സ്വർണത്തിന് ഇന്നും പൊള്ളും വില, ഒന്നര മാസത്തിനിടയിലെ ഏറ്റവും ഉയർന്ന വില

കേരളത്തിൽ സ്വർണ വിലയിൽ ഇന്ന് മാറ്റമില്ല. ഇന്നലത്തെ അതേ വിലയ്ക്ക് തന്നെയാണ് ഇന്നും സ്വർണ വ്യാപാരം നടക്കുന്നത്. ഒന്നര മാസത്തിനിടയിലെ ഏറ്റവും ഉയർന്ന വിലയ്ക്കാണ് ഇന്നലെ മുതൽ സംസ്ഥാനത്ത് സ്വർണ വ്യാപാരം പുരോഗമിക്കുന്നത്. പവന് 38080 രൂപയാണ് വില. സെപ്റ്റംബർ പകുതിയ്ക്ക് ശേഷം ആദ്യമായാണ് സ്വർണ വില 38000 കടക്കുന്നത്. ഗ്രാമിന് 4710 രൂപയാണ് ഇന്നത്തെ നിരക്ക്.

ആഭ്യന്തര വിപണി

കഴിഞ്ഞ സെഷനിൽ കനത്ത നഷ്ടം നേരിട്ടതിനെ തുടർന്ന് ഇന്ത്യൻ വിപണിയിൽ സ്വർണത്തിന്റെയും വെള്ളിയുടെയും വില ഇന്ന് ഉയർന്നു. എംസിഎക്‌സിൽ സ്വർണ്ണ ഫ്യൂച്ചറുകൾ 10 ഗ്രാമിന് 0.8 ശതമാനം ഉയർന്ന് 51,226 രൂപയിലെത്തി. വെള്ളി ഫ്യൂച്ചറുകൾ 1.2 ശതമാനം ഉയർന്ന് കിലോയ്ക്ക് 62,086 രൂപയിലെത്തി. കഴിഞ്ഞ സെഷനിൽ സ്വർണ്ണ ഫ്യൂച്ചറുകൾ 800 രൂപയും വെള്ളി വില 1,400 രൂപയും കുറഞ്ഞിരുന്നു. ആഗോളതലത്തിൽ, യു‌എസിന്റെ തിരഞ്ഞെടുപ്പ് ഫല സാധ്യത നിലനിൽക്കുന്നുണ്ടെങ്കിലും സ്വർണ്ണ വിലയിൽ ഇന്ന് കാര്യമായ മാറ്റമില്ല. 

ആഗോള വിപണി

സ്‌പോട്ട് സ്വർണ വില ഔൺസിന് 1,904.66 ഡോളർ എന്ന നിലയിൽ ചെറിയ മാറ്റമാണ് ഇന്ന് രേഖപ്പെടുത്തിയത്. മറ്റ് വിലയേറിയ ലോഹങ്ങളിൽ വെള്ളി വില 0.3 ശതമാനം ഉയർന്ന് 23.98 ഡോളറിലെത്തി. പ്ലാറ്റിനം വില മാറ്റമില്ലാതെ 869.04 ഡോളറിലും പല്ലേഡിയം വില 0.5 ശതമാനം ഇടിഞ്ഞ് 2,276.97 ഡോളറിലുമെത്തി. കഴിഞ്ഞ സെഷനിൽ 0.8 ശതമാനം വരെ ഉയർന്ന് ഡോളർ സൂചിക ഇന്ന് 0.02 ശതമാനം കുറഞ്ഞു.

സ്വർണ വിലയിലെ ചാഞ്ചാട്ടം

യുഎസ് തിരഞ്ഞെടുപ്പ് ഫലത്തോട് നിക്ഷേപകർ പ്രതികരിക്കുന്നതിനാൽ സ്വർണം വിപണി അസ്ഥിരമായ വ്യാപാരത്തിന് സാക്ഷ്യം വഹിച്ചേക്കാം. എന്നിരുന്നാലും വ്യക്തമായ തിരഞ്ഞെടുപ്പ് ഫലം പൊതുവെ സ്വർണത്തിന് ഗുണം ചെയ്തേക്കാം.  കൊറോണ വൈറസ് സംഭവവികാസങ്ങളും സ്വർണ്ണ വ്യാപാരികൾ കൃത്യമായി നിരീക്ഷിക്കുന്നുണ്ട്. ഇതും സ്വർണ വിലയെ സ്വാധീനിക്കുന്ന പ്രധാന ഘടകമാണ്. അടുത്തിടെ വില ഇടിഞ്ഞിട്ടും, ഈ വർഷം ഇതുവരെ ഇന്ത്യയിൽ സ്വർണ്ണ വില 30% ഉയർന്നു.

ആവശ്യം കുറഞ്ഞു

ഓഗസ്റ്റിൽ ഇന്ത്യയിൽ സ്വർണ വില റെക്കോർഡ് ഉയരത്തിൽ എത്തിയിരുന്നു. 10 ഗ്രാമിന് വില 56,200 രൂപയിലെത്തിയിരുന്നു. വെള്ളി വില കിലോയ്ക്ക് 80,000 രൂപ വരെ ഉയർന്നു. മോത്തിലാൽ ഓസ്വാൾ ഫിനാൻഷ്യൽ സർവീസസിന്റെ റിപ്പോർട്ട് അനുസരിച്ച്, ആഭരണങ്ങൾ, ബാറുകൾ, നാണയങ്ങൾ എന്നിവ ഉൾപ്പെടുന്ന ഇന്ത്യയിലെ മൊത്തം സ്വർണ്ണ ഉപഭോക്തൃ ആവശ്യം സെപ്റ്റംബർ പാദത്തിൽ ജൂൺ പാദത്തെ അപേക്ഷിച്ച് ഗണ്യമായി കുറഞ്ഞു.

ആഭരണം വേണ്ട

ആഭരണ ആവശ്യകത കുത്തനെ കുറഞ്ഞെങ്കിലും സ്വർണ്ണ ബാറുകളുടെയും നാണയങ്ങളുടെയും ആവശ്യം ഈ പാദത്തിൽ കുത്തനെ ഉയർന്നതായി റിപ്പോർട്ടിൽ പറയുന്നു. സ്വർണത്തിന്റെ വില കുതിച്ചുയർന്നതോടെ ഉപഭോക്താക്കൾ സ്വർണ്ണ ബാറുകളും നാണയങ്ങളും ലാഭകരമായ നിക്ഷേപ ഓപ്ഷനായി തിരിഞ്ഞെടുത്തതാണ് ഇതിന് കാരണം. അതേസമയം, മൊത്തം ഇന്ത്യൻ സ്വർണ്ണ ഡിമാൻഡിന് 60% സംഭാവന ചെയ്യുന്ന ഗ്രാമീണ സമ്പദ്‌വ്യവസ്ഥയിലും ബാർ, നാണയ ഡിമാൻഡ് വർദ്ധിച്ചിട്ടുണ്ട്.