'സിബിൽ സ്കോർ ഇല്ലാത്ത പയ്യനെ വേണ്ട', വിവാഹത്തിൽ നിന്ന് പിന്മാറി പെൺ വീട്ടുകാർ

ഒരു വിവാഹം കഴിക്കാൻ ഒരുങ്ങുമ്പോൾ കുടുംബ പശ്ചാത്തലം, സാമ്പത്തിക സ്ഥിരത, ജാതകം എന്നിവയൊക്കെ നോക്കുന്നത് കണ്ടിട്ടുണ്ട്. എന്നാൽ സിബിൽ സ്കോർ നോക്കി കല്യാണം കഴിക്കുന്ന സംഭവം ഇത് ആദ്യമാണ്. മഹാരാഷ്ട്രയിലെ മൂർത്തിസാപൂരിലെ ഒരു യുവാവിനാണ് സിബിൽ സ്കോർ കുറഞ്ഞതുകൊണ്ട് വിവാഹത്തിൽ നിന്നും പിന്മാറേണ്ടി വന്നത്.

വധുവിന്റെ അമ്മാവൻ വരന്റെ സിബിൽ സ്‌കോർ പരിശോധിക്കാൻ നിർബന്ധിച്ചതിനെ തുടർന്ന്, വിവാഹം അവസാന നിമിഷം റദ്ദാക്കി എന്ന വാർത്ത ടൈംസ് ഓഫ് ഇന്ത്യ അടക്കമുള്ള മാധ്യമങ്ങൾ റിപ്പോർട്ട്‌ ചെയ്തിട്ടുണ്ട്.

സിബിൽ സ്‌കോർ മൂലം വിവാഹം റദ്ദാക്കിയ സംഭവം

മൂർത്തിസാപൂരിലാണ് കേൾക്കുമ്പോൾ തമാശയായി തോന്നുമെങ്കിലും വളരെ ഗൗരവകരമായ ഈ സംഭവം നടന്നത്. വിവാഹത്തിനുള്ള ഒരുക്കങ്ങൾ എല്ലാം പൂർത്തിയാക്കിയ വധുവിന്റെയും വരന്റെയും വീട്ടുകാർ വലിയ ആഘോഷങ്ങളിലായിരുന്നു. എന്നാൽ, ഇതിനിടെയാണ് ഒരു ഔപചാരിക മീറ്റിംഗിൽ, വധുവിന്റെ അമ്മാവൻ വരന്റെ സാമ്പത്തിക പശ്ചാത്തലത്തെക്കുറിച്ച് സംശയം പ്രകടിപ്പിക്കുകയും, സിബിൽ റിപ്പോർട്ട് കാണണമെന്ന് ആവശ്യപ്പെടുകയും ചെയ്തത്.

അവരുടെ അന്വേഷണഫലങ്ങൾ വധുവിന്റെ കുടുംബത്തെ അമ്പരപ്പിച്ചു. വരന് പല ബാങ്കുകളിൽ നിന്നുമുള്ള അനവധി വായ്പകളുണ്ടായിരുന്നു.
അവന്റെ സിബിൽ സ്‌കോർ വളരെ കുറഞ്ഞ നിലയിലായിരുന്നു. ഇതുവരെ എടുത്ത വായ്പകളിൽ പലതും സമയബന്ധിതമായി അടച്ചിട്ടില്ലെന്ന വിവരം കുടുംബം കണ്ടെത്തി. ഒരു വ്യക്തിയുടെ സിബിൽ സ്‌കോർ കുറവായാൽ, ആ വ്യക്തി സാമ്പത്തികമായി അസ്ഥിരനാണെന്നും, വായ്പകൾ തിരിച്ചടയ്ക്കുന്നതിൽ പ്രശ്‌നങ്ങളുണ്ടെന്നും സൂചിപ്പിക്കുന്നു. ഇതാണ് വധുവിന്റെ കുടുംബത്തെ വിവാഹം റദ്ദാക്കാൻ പ്രേരിപ്പിച്ചത്. അതായത് സാമ്പത്തികമായി സ്ഥിരതയില്ലാത്ത പയ്യന് തങ്ങളുടെ മകളെ വിവാഹം ചെയ്തു നൽകാൻ ആ കുടുംബം സമ്മതിച്ചില്ല.

എന്താണ് സിബിൽ സ്‌കോർ? എന്തുകൊണ്ടാണ് ഇത് പ്രധാനപ്പെട്ടതാകുന്നത്?

സിബിൽ സ്‌കോർ എന്നാൽ ക്രെഡിറ്റ് ഇൻഫർമേഷൻ ബ്യൂറോ ലിമിറ്റഡ് നൽകുന്ന ഒരു ഫിനാൻഷ്യൽ ക്രെഡിറ്റ് സ്കോറിംഗ് സംവിധാനം ആണ്. ഒരു വ്യക്തിയുടെ വായ്പ എടുത്ത ചരിത്രം, ക്രഡിറ്റ് കാർഡ് ഉപയോഗം, പണമടയ്ക്കൽ രീതികൾ എന്നിവയുടെ അടിസ്ഥാനത്തിലാണ് ഈ സ്കോർ കണക്കാക്കുന്നത്.

*സാധാരണയായി 300 മുതൽ 900 വരെയാണ് സിബിൽ സ്‌കോർ.

*750-900 എന്ന സ്കോർ വളരെ നല്ലത് എന്ന് കണക്കാക്കുന്നു.

*600-750 സ്കോർ ശരാശരിയാണ്, എന്നാൽ ചില കടബാധ്യതകൾ ഉണ്ടാകാം.

*600-ൽ താഴെയുള്ള സ്‌കോർ കുറവായിട്ടാണ് കണക്കാക്കപ്പെടുന്നത്, ഇത്തരക്കാർക്ക് വായ്പ ലഭിക്കാൻ ബുദ്ധിമുട്ടുണ്ടാകും.

ഒരു വ്യക്തിയുടെ സിബിൽ സ്‌കോർ ഉയർന്നതാണെങ്കിൽ, വായ്പകൾ എളുപ്പത്തിൽ ലഭിക്കും. കുറഞ്ഞ സിബിൽ സ്കോർ ബാങ്കുകൾക്കും സാമ്പത്തിക സ്ഥാപനങ്ങൾക്കും വ്യക്തിയിൽ അവിശ്വാസ്യത ഉണർത്തുകയും തുടർന്ന് വായ്പ നിരസിക്കപ്പെടാനും സാധ്യതയുണ്ട്.

സിബിൽ സ്‌കോർ വർദ്ധിപ്പിക്കാൻ എന്ത് ചെയ്യണം?

വരന്റെ കുറഞ്ഞ സിബിൽ സ്‌കോർ വിവാഹം റദ്ദാക്കാൻ കാരണമായതുപോലെ, ഒരു വ്യക്തിയുടെ സാമ്പത്തിക സ്ഥിരത കുടുംബജീവിതത്തിനും അത്യന്താപേക്ഷിതമാണ്. നല്ല സിബിൽ സ്‌കോർ നിലനിർത്താൻ താഴെ പറയുന്ന കാര്യങ്ങൾ ശ്രദ്ധിക്കുക:

1. വായ്പ തിരിച്ചടവ് കൃത്യസമയത്ത് നടത്തുക

വായ്പകൾ എടുത്താൽ, തുടർച്ചയായ പ്രതിമാസ ഇഎംഐ (EMI) അടയ്ക്കുന്നത് നിർബന്ധമാണ്. പല തവണ ഇഎംഐ വൈകിപ്പിച്ചാൽ സിബിൽ സ്‌കോർ കുറയാൻ സാധ്യതയുണ്ട്.

2. ക്രെഡിറ്റ് കാർഡ് ഉത്തരവാദിത്വത്തോടെ ഉപയോഗിക്കുക

ക്രഡിറ്റ് കാർഡ് ഉപയോഗിക്കുമ്പോൾ വളരെയധികം ചെലവഴിക്കാതെ, നിശ്ചിത സമയത്ത് പൂർണ്ണമായി അടയ്ക്കുക.

3. അനാവശ്യ വായ്പകൾ ഒഴിവാക്കുക

വളരെ അധികം വായ്പകൾ എടുത്താൽ, ബാങ്കുകൾക്ക് ഈ വ്യക്തി വലിയ സാമ്പത്തിക ബാധ്യതയിലാണെന്ന് തോന്നും. ഇത് സിബിൽ സ്‌കോറിനെ പ്രതികൂലമായി ബാധിക്കും.

4. ക്രഡിറ്റ് റിപ്പോർട്ട് കൃത്യമായി പരിശോധിക്കുക

മിനിമം മൂന്നുമാസത്തിൽ ഒരിക്കൽ CIBIL റിപ്പോർട്ട് പരിശോധിക്കുക. എന്തെങ്കിലും തെറ്റുകൾ സംഭവിച്ചിട്ടുണ്ടെങ്കിൽ അത് തിരുത്തുക.

5. പഴയ ക്രഡിറ്റ് അക്കൗണ്ടുകൾ അടച്ചുപൂട്ടരുത്

നല്ല ക്രഡിറ്റ് ചരിത്രം ഉണ്ടെങ്കിൽ, പഴയ ബാങ്ക് അക്കൗണ്ടുകൾ തുടർച്ചയായി പ്രവർത്തിപ്പിക്കുക. ഇത് സിബിൽ സ്‌കോർ മെച്ചപ്പെടുത്താൻ സഹായിക്കും.

6. കുറഞ്ഞ ക്രഡിറ്റ് ഉപയോഗ നിരക്ക് (Credit Utilization Ratio - CUR) നിലനിർത്തുക

നിങ്ങളുടെ ലഭ്യമായ ക്രഡിറ്റിന്റെ 30% -ൽ താഴെ മാത്രം ഉപയോഗിക്കുക. ഉദാഹരണത്തിന്, നിങ്ങളുടെ ക്രഡിറ്റ് കാർഡിൽ ₹1,00,000 ക്രഡിറ്റ് പരിധിയുണ്ടെങ്കിൽ, ₹30,000-ലധികം ചിലവഴിക്കാതിരിക്കുക.

സാമ്പത്തിക സുരക്ഷിതത്വം വിവാഹ ബന്ധത്തിൽ നിർണായകമാണ് എന്ന വസ്തുതയാണ് ഈ വാർത്തയിലൂടെ വ്യക്തമാകുന്നത്. വധുവിന്റെ അമ്മാവൻ ഉന്നയിച്ച ഒരു പ്രധാന ചോദ്യം ശ്രദ്ധിക്കണം:

❝ ഒരു പുരുഷൻ ഇതിനകം പല വായ്പകളുടെയും ഭാരത്തിലാണെങ്കിൽ, അയാൾക്ക് ഭാവിയിൽ ഭാര്യയ്ക്കും കുടുംബത്തിനും സാമ്പത്തിക സുരക്ഷിതത്വം നൽകാൻ കഴിയുമോ? ❞

വിവാഹ ബന്ധം സ്നേഹത്തോടൊപ്പം നിബന്ധനകളും പ്രതീക്ഷകളും ഉൾക്കൊള്ളുന്ന ഒരു കൂട്ടായ്മയാണെന്ന് ഈ സംഭവം തെളിയിക്കുന്നു.

വ്യക്തികൾ വിവാഹം പോലെ ഒരു പ്രധാന തീരുമാനത്തിന് മുമ്പ് അവരുടെ സാമ്പത്തിക സ്ഥിതി പരിശോധിക്കേണ്ടതുണ്ട്. വധൂ-വരന്മാർ തമ്മിൽ സാമ്പത്തികമായും മാനസികമായും സുസ്ഥിരമായ ഒരു ബന്ധം ഉറപ്പാക്കേണ്ടത് അത്യന്താപേക്ഷിതമാണ്.