സ്വർണം വാങ്ങുന്നില്ലേ? ഇന്ത്യയിൽ ഇന്ന് വിലക്കുറവ്: 22K, 24K സ്വർണം 10 ​ഗ്രാമിന് 100 രൂപയിലധികം കുറഞ്ഞു

ഈ ആഴ്ചയിൽ സ്വർണ വില തുടർച്ചയായി ഉയർന്നുകൊണ്ടേയിരുന്നു. ഇത് മഞ്ഞ ലോഹം അതിൻ്റെ റെക്കോർഡ് ഉയരത്തിലേക്ക് എത്താൻ കാരണമായി. തുടർച്ചയായ ആറ് സെഷനുകളുടെ നേട്ടങ്ങൾക്ക് ശേഷമാണ് ഇന്ന് ഇന്ത്യയിലെ സ്വർണ വിലയിൽ നേരിയ ഇടിവുണ്ടായത്. ഓരോ ദിവസവും ഇന്ത്യയിലെ സാധാരണക്കാർ സ്വർണ വിലയിലെ മാറ്റങ്ങൾ നിരീക്ഷിക്കുന്നുണ്ട്. കഴിഞ്ഞ ആഴ്ചയിൽ, സ്വർണം ഏകദേശം 4% ഉയർന്നു.

ഇന്ത്യയിൽ ഉത്സവ സീസൺ ആരംഭിച്ചു. ഓണത്തിനു പിന്നാലെ നവരാത്രി ആഘോഷങ്ങൾ, ദീപാവലി എന്നീ ഉത്സവങ്ങളാണ് ഇനി വരാനിരിക്കുന്നത്. ഇത്തരം ആഘോഷ വേളകളിൽ ഇന്ത്യയിലെ സ്ത്രീകൾ സ്വർണാഭരണങ്ങൾ ധരിക്കാറുണ്ട്. വിലക്കയറ്റം രൂക്ഷമായാൽ ഈ ഉത്സവ സീസണിൽ റീട്ടെയിൽ വിൽപ്പനക്കാർക്ക് ആശങ്ക വർദ്ധിക്കും. കാരണം ആളുകൾ സ്വർണം വാങ്ങുന്നത് കുറഞ്ഞാൽ അത് സ്വർണ വിപണിക്ക് തിരിച്ചടിയാവും.

ഇന്ത്യയിലെ ഇന്നത്തെ സ്വർണ വില

24 കാരറ്റ് സ്വർണം ഗ്രാമിന് 11 രൂപ കുറഞ്ഞ് 11,117 രൂപയിലെത്തി. ഒരു പവൻ്റെ വില 88 രൂപ കുറഞ്ഞ് 88,936 രൂപയിലെത്തി. 10 ഗ്രാമിന്റെ വില 110 രൂപ കുറഞ്ഞ് 1,11,170 രൂപയിലെത്തി. 100 ഗ്രാം സ്വർണത്തിന്റെ വില 1,100 രൂപ കുറഞ്ഞ് 11,11,700 രൂപയായി.

22 കാരറ്റ് സ്വർണം ഒരു ഗ്രാമിൻ്റെ വില 10 രൂപ കുറഞ്ഞ് 10,190 രൂപയായി. ഒരു പവൻ്റെ വില 80 രൂപ കുറഞ്ഞ് 81,520 രൂപയായി. 10 ഗ്രാമിൻ്റെ വില 100 രൂപ കുറഞ്ഞ് 1,01,900 രൂപയായി. 100 ഗ്രാമിന്റെ വില 1,000 രൂപ കുറഞ്ഞ് 10,19,000 രൂപയായി.

18 കാരറ്റ് സ്വർണം ഒരു ഗ്രാമിന് വില 9 രൂപ കുറഞ്ഞ് 8337 രൂപയായി. ഒരു പവന് 72 രൂപ കുറഞ്ഞ് 66,696 രൂപയായി. 10 ഗ്രാമിന് 90 രൂപ കുറഞ്ഞ് 83,370 രൂപയും, 100 ഗ്രാമിന് 900 രൂപ കുറഞ്ഞ് 8,33,700 രൂപയുമായി കുറഞ്ഞിട്ടുണ്ട്.

എംസിഎക്സ് സ്വർണം, വെള്ളി വിലകൾ

നിലവിൽ, ഒക്ടോബർ 3 ന് കാലാവധി പൂർത്തിയാകാൻ പോകുന്ന എംസിഎക്സിലെ സ്വർണ ഫ്യൂച്ചേഴ്‌സ് വില വെള്ളിയാഴ്ച 0.34% ഉയർന്ന് 1,09,356 രൂപയിൽ ക്ലോസ് ചെയ്തു. അതുപോലെ, ഡിസംബർ 5 ന് കാലാവധി പൂർത്തിയാകാൻ പോകുന്ന വെള്ളി ഫ്യൂച്ചേഴ്‌സ് വില 1,28,840 രൂപയിൽ ക്ലോസ് ചെയ്തു.

സ്പോട്ട് സ്വർണ വില

സ്പോട്ട് സ്വർണ വില 3,600 ഡോളർ എന്ന എക്കാലത്തേയും ഉയർന്ന നിരക്ക് ഭേദിച്ച് മുന്നേറുന്നുണ്ട്. ഇന്നത്തെ സ്പോട്ട് സ്വർണ വില 3,643.1 ഡോളറിലാണ് ഉള്ളത്. യുഎസിൻ്റെ പണനയ യോ​ഗത്തിൽ അടിസ്ഥാന പലിശ നിരക്ക് കുറക്കുന്നതോടെ ഇത് വീണ്ടും ശക്തമായി കുതിക്കും. 5,000 എന്ന വമ്പൻ റെക്കോർഡ് ലക്ഷ്യം 2026ഓടെ സംഭവിക്കുമെന്നും വിദ​ഗ്ധർ അഭിപ്രായപ്പെടുന്നു.