സ്വർണ വിലയിൽ ഇന്ന് വീണ്ടും കുറവ്, വെള്ളിയ്ക്കും വില കുറയുന്നു

സംസ്ഥാനത്ത് സ്വർണ വില ഇന്നും കുറഞ്ഞു. പവന് 80 രൂപയാണ് ഇന്ന് കുറഞ്ഞിരിക്കുന്നത്. ഒരു പവന് 28400 രൂപയും ഗ്രാമിന് 3550 രൂപയുമാണ് ഇന്നത്തെ നിരക്ക്. ഇന്നലെ പവന് 160 രൂപ കുറഞ്ഞ് 28,480 രൂപയ്ക്കാണ് വ്യാപാരം പുരോഗമിച്ചിരുന്നത്. 28,640 രൂപയാണ് ഈ മാസത്തെ ഏറ്റവും ഉയർന്ന സ്വർണ വില. 28320 രൂപയാണ് ഡിസംബറിലെ ഇതുവരെയുള്ള ഏറ്റവും കുറഞ്ഞ വില. ഡിസംബർ 2, 3 തീയതികളിലാണ് ഈ വിലയ്ക്ക് വ്യാപാരം നടന്നത്.

എംസിഎക്സിലെ സ്വർണ വില

എം‌സി‌എക്‌സിൽ, സ്വർണം, വെള്ളി വിലകൾ ഇന്നും കുറഞ്ഞു. തുടർച്ചയായ മൂന്ന് ദിവസമായി വില കുത്തനെ കുറയുകയാണ്. ഇന്ന് സ്വർണ്ണ ഫ്യൂച്ചറുകളുടെ വില 10 ഗ്രാമിന് 0.11 ശതമാനം കുറഞ്ഞ് 38,045 രൂപയിലെത്തി. എം‌സി‌എക്‌സിൽ സിൽവർ ഫ്യൂച്ചറുകൾ 0.20 ശതമാനം ഇടിഞ്ഞ് കിലോയ്ക്ക് 44,524 രൂപയിലെത്തി.

ആഗോള വിപണി

യുഎസ് പ്രസിഡന്റ് ഡൊണാൾഡ് ട്രംപിന്റെ ഏറ്റവും പുതിയ അഭിപ്രായങ്ങൾ ചൈനയുമായുള്ള വ്യാപാര ഇടപാടിന്റെ പ്രതീക്ഷകളെ പുനരുജ്ജീവിപ്പിച്ചതിനെ തുടർന്ന് ആഗോള വിപണിയിൽ സ്വർണ വില ഇന്ന് ഔൺസിന് 1,475.51 ഡോളർ രേഖപ്പെടുത്തി. ഈ ആഴ്ച ആദ്യം സ്വർണത്തിന് ഒരു മാസത്തെ ഏറ്റവും ഉയർന്ന നിരക്കായ ഔൺസിന് 1,484 ഡോളറിലെത്തിയിരുന്നു.

ഇന്ത്യയിലെ സ്വർണ വില

അടുത്തിടെയുള്ള ഇടിവുണ്ടായിട്ടും, ഇന്ത്യയിൽ സ്വർണ വില ഈ വർഷം ഇതുവരെ 20% ഉയർന്നു, ആഗോള നിരക്കിന്റെ വർദ്ധനവ്, ഇറക്കുമതി തീരുവ വർദ്ധനവ്, യുഎസ് ഡോളറിനെതിരെ രൂപയുടെ മൂല്യത്തകർച്ച എന്നിവയാണ് ഇന്ത്യയിൽ വില ഉയരാൻ കാരണമായത്. നവംബറിലെ സംസ്ഥാനത്തെ ഏറ്റവും ഉയർന്ന സ്വർണ വില 28,800 രൂപയായിരുന്നു. നവംബർ 1, 2,3 തിയതികളിൽ ഈ നിരക്കിലായിരുന്നു സ്വർണ വ്യാപാരം നടന്നത്.

ഇറക്കുമതി വർദ്ധനവ്

ഇന്ത്യയിൽ സ്വർണത്തിന്റെ ഇറക്കുമതി നവംബറിൽ കുത്തനെ ഉയർന്നതായി റോയിട്ടേഴ്‌സ് റിപ്പോർട്ട് ചെയ്തിരുന്നു. നവംബറിലെ ഇന്ത്യയുടെ സ്വർണ്ണ ഇറക്കുമതി ഒക്ടോബറിനെ അപേക്ഷിച്ച് 78 ശതമാനം ഉയർന്ന് അഞ്ച് മാസത്തിനിടയിലെ ഏറ്റവും ഉയർന്ന നിലയിലെത്തി. ലോകത്തിലെ തന്നെ രണ്ടാമത്തെ വലിയ സ്വർണ വിപണിയാണ് ഇന്ത്യ.