുമതി നികുതി 10 ശതമാനത്തിൽ നിന്ന് 12.5 ശതമാനമായി ഉയർത്തിയിരുന്നു. ജ്വല്ലറി മേഖലയെ ഉയർത്തുന്നതിനായി വാണിജ്യ മന്ത്രാലയം സ്വർണ്ണ ഇറക്കുമതി തീരുവ കുറയ്ക്കാൻ ആവശ്യപ്പെട്ടതായാണ് വിവരം.

ഉയർന്ന വിലയും ആവശ്യകതയും

സ്വർണത്തിന്റെ ഉയർന്ന വില ആവശ്യകതയെ ബാധിക്കുന്ന പ്രധാന ഘടകമാണ്. ഈ മാസം ആദ്യം സ്വർണവില 10 ഗ്രാമിന് 41,293 രൂപയിലെത്തിയിരുന്നു. എന്നിരുന്നാലും, വിവാഹ സീസൺ ഡിമാൻഡ് സ്വർണ്ണ വിലയെ സഹായിക്കുമെന്നാണ് വ്യാപാരികളുടെ നിഗമനം.