കേരളത്തിൽ സ്വർണ വില കുതിച്ചുയർന്നു, ഒക്ടോബറിലെ ഏറ്റവും ഉയർന്ന വില

കേരളത്തിൽ സ്വർണ വില ഇന്ന് കുതിച്ചുയർന്നു. പവന് 360 രൂപ ഉയർന്ന് 37480 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 4685 രൂപയാണ് ഇന്നത്തെ വില. ഈ മാസത്തെ ഏറ്റവും ഉയർന്ന വിലയാണ് ഇന്ന് സ്വർണത്തിന് രേഖപ്പെടുത്തിയിരിക്കുന്നത്. ഇന്നലെ ഈ മാസത്തെ ഏറ്റവും കുറഞ്ഞ വിലയായിരുന്നു സ്വർണത്തിന് രേഖപ്പെടുത്തിയിരുന്നത്. പവന് 37120 രൂപയായിരുന്നു സ്വർണ വില.

ഇന്ത്യൻ വിപണി

ഇന്ത്യൻ വിപണികളിൽ സ്വർണ്ണത്തിന്റെയും വെള്ളിയുടെയും വില ഇന്ന് കുറഞ്ഞു. എം‌സി‌എക്‌സിൽ ഡിസംബർ ഫ്യൂച്ചേഴ്സ് 10 ഗ്രാമിന് 0.15 ശതമാനം ഇടിഞ്ഞ് 50,550 രൂപയായി. വെള്ളി ഫ്യൂച്ചറുകൾ 0.12 ശതമാനം കുറഞ്ഞ് കിലോയ്ക്ക് 61,868 രൂപയിലെത്തി. കഴിഞ്ഞ സെഷനിൽ സ്വർണ വില 0.1 ശതമാനം ഉയർന്നിരുന്നു. ഇന്നലത്തെ ഏറ്റവും താഴ്ന്ന നിരക്കായ 50,030 ൽ നിന്ന് വെള്ളി വില ഒരു ശതമാനം നേട്ടം കൈവരിച്ചു.

ആഗോള വിപണി

കഴിഞ്ഞ സെഷനിൽ രണ്ടാഴ്ചത്തെ ഏറ്റവും ഉയർന്ന നിരക്കിലേക്ക് ഉയർന്നതിന് ശേഷം ആഗോള വിപണിയിൽ സ്വർണ്ണ വിലയിൽ ഇന്ന് മാറ്റമില്ല. സ്‌പോട്ട് സ്വർണ വില ഔൺസിന് 1,912.49 ഡോളറാണ് ഇന്നത്തെ നിരക്ക്. തിങ്കളാഴ്ച ഇത് 1,918.36 ഡോളറായിരുന്നു. വിലയേറിയ മറ്റ് ലോഹങ്ങളിൽ വെള്ളി വില ഔൺസിന് 0.1 ശതമാനം ഉയർന്ന് 24.37 ഡോളറിലും പ്ലാറ്റിനം 0.1 ശതമാനം ഉയർന്ന് 897.99 ഡോളറിലും പല്ലേഡിയം 0.2 ശതമാനം ഇടിഞ്ഞ് 2,356.85 ലും എത്തി.

വിലയെ ബാധിക്കുന്നത് എന്ത്?

സമ്മിശ്ര യുഎസ് സാമ്പത്തിക ഡാറ്റ, വർദ്ധിച്ചുവരുന്ന വൈറസ് കേസുകൾ, ഉത്തേജക നടപടികളുടെ കാലതാമസം എന്നിവ അമേരിക്കൻ സമ്പദ്‌വ്യവസ്ഥയുടെ ആരോഗ്യത്തെക്കുറിച്ച് ആശങ്കയുണ്ടാക്കുന്നു. ഇത് സ്വർണ വിലയെ ബാധിക്കുന്ന ഘടങ്ങളാണ്. സാമ്പത്തികവും രാഷ്ട്രീയവുമായ അനിശ്ചിതത്വ കാലഘട്ടത്തിൽ നേട്ടമുണ്ടാക്കുന്ന ഒരു സുരക്ഷിത നിക്ഷേപ താവളമായാണ് എല്ലാവരും സ്വർണ്ണത്തെ കണക്കാക്കുന്നത്.