സ്വർണ വിലയിൽ കനത്ത ഇടിവ്, ഇന്ന് നവംബറിലെ ഏറ്റവും കുറഞ്ഞ വില

സംസ്ഥാനത്ത് സ്വർണ വിലയിൽ ഇന്ന് കനത്ത ഇടിവ്. പവന് 160 രൂപ കുറഞ്ഞ് 28200 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 3525 രൂപയാണ് വില. കഴിഞ്ഞ മൂന്ന് ദിവസമായി വിലയിൽ മാറ്റമില്ലാതിരുന്ന വിപണിയിൽ ഇന്ന് വില കുത്തനെ കുറയുകയായിരുന്നു. നവംബറിലെ ഏറ്റവും കുറഞ്ഞ വിലയ്ക്കാണ് ഇന്ന് വ്യാപാരം പുരോഗമിക്കുന്നത്. നവംബർ 12നും ഇതേ വിലയ്ക്ക് വ്യാപാരം നടന്നിരുന്നു. പിന്നീട് വില ഉയരുകയും ചെയ്തിരുന്നു.

എംസിഎക്സിലെ വില

ആഗോള നിരക്കും രൂപയു വിനിമയ നിരക്ക് ഉയർന്നതും എം‌സി‌എക്‌സിൽ ഡിസംബർ സ്വർണ്ണ ഫ്യൂച്ചറുകളുടെ വിലയിൽ 0.20 ശതമാനം ഇടിവ് രേഖപ്പെടുത്തി. 10 ഗ്രാമിന് 37,650 രൂപയാണ് ഇന്നത്തെ നിരക്ക്. തുടർച്ചയായ ആറാം ദിവസമാണ് എംസിഎക്സിൽ വില കുറയുന്നത്. എംസിഎക്‌സിൽ വെള്ളി വില 0.45 ശതമാനം ഇടിഞ്ഞ് കിലോയ്ക്ക് 44,036 രൂപയിലെത്തി.

ആഗോള വിപണി

സ്‌പോട്ട് സ്വർണ്ണ വില 0.1 ശതമാനം ഇടിഞ്ഞ് 1,454.19 ഡോളറിലെത്തി. ആഗോള വിപണിയിൽ വെള്ളി വില ഒരാഴ്ചത്തെ ഏറ്റവും താഴ്ന്ന നിലയിലെത്തി. ഔൺസിന് 0.3 ശതമാനം ഇടിഞ്ഞ് 16.85 ഡോളർ ആണ് വെള്ളി വില. രാഷ്ട്രീയവും സാമ്പത്തികവുമായ അനിശ്ചിതത്വത്തിൽ സ്വർണ്ണത്തെ ഒരു സുരക്ഷിത നിക്ഷേപമായാണ് കണക്കാക്കുന്നത്. ആഗോള വിപണികളിൽ ഈ വർഷം ഇതുവരെ സ്വർണ വില 13% ഉയർന്നു. യുഎസ്-ചൈന വ്യാപാര യുദ്ധം ആഗോള സാമ്പത്തിക വളർച്ചയെ ബാധിക്കുമോ എന്ന ആശങ്കയാണ് ഇതിന് കാരണം.

ഇന്ത്യയിലെ വില വർദ്ധനവ്

ഇറക്കുമതി തീരുവ വർദ്ധനവും യുഎസ് ഡോളറിനെതിരായ രൂപയുടെ മൂല്യത്തകർച്ചയും കാരണം ഇന്ത്യയിൽ സ്വർണ വില ഈ വർഷം ഇതുവരെ 19% ഉയർന്നിരുന്നു. നവംബർ മാസത്തിലെ കേരളത്തിലെ ഏറ്റവും ഉയർന്ന വില പവന് 28800 രൂപയാണ്. നവംബർ 1, 2, 3 തീയതികളിലാണ് ഈ വിലയ്ക്ക് വ്യാപാരം നടന്നത്.