തൃശൂരിലെ സ്വർണ്ണ വ്യാപാര കേന്ദ്രങ്ങളിൽ ജിഎസ്ടി വകുപ്പിന്റെ മിന്നൽ പരിശോധന, വമ്പൻ ജ്വലറി ഉടമകൾ കുടുങ്ങുമോ?

ജി എസ് ടി വകുപ്പ് ഉദ്യോഗസ്ഥരുടെ സംഘം തൃശൂരിലെ വിവിധ സ്വർണ്ണാഭരണ നിർമ്മാണ യൂണിറ്റുകളിൽ വൻ റെയ്ഡ് നടത്തി. ഈ കഴിഞ്ഞ ബുധനാഴ്ചയാണ് സ്വർണ്ണാഭരണങ്ങൾ നിർമ്മിക്കുന്ന കേന്ദ്രങ്ങളിലും സ്വർണ്ണക്കട ഉടമകളുടെ വീടുകളിലും പരിശോധന നടന്നത്. തൃശൂരിലെ ഇത്തരം 67 കേന്ദ്രങ്ങളിൽ പരിശോധന നടത്തിയതായി ജി എസ് ടി വകുപ്പ് അധികൃതർ അറിയിച്ചു.

സംസ്ഥാനത്തിന്റെ ചരിത്രത്തിൽ തന്നെ ആദ്യമായാണ് ജി എസ് ടി വകുപ്പിന്റെ നേതൃത്വത്തിൽ ഇത്ര വിപുലമായ ഒരു പരിശോധന നടക്കുന്നത്. റെയ്ഡ് നടന്ന ഭൂരിഭാഗം കേന്ദ്രങ്ങളിലും ബില്ലിങ്ങിലും നികുതി കണക്കുകളിലും വൻ ക്രമക്കേടുകളും കണ്ടെത്തി. കുറ്റക്കാർക്കെതിരെ കർശന നടപടി സ്വീകരിക്കാനാണ് അധികൃതരുടെ നീക്കം.

 

34 സ്വർണ്ണക്കടയുടമകളുടെ വീട്ടിൽ പരിശോധന നടന്നു. ജില്ലയിലെ സ്വർണ്ണ വ്യാപാര കേന്ദ്രങ്ങളിൽ വിവിധ വകുപ്പുകളുടെ പരിശോധനകൾ നടക്കാറുണ്ടെങ്കിലും ഒരേ സമയം എല്ലാ നിർമ്മാണ - വ്യാപാര യൂണിറ്റുകളിലും പരിശോധനകൾ നടക്കുന്നത് ആദ്യമായാണ്. പഴുതടച്ചുള്ള മിന്നൽ റെയ്ഡ് വ്യാപാരികളെയും ഞെട്ടിച്ചിട്ടുണ്ട്.

രാജ്യത്തെ പ്രധാന സ്വർണ്ണ - വജ്രാഭരണ നിർമ്മാണ കേന്ദ്രങ്ങളിലൊന്നായ തൃശൂരിൽ നിയമവിരുദ്ധമായ പ്രവർത്തനങ്ങൾ നടക്കുന്നുണ്ടെന്ന വിവരത്തെ തുടർന്ന് കഴിഞ്ഞ കുറച്ചു മാസങ്ങളായി പ്രദേശം ജി എസ് ടി വകുപ്പിന്റെ രഹസ്യ നിരീക്ഷണത്തിലായിരുന്നു. സ്പെഷ്യൽ കമ്മീഷണർ എബ്രഹാം റെൻ എസിന്റെ നേതൃത്വത്തിലായിരുന്നു മിന്നൽ പരിശോധന നടന്നത്.