സ്വർണ വില ഇന്ന് കുതിച്ചുയർന്നു, ഡിസംബറിൽ സ്വർണ വില മുകളിലേയ്ക്കോ?

കേരളത്തിൽ സ്വർണ വില ഇന്ന് ഉയർന്നു. പവന് 500 രൂപ ഉയർന്ന് 36720 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 4590 രൂപയാണ് ഇന്നത്തെ നിരക്ക്. ഈ മാസത്തെ ഏറ്റവും ഉയർന്ന വിലയാണ് ഇന്നത്തേത്. ഡിസംബർ ഒന്നിന് സ്വർണ വില പവന് 35920 രൂപയായി കുറഞ്ഞിരുന്നു. എന്നാൽ രണ്ട് ദിവസം കൊണ്ട് സ്വർണ വില 800 രൂപ ഉയർന്നു.

ഇന്ത്യൻ വിപണി

ഇന്ത്യൻ വിപണിയിൽ സ്വർണത്തിന്റെയും വെള്ളിയുടെയും വില തുടർച്ചയായ മൂന്നാം ദിവസവും ഉയർന്നു. എം‌സി‌എക്‌സിൽ ഫെബ്രുവരി ഫ്യൂച്ചർ വില 10 ഗ്രാമിന് 0.5 ശതമാനം ഉയർന്ന് 49,172 രൂപയിലെത്തി. വെള്ളി ഫ്യൂച്ചറുകൾ 0.55 ശതമാനം ഉയർന്ന് കിലോയ്ക്ക് 63,670 രൂപയിലെത്തി. അമേരിക്കൻ ഡോളറിന്റെ ഇടിവാണ് ഇന്ന് സ്വർണ വിലയെ പിന്തുണച്ചത്.

ആഗോള വിപണി

ആഗോള വിപണികളിൽ സ്‌പോട്ട് സ്വർണ വില ഔൺസിന് 1,830 ഡോളറായി കുറഞ്ഞു . ബ്രിട്ടന്റെ ഫൈസർ കൊവിഡ് വാക്‌സിന് വിതരണ അനുമതി ലഭിച്ചതാണ് വില കുറയാൻ കാരണം. വിലയേറിയ മറ്റ് ലോഹങ്ങളിൽ വെള്ളി വില 1.2 ശതമാനം ഇടിഞ്ഞ് 23.82 ഡോളറിലും പ്ലാറ്റിനം 0.7 ശതമാനം ഇടിഞ്ഞ് 1,007 ഡോളറിലും പല്ലേഡിയം 0.1 ശതമാനം ഉയർന്ന് 2,401.60 ഡോളറിലും എത്തി.

സ്വർണ വില ഇനി എങ്ങോട്ട്?

സ്വർണ വില സമീപകാലത്തെ ഏറ്റവും താഴ്ന്ന നിലയിൽ നിന്നാണ് ഇപ്പോൾ കുതിച്ചുയരുന്നത്. എന്നിരുന്നാലും, ഇടിഎഫ് വാങ്ങൽ വർദ്ധിക്കുകയോ ഉത്തേജക നടപടികൾ ലഭിക്കാതിരിക്കുകയും ചെയ്താൽ സ്വർണ്ണത്തിന്റെ സ്ഥിരമായ വീണ്ടെടുക്കൽ സാധ്യമല്ല.

ബിറ്റ്കോയിൻ പ്രതീക്ഷകൾ

ബിറ്റ്കോയിന്‍ മൂല്യം കുതിച്ചുയരുന്നത് സ്വര്‍ണ വിപണിയെ ബാധിക്കുമോ എന്ന രീതിയിലും ചില ചര്‍ച്ചകള്‍ പുരോഗമിക്കുന്നുണ്ട്. ഇക്കാലമത്രയും സുരക്ഷിത നിക്ഷേപം എന്ന നിലയില്‍ ഏറ്റവും അധികം നിക്ഷേപമെത്തിയിരുന്നത് സ്വര്‍ണത്തില്‍ ആയിരുന്നു.