ഇന്ത്യൻ വിപണിയിൽ സ്വർണം സർവ്വകാല റെക്കോർഡിൽ: 24K സ്വർണം പവന് 90,000 രൂപക്ക് അരികിൽ

ഇന്ത്യയിലെ സ്വർണ വില സർവ്വകാല റെക്കോർഡിലേക്ക് എത്തിയിരിക്കുന്നു. 22 കാരറ്റ് സ്വർണ വില പവന് 80,000 രൂപയാണ് ഇന്ന് ആദ്യമായി ഭേദിച്ചിരിക്കുന്നത്. ഇത് സത്യത്തിൽ ആഗോളതലത്തിലെ മാറ്റങ്ങൾക്ക് അനുസൃതമായിട്ടാണ് ഈ മാറ്റം സംഭവിച്ചിരിക്കുന്നത്. സ്വർണ നിക്ഷേപങ്ങളുടെ ഡിമാൻഡ് ഉയർന്നതും, ഡോളർ, ബോണ്ട് എന്നിവയുടെ മൂല്യം ഇടിഞ്ഞതുമെല്ലാം ഇന്ത്യയിലും സ്വർണ വിലക്ക് കരുത്തായി.

‍ഡോളറിലാണ് സ്വർണത്തിൻ്റെ വില നിശ്ചയിക്കുന്നത്. ഇതിന് അനുസരിച്ചാണ് ഇന്ത്യയിലെ വിപണിയിലും സ്വർണ വിലയിൽ ചലനങ്ങൾ സംഭവിക്കുന്നത്. യുഎസിൻ്റെ കേന്ദ്ര ബാങ്കായ ഫെഡറൽ റിസർവ്വ് അടിസ്ഥാന പലിശ നിരക്ക് കുറക്കുമെന്ന സൂചനകളും സ്വർണ വിലയിൽ കുതിപ്പ് സൃഷ്ടിക്കുന്നു.

ഇന്ത്യൻ വിപണിയിൽ സ്വർണം വാങ്ങുന്നവരുടെ എണ്ണം വളരെ കൂടുതലാണ്. പക്ഷേ നിലവിലെ സാഹചര്യത്തിൽ വാങ്ങുന്നവരുടെ എണ്ണം കുറയുകയോ അല്ലെങ്കിൽ ആളുകൾ പരിശുദ്ധി കുറ‍ഞ്ഞ ആഭരണങ്ങളിലേക്ക് വഴിതിരിയുകയോ ചെയ്തേക്കാം.

ഇന്ത്യയിലെ ഇന്നത്തെ സ്വർണ വില

ഇന്ന് ഇന്ത്യയിൽ സ്വർണ വില പുത്തൻ റെക്കോർഡിലേക്ക് കുതിക്കുന്നത്. ഇത് 22 കാരറ്റ്, 24 കാരറ്റ്, 18 കാരറ്റ് തുടങ്ങിയ വിവിധ പരിശുദ്ധിയുള്ള സ്വർണ വിലയിൽ മാറ്റം സൃഷ്ടിക്കുന്നുണ്ട്. ഓരോ സ്വർണത്തിൻ്റെയും ഇന്നത്തെ വില അറിയാം.

24 കാരറ്റ് സ്വർണം ഗ്രാമിന് 136 രൂപ ഉയർന്ന് 11,029 രൂപയിലെത്തി. ഒരു പവൻ്റെ വില 1,088 രൂപ ഉയർന്ന് 88,232 രൂപയിലെത്തി. 10 ഗ്രാമിന്റെ വില 1,360 രൂപ ഉയർന്ന് 1,10,290 രൂപയിലെത്തി. 100 ഗ്രാം സ്വർണത്തിന്റെ വില 13,600 രൂപ ഉയർന്ന് 11,02,900 രൂപയായി. ഇന്നലെ വ്യാപാരം നടന്ന വിലയേക്കാൾ വമ്പൻ കുതിപ്പിലാണ് ഇന്ന് വ്യാപാരം നടക്കുന്നത്.

22 കാരറ്റ് സ്വർണം ഒരു ഗ്രാമിൻ്റെ വില 125 രൂപ ഉയർന്ന് 10,110 രൂപയായി. ഒരു പവൻ്റെ വില 1,000 രൂപ ഉയർന്ന് 80,880 രൂപയായി. 10 ​ഗ്രാമിൻ്റെ വില 1,250 രൂപ ഉയർന്ന് 1,01,100 രൂപയായി. 100 ഗ്രാമിന്റെ വില 12,500 രൂപ ഉയർന്ന് 10,11,000 രൂപയായി.

18 കാരറ്റ് സ്വർണം ഒരു ഗ്രാമിന് വില 102 രൂപ ഉയർന്ന് 8272 രൂപയായി. ഒരു പവന് 816 രൂപ ഉയർന്ന് 66,176 രൂപയായി. 10 ഗ്രാമിന് 1,020 രൂപ ഉയർന്ന് 82,720 രൂപയും, 100 ഗ്രാമിന് 10,200 രൂപ ഉയർന്ന് 8,27,200 രൂപയുമായി ഉയർന്നിട്ടുണ്ട്.

ഇന്ത്യയിലെ വെള്ളി നിരക്ക്

ഇന്ന് രാവിലെ ഇന്ത്യയിൽ വെള്ളി വിലയിൽ വലിയ വർധനവുണ്ടായി. ഇന്ത്യയിൽ ഒരു കിലോ വെള്ളിയുടെ വില 3,000 രൂപ വർദ്ധിച്ച് 1,30,000 രൂപയായി. ഇന്ത്യയിൽ 100 ​​ഗ്രാം വെള്ളിയുടെ വില 13,000 രൂപയായി.