സ്വർണ വില: ഇന്നലെ ഇടിഞ്ഞു, ഇന്ന് നേരിയ വർദ്ധനവ്

സ്വർണ വിലയിൽ ഇന്ന് നേരിയ വർദ്ധനവ്. പവന് 80 രൂപ കൂടി 28280 രൂപയ്ക്കാണ് ഇന്ന് വ്യാപാരം പുരോ​ഗമിക്കുന്നത്. ​ഗ്രാമിന് 10 രൂപയാണ് ഇന്ന് കൂടിയത്. ഒരു ​ഗ്രാം സ്വർണത്തിന്റെ ഇന്നത്തെ വില 3535 രൂപയാണ്. കഴിഞ്ഞ ഒരാഴ്ച്ചയായി കുറഞ്ഞ സ്വർണ വിലയിലാണ് ഇന്ന് നേരിയ വർദ്ധനവ് ഉണ്ടായിരിക്കുന്നത്.

ഇന്നലത്തെ വില

ഇന്നലെ പവന് 28200 രൂപയും ​ഗ്രാമിന് 3525 രൂപയുമായിരുന്നു സ്വർണ വില. മൂന്ന് ദിവസം സ്വർണ വിലയിൽ മാറ്റമില്ലാതെ തുടർന്നതിന് ശേഷമാണ് ഇന്നലെ വില കുറഞ്ഞത്. ഈ മാസത്തെ ഏറ്റവും കുറഞ്ഞ വിലയാണ് ഇന്നലെ സ്വർണത്തിന് രേഖപ്പെടുത്തിയത്. നവംബറിലെ ഏറ്റവും ഉയർന്ന വില 28800 രൂപയാണ്. നവംബർ ഒന്നു മുതൽ മൂന്ന് വരെയാണ് ഈ വിലയ്ക്ക് വ്യാപാരം നടന്നത്.

ചരിത്രത്തിലെ ഏറ്റവും ഉയർന്ന വില

സെപ്റ്റംബര്‍ നാലിനാണ് ചരിത്രത്തിലെ ഏറ്റവും ഉയര്‍ന്ന നിരക്ക് സ്വര്‍ണത്തിന് രേഖപ്പെടുത്തിയത്. ഗ്രാമിന് 3,640 രൂപയും പവന് 29,120 രൂപയുമായിരുന്നു നിരക്ക്. ഇന്ത്യയിൽ സ്വർണ്ണ വില ഈ വർഷം 20% ഉയർന്നു. ഇതോടെ സ്വർണത്തിന്റെ വിൽപ്പനയിൽ കനത്ത ഇടിവും നേരിട്ടു തുടങ്ങി.

വാങ്ങാൻ ആളില്ല

സ്വർണ വില കുത്തനെ ഉയർന്നതോടെ ഈ വർഷം സ്വ‍ർണം വാങ്ങുന്നവരുടെ എണ്ണം വളരെ കുറവാണ്. ലോകത്തിലെ തന്നെ ഏറ്റവും കൂടുതൽ സ്വർണ ഉപഭോക്താക്കളുള്ള ഇന്ത്യയിൽ ഈ വർഷം സ്വർണം വാങ്ങുന്നവരുടെ എണ്ണത്തിൽ വൻ ഇടിവാണ് രേഖപ്പെടുത്തിയിരിക്കുന്നത്. 2016 ന് ശേഷമുള്ള ഏറ്റവും താഴ്ന്ന നിലയിലേയ്ക്കാണ് ഇപ്പോൾ സ്വർണ വിൽപ്പന കൂപ്പുകുത്തിക്കൊണ്ടിരിക്കുന്നത്.

malayalam.goodreturns.in