കൊവിഡ് 19: പിഎം കെയേഴ്‌സ് ഫണ്ടിലേക്ക് 150 കോടി രൂപ സംഭാവന ചെയ്ത് എച്ച്ഡിഎഫ്‌സി ഗ്രൂപ്പ്

കൊവിഡ് 19 മഹാമാരിക്കെതിരെയുള്ള ദുരിതാശ്വാസ, പുനരധിവാസ നടപടികള്‍ക്ക് സര്‍ക്കാരിനെ സഹായിക്കുന്നതിനായി ധനകാര്യ സേവന കമ്പനിയായ എച്ച്ഡിഎഫ്‌സി ഗ്രൂപ്പ്, പിഎം-കെയേഴ്‌സ് ഫണ്ടിലേക്ക് 150 കോടി രൂപ സംഭാവന ചെയ്തു. നാമേവരെയും സംബന്ധിച്ചിടത്തോളം ഇത് അനിശ്ചിതത്വവും ശ്രമകരവുമായ സമയമാണിതെന്ന് എച്ച്ഡിഎഫ്‌സി ഗ്രൂപ്പ് ചെയര്‍മാന്‍ ദീപക് പരേഖ് പറഞ്ഞു. 

പകര്‍ച്ചവ്യാധിക്കെതിരെ പോരാടുന്നതിന് അഹോരാത്രം കഷ്ടപ്പെടുന്ന രാജ്യത്തെ കേന്ദ്ര-സംസ്ഥാന സര്‍ക്കാരുകള്‍, സായുധ, അര്‍ദ്ധസൈനിക വിഭാഗങ്ങള്‍, ലോക്കല്‍ പൊലീസ്, ആരോഗ്യ സംരക്ഷണ പ്രൊഫഷണലുകള്‍, ശുചിത്വ തൊഴിലാളികള്‍ എന്നിവരുടെ മാതൃകാപരമായ ശ്രമങ്ങളെ അഭിനന്ദിക്കുകയാണ് പിഎം-കെയേഴ്‌സ് ഫണ്ടിലേക്കുള്ള സംഭാവനയിലൂടെ എച്ച്ഡിഎഫ്‌സി ഗ്രൂപ്പ് വ്യക്തമാക്കുന്നതെന്നും അദ്ദേഹം കൂട്ടിച്ചേര്‍ത്തു.

കൊവിഡ് 19 മഹാമാരിക്ക് ശേഷവും 130 കോടിയിലധികം വരുന്ന ജനസംഖ്യയുള്ള നമ്മുടെ ഇന്ത്യ, കൂടുതല്‍ ശക്തിയും അനുകമ്പയും മറ്റുമുള്ളൊരു രാഷ്ട്രമായി ഉയര്‍ന്നുവരുമെന്ന് ഉറപ്പുണ്ടെന്നും ഒരു പ്രസ്താവനയിലൂടെ അദ്ദേഹം അറിയിച്ചു. എച്ച്ഡിഎഫ്‌സി മാനേജ്‌മെന്റും ഗ്രൂപ്പിലുടനീളമുള്ള ജീവനക്കാരും, ഏവരുടെയും അചഞ്ചലമായ ശ്രമങ്ങളെ അഭിനന്ദിക്കുന്നതായും, നിലവിലെ പ്രതിസന്ധിയുടെ അവസാനത്തോടെ ഇന്ത്യ കൂടുതല്‍ ശക്തവും ഊര്‍ജ്ജസ്വലവുമായി ഉയരാന്‍ ആഗ്രഹിക്കുന്നതായും പരേഖ് കൂട്ടിച്ചേര്‍ത്തു.

നേരത്തെ, ഗൗതം അദാനിയുടെ നേതൃത്വത്തിലുള്ള അദാനി ഫൗണ്ടേഷനും പിഎം-കെയേഴ്‌സ് ഫണ്ടിലേക്ക് ധനസഹായം നല്‍കിയിരുന്നു. 100 കോടി രൂപയാണ് കൊവിഡ് 19 -ന് എതിരായ പോരാട്ടത്തിനായി പിഎം-കെയേഴ്‌സ് ഫണ്ടിലേക്ക് അദാനി ഫൗണ്ടേഷന്‍ സംഭാവന ചെയ്തത്. രാജ്യത്തെ പ്രമുഖ കമ്പനികളെല്ലാം കൊവിഡ് 19 നിയന്ത്രണ വിധേയമാക്കാന്‍ സഹായങ്ങള്‍ വാഗ്ദാനം ചെയ്തിട്ടുണ്ട്.

പ്രമുഖ വാഹന നിര്‍മ്മാതാക്കളായ മാരുതിയും മഹീന്ദ്രയും കൊവിഡ് രോഗികള്‍ക്കായുള്ള വെന്റിലേറ്റര്‍ നിര്‍മ്മാണത്തിലേര്‍പ്പെട്ടപ്പോള്‍, ബജാജ് ഗ്രൂപ്പ് കൊവിഡ് ഫണ്ടുകളിലേക്ക് 100 കോടി രൂപ വാഗ്ദാനം ചെയ്തു. കൊവിഡ് 19 പ്രതിരോധത്തിനായി 25 കോടി രൂപയുടെ മരുന്നുകളും സാനിറ്റൈസറും നല്‍കുമെന്ന് സണ്‍ ഫാര്‍മ അറിയിച്ചിരുന്നു. രാജ്യത്തെ മറ്റൊരു വാഹന നിര്‍മ്മാതാവായ ടാറ്റാ ഗ്രൂപ്പ്, കൊവിഡ് ദുരിതാശ്വാസ ഫണ്ടിലേക്ക് 1,000 കോടി രൂപ വാഗ്ദാനം ചെയ്യുകയുണ്ടായി.