കേരളത്തിലെ ഇന്നത്തെ സ്വർണ വില; സ്വർണ വില ഇനി എങ്ങോട്ട്? കൂടുമോ കുറയുമോ?

കേരളത്തിൽ ഇന്നലത്തെ അതേ വിലയ്ക്ക് തന്നെയാണ് ഇന്നും സ്വർണ വ്യാപാരം നടക്കുന്നത്. പവന് 38160 രൂപയാണ് നിരക്ക്. ഗ്രാമിന് 4770 രൂപയാണ് ഇന്നത്തെ സ്വർണ വില. കഴിഞ്ഞ മാസത്തെ അപേക്ഷിച്ച് ഈ മാസം സ്വർണത്തിന് പൊതുവേ വിലക്കുറവാണെങ്കിലും വില വീണ്ടും ഉയരുന്നതിന്റെ ലക്ഷണങ്ങളുണ്ടെന്ന് സ്വർണ വ്യാപാരികൾ പറയുന്നു. സെപ്റ്റംബർ മാസത്തിലെ ഏറ്റവും കുറഞ്ഞ വില പവന് 37360 രൂപയാണ്. സ്വർണ വില കുത്തനെ ഉയർന്നതോടെ സ്വർണത്തിന്റെ വിൽപ്പനയിൽ കാര്യമായ കുറവുണ്ടായിരുന്നു. 

എംസിഎക്‌സിലെ വില

എംസിഎക്‌സിൽ സ്വർണ്ണ ഫ്യൂച്ചറുകൾ 10 ഗ്രാമിന് ഇന്ന് 0.08 ശതമാനം ഉയർന്ന് 51,810 രൂപയിലെത്തി. സിൽവർ ഫ്യൂച്ചേഴ്സ് 0.07 ശതമാനം ഇടിഞ്ഞ് കിലോയ്ക്ക് 68,921 രൂപയിലെത്തി. കഴിഞ്ഞ സെഷനിൽ സ്വർണം 0.16 ശതമാനം ഉയർന്ന് 10 ഗ്രാമിന് 51,770 രൂപയിലെത്തിയിരുന്നു. വെള്ളി വില 0.20 ശതമാനം ഇടിഞ്ഞു. കഴിഞ്ഞ മാസം സ്വർണ വില സർവ്വകാല റെക്കോർഡ് നിരക്കായ 56,200 രൂപയിലെത്തിയിരുന്നു.

ആഗോള വിപണി

കഴിഞ്ഞ സെഷനിൽ രണ്ടാഴ്ചത്തെ ഏറ്റവും ഉയർന്ന നിരക്കിലെത്തിയ ശേഷം ആഗോള വിപണിയിൽ ഇന്ന് സ്വർണ വില ഇടിഞ്ഞു. സ്‌പോട്ട് സ്വർണ വില ഇന്ന് 0.2 ശതമാനം ഇടിഞ്ഞ് 1,952.15 ഡോളറിലെത്തി. കഴിഞ്ഞ സെഷനിൽ ഇത് 1,971.71 ഡോളറായി ഉയർന്നിരുന്നു. വിലയേറിയ മറ്റ് ലോഹങ്ങളിൽ വെള്ളി വില ഔൺസിന് 0.3 ശതമാനം ഇടിഞ്ഞ് 27.09 ഡോളറായി. പ്ലാറ്റിനം 1.5 ശതമാനം ഇടിഞ്ഞ് 963.38 ഡോളറിലെത്തി. പല്ലേഡിയം 0.9 ശതമാനം ഇടിഞ്ഞ് 2,388.29 ഡോളറിലും എത്തി.

വിലയെ സ്വാധീനിക്കുന്ന ഘടകങ്ങൾ

സാമ്പത്തിക വീണ്ടെടുക്കലിന്റെ ശുഭാപ്തിവിശ്വാസം സുരക്ഷിത താവളത്തിന്റെ ആവശ്യകതയെയും സ്വർണ്ണ വിലയെയും ബാധിക്കും. അതേസമയം, ധനപരമായ ഉത്തേജക നടപടികളുടെ പ്രതീക്ഷയും ദുർബലമായ ഡോളറും സ്വർണ വില ഉയരാൻ കാരണമാകും. യുഎസ് ഫെഡറൽ നയ തീരുമാനത്തിനായി കാത്തിരിക്കുകയാണ് നിക്ഷേപകർ. ഇതനുസരിച്ച് വരും ദിവസങ്ങളിൽ സ്വർണ വിലയിൽ മാറ്റങ്ങളുണ്ടായേക്കാം. യുഎസ് ഡോളർ സൂചിക കഴിഞ്ഞയാഴ്ച 4 ആഴ്ചയിലെ ഏറ്റവും ഉയർന്ന നിരക്കിലെത്തിയിരുന്നു.

സ്വർണ്ണ വില ഈ വർഷം

ഇന്ത്യയിൽ, സ്വർണ്ണ വില ഈ വർഷം ഇതുവരെ 30% ഉയർന്നു. പകർച്ചവ്യാധികൾക്കിടയിൽ അഭൂതപൂർവമായ ഉത്തേജനവും കുറഞ്ഞ പലിശനിരക്കും ഈ വർഷത്തെ മികച്ച നിക്ഷേപ മാർഗങ്ങളിലൊന്നായി സ്വർണത്തെ മാറ്റി. ഓഗസ്റ്റിൽ ഇന്ത്യയിലേക്കുള്ള സ്വർണ്ണ ഇറക്കുമതി 3.7 ബില്യൺ ഡോളറായി ഉയർന്നു. കഴിഞ്ഞ വർഷം ഇതേ കാലയളവിൽ ഇത് 1.36 ബില്യൺ ഡോളറായിരുന്നു.