എച്ച്ഡിഎഫ്സി ബാങ്കിന്റെ നെറ്റ് ബാങ്കിംഗ് സേവനങ്ങൾ രണ്ടാം ദിവസവും തകരാറിൽ

ഉടൻ പുന: സ്ഥാപിക്കും

ചില സാങ്കേതിക തകരാറുകൾ കാരണം, തങ്ങളുടെ ചില ഉപഭോക്താക്കൾക്ക് നെറ്റ് ബാങ്കിംഗിലേക്കും മൊബൈൽ ബാങ്കിംഗ് ആപ്പിലേക്കും പ്രവേശിക്കാൻ സാധിക്കുന്നില്ലെന്നും ഇതിന് പരിഹാരം കണ്ടെത്താൻ സാങ്കേതിക വിദഗ്ദ്ധർ പ്രവർത്തിച്ചു കൊണ്ടിരിക്കുകയാണെന്നും സേവനങ്ങൾ ഉടൻ പുന: സ്ഥാപിക്കാൻ കഴിയുമെന്ന് ഉറപ്പുണ്ടെന്നും ബാങ്ക് അധികൃതർ അറിയിച്ചു. അസൌകര്യം നേരിട്ടതിൽ ഖേദിക്കുന്നുവെന്നും ഉപഭോക്താക്കൾ അനാവശ്യമായി ആശങ്കപെടേണ്ടതില്ലെന്നും എച്ച്ഡി‌എഫ്‌സി ബാങ്ക് ട്വീറ്റ് ചെയ്തു.

ബാങ്ക് അക്കൌണ്ടിൽ പ്രവേശിക്കുമ്പോൾ

ബാങ്ക് അക്കൌണ്ടിലേക്ക് പ്രവേശിക്കാൻ ശ്രമിക്കുന്നവർക്ക് 'പ്രിയ ഉപയോക്താവേ, നെറ്റ്ബാങ്കിംഗ് സിസ്റ്റം നിലവിൽ ലോഗിൻ ചെയ്തിട്ടുള്ള ഉപഭോക്താക്കളാൽ തിരക്കിലാണ് അൽപ്പ സമയത്തിന് ശേഷം പരിശ്രമിക്കുക, നിങ്ങളുടെ സഹകരണത്തിന് നന്ദി" എന്ന അഭ്യർത്ഥനയാണ് ലഭിക്കുന്നത്.

മികച്ച ഡിജിറ്റൽ ബാങ്ക്

പകൽ സമത്ത് മൊബൈൽ ആപ്ലിക്കേഷനും നെറ്റ്ബാങ്കിംഗ് സേവനങ്ങളും ദീർഘനേരം തകരാറിലാകുന്നത് ഇന്ത്യയിലെ മികച്ച ഡിജിറ്റൽ ബാങ്ക് എന്ന അംഗീകാരമുള്ള എച്ച്ഡിഎഫ്സി ബാങ്കിനെ സംബന്ധിച്ച് വലിയ പോരായ്മമാണ്. 4.5 കോടി ഉപഭോക്താക്കളുള്ള എച്ച്ഡിഎഫ്സി ബാങ്കിലെ, പകുതിയോളം ഉപഭോക്താക്കളും ഡിജിറ്റൽ സേവനങ്ങൾ ഉപയോഗിക്കുന്നവരാണ്.

ഓഹരി വില

എച്ച്ഡിഎഫ്സി ബാങ്കിന്റെ ഓഹരികൾ ഇന്ന് 0.3 ശതമാനം ഇടിഞ്ഞ് 1,260.95 രൂപയിലെത്തി. തിങ്കളാഴ്ച ഓഹരി വില 0.7 ശതമാനം ഇടിഞ്ഞിരുന്നു. ഇന്ന് ബിഎസ്ഇ സെൻസെക്സ് മാറ്റമില്ലാതെ 40,774.44 എന്ന നിലയിലാണ് തുടരുന്നത്.