സ്വർണ്ണം ഈ വർഷം ഒരു ലക്ഷം രൂപയിലെത്തുമോ? വില വർദ്ധനവിന്റെ സാധ്യകളിങ്ങനെ...

അതിവേഗം കുതിക്കുകയാണ് രാജ്യത്ത് സ്വർണ്ണവില. ആഗോള തലത്തിലെ രാഷ്ട്രീയ - സാമ്പത്തിക സാഹചര്യങ്ങൾക്കൊപ്പം ഉയരുന്ന സ്വർണ്ണവില ഇന്ത്യയിലും അതിന്റെ പ്രതിഫലനം സൃഷ്ടിക്കുന്നു. അധികം വൈകാതെ തന്നെ ഒരു ലക്ഷം രൂപയെന്ന സർവ്വകാല റെക്കോർഡിലെത്തുമെന്നാണ് കൂടുതൽ ആളുകളും ചിന്തിക്കുന്നത്. അമേരിക്കൻ പ്രസിഡന്റായി ഡൊണാൾഡ് ട്രംപ് തിരഞ്ഞെടുക്കപ്പെട്ടതിന് പിന്നാലെ എടുത്ത തീരുവ നയമാണ് സ്വർണ്ണവില കുതിച്ചുയരാൻ കാരണം.

മാർച്ച് 2ന് 10 ഗ്രാം സ്വർണ്ണത്തിന് 85,320 രൂപയായിരുന്നു വില. ഒരു മാസത്തിനിപ്പുറം ഏപ്രിൽ 2 ആകുമ്പോഴേക്കും 11,983 രൂപയുടെ വർദ്ധനവാണ് രേഖപ്പെടുത്തിയിരിക്കുന്നത്. ഏപ്രിൽ 2ന് രാജ്യത്ത് പത്ത് ഗ്രാം സ്വർണ്ണത്തിന്റെ വില 91,115 രൂപയാണ്. ആഗോള വിപണിയിൽ ഔൺസിന് 3148 എന്ന നിലയിലാണ് സ്വർണ്ണ വില. എല്ലാവരുടെയും മനസ്സിലുള്ള ചോദ്യമാണ് സ്വർണ്ണ വില ഇനിയും ഉയരുമോ എന്നത്. 10 ഗ്രാമിന് ഒരു ലക്ഷം രൂപയിലെത്തുക എന്നത് സാധ്യമാകുമെന്നും അധികം വൈകാതെ തന്നെ അത് സംഭവിക്കാനുള്ള സാധ്യത കൂടുതലാണെന്നും സാമ്പത്തിക വിദഗ്ധർ അഭിപ്രായപ്പെടുന്നു. നിലവിലെ സാഹചര്യത്തിൽ നിന്ന് 10 ശതമാനം കൂടി വർദ്ധനവ് ഉണ്ടായാൽ, അത് എളുപ്പത്തിൽ ഒരു ലക്ഷത്തിലെത്തും.

ബുധനാഴ്ച രാവിലെ കോമെക്‌സ് സ്വർണ്ണ വില എക്കാലത്തെയും ഉയർന്ന നിരക്കായ ഔൺസിന് 3,167 ഡോളറിലെത്തി. ആഗോള തലത്തിൽ അമേരിക്കൻ തീരുവ നയത്തിലെ മാറ്റം സൃഷ്ടിക്കുന്ന അനിശ്ചിതത്വം സുരക്ഷിത നിക്ഷേപത്തിനുള്ള ആവശ്യകത കൂട്ടി. ആഗോള വ്യാപാര യുദ്ധ സാധ്യതയെക്കുറിച്ചുള്ള ആശങ്കകൾ ഈ നീക്കം വർദ്ധിപ്പിച്ചു, ഇത് നിക്ഷേപകരെ സ്വർണ്ണത്തിൽ അഭയം തേടാൻ പ്രേരിപ്പിക്കുന്നു.

പ്രധാന വ്യാപാര പങ്കാളികൾക്കെതിരെ അമേരിക്ക ഡൊണാൾഡ് ട്രംപ് പ്രതീക്ഷിച്ചതിലും കൂടുതൽ ആക്രമണാത്മകമായ തീരുവ പ്രഖ്യാപിച്ചതോടെ ആഗോള വ്യാപാര യുദ്ധ സാഹചര്യം രൂപപ്പെടുകയായിരുന്നു. പരിഭ്രാന്തരായ നിക്ഷേപകർ സുരക്ഷിത നിക്ഷേപങ്ങളിലേക്ക് കുതിച്ചതോടെ സ്വർണ്ണ വില റെക്കോർഡ് ഉയരത്തിലെത്തി. വജ്രങ്ങൾക്ക് നിലവിലുള്ള പൂജ്യം ശതമാനത്തിൽ നിന്ന് 20 ശതമാനം വരെയും സ്വർണ്ണാഭരണങ്ങൾക്ക് 5.5-7 ശതമാനം വരെയും ഇറക്കുമതി താരിഫ് ഉയർന്നേക്കാമെന്നതിനാൽ രത്ന-ആഭരണ മേഖലയെയായിരിക്കും ഏറ്റവും കൂടുതൽ ബാധിക്കുക. ഇന്ത്യയിലെ ഏറ്റവും വലിയ ആഭരണ കയറ്റുമതി വിപണികളിൽ ഒന്നാണ് യുഎസ്, ഇതിൽ ഏകദേശം 30 ശതമാനം വിഹിതവും അമേരിക്കയാണ്.

കഴിഞ്ഞ കുറച്ച് കാലങ്ങളായി ആളുകളുടെ പ്രത്യേകിച്ച് ഇന്ത്യൻ ജനതയുടെ സുരക്ഷിത നിക്ഷേപ തിരഞ്ഞെടുപ്പാണ് സ്വർണ്ണം. നിക്ഷേപം എന്നതിലുപരി, ആഭരണങ്ങളോടും പൈതൃക താൽപര്യങ്ങളും സ്വർണ്ണത്തോടുള്ള ഇന്ത്യൻ ജനതയുടെ പ്രീതി വർദ്ധിപ്പിക്കുന്നു.