വർഷാവസാനം സ്വർണ വിലയിൽ വൻ കുതിപ്പ്, പവന് 29000 രൂപയിലേയ്ക്ക്

സംസ്ഥാനത്ത് സ്വർണ വില ഇന്നും കുതിച്ചുയർന്നു. പവന് 200 രൂപ വർദ്ധിച്ച് 28920 രൂപയ്ക്കാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 3615 രൂപയാണ് ഇന്നത്തെ നിരക്ക്. സെപ്റ്റംബറിലെ ഏറ്റവും ഉയർന്ന നിരക്കിന് ശേഷമുള്ള ഏറ്റവും കൂടിയ വിലയാണ് ഇന്നത്തേത്. കഴിഞ്ഞ ആഴ്ച്ച 17-ാം തിയതി മുതൽ തുടർച്ചയായ ആറു ദിവസങ്ങളിൽ സ്വർണ വിലയിൽ മാറ്റമില്ലാതെ 28,360 രൂപയിൽ തുടർന്നിരുന്നു. പിന്നീട് വില കുത്തനെ ഉയരുകയായിരുന്നു.

കഴിഞ്ഞ മാസത്തെ വില

നവംബറിലെ സംസ്ഥാനത്തെ ഏറ്റവും ഉയർന്ന സ്വർണ വില പവന് 28,800 രൂപയായിരുന്നു. നവംബർ ഒന്നിനാണ് സ്വർണ വില 28,800 രൂപ എന്ന നിലവാരത്തിൽ എത്തിയത്. നവംബർ 2,3 തിയതികളിലും ഇതേ നിരക്കിലായിരുന്നു സ്വർണ വ്യാപാരം. നവംബറിലെ ഏറ്റവും കുറഞ്ഞ വില പവന് 28200 രൂപയാണ്.

എംസിഎക്സിലെ വില

എംസിഎക്സിൽ സ്വർണ്ണ ഫ്യൂച്ചേഴ്സ് വില 10 ഗ്രാമിന് 0.11 ശതമാനം ഉയർന്ന് 38,926 രൂപയിലെത്തി, തുടർച്ചയായ നാലാം ദിവസവും സ്വർണ വില ഉയർന്നിരിക്കുകയാണ്. എംസിഎക്സിൽ സിൽവർ ഫ്യൂച്ചേഴ്സ് വില 0.2 ശതമാനം ഇടിഞ്ഞ് കിലോയ്ക്ക് 46,740 രൂപയിലെത്തി. വെറും മൂന്ന് ദിവസത്തിനുള്ളിൽ വെള്ളിയ്ക്ക് ഒരു കിലോയ്ക്ക് 1,700 രൂപ വരെ വില ഉയർന്നു.

ആഗോള വിപണി

ആഗോള വിപണികളിൽ സ്‌പോട്ട് സ്വർണം ഔൺസിന് 0.1 ശതമാനം ഇടിഞ്ഞ് 1,509.56 ഡോളറിലെത്തി. ഈ ആഴ്ചയിൽ സ്വർണ വില 2% ഉയർന്നു. വെള്ളി ഔൺസിന് 17.88 ഡോളറിലെത്തി.

വില വർദ്ധനവ്

യുഎസും ചൈനയും തമ്മിലുള്ള 17 മാസത്തെ താരിഫ് യുദ്ധത്തിലൂടെ ഈ വർഷം ഇതുവരെ സ്വർണ വില 18 ശതമാനം ഉയർന്നു. മറ്റ് വിലയേറിയ ലോഹങ്ങൾക്കും വില കുത്തനെ ഉയർന്നു. പല്ലേഡിയം കഴിഞ്ഞയാഴ്ച ഔൺസിന് 2,000.35 ഡോളറിലെത്തി. ഈ വർഷം പല്ലേഡിയം 50 ശതമാനം ഉയർന്നു. 2019 ൽ പ്ലാറ്റിനം 20% നേട്ടം കൈവരിച്ചു.